مساء الخير والسعادة
اتمنى لكم قراءة ممتعه
#اذبلني خذلانك
#البارت 10
#بقلم ليلى الركابي
باچر يجيبك زمانك نادم ألنه
وجوهنه نفس الوجوه
لچن ايس بعد من ذيچ المحنه !
وثاني يوم خابر استغربت هو امس خابرنه شعجب لان هو كل 3 ايام او 4 يخابر مرة
رديت عليه وبعد سلام كال
احمد... باجر راجع تعبت هنا الايجارت هدتني
دلال... هَــْـِْـْْـِلاّ بيك
سديته منه راح يرجع بعد سنه ونص غياب
سمر دعبول بسرعه نضفن راح يجي ابوجن
سمر...شعنده جاي
درر...صدك مشتاقتله
سمر...وعلى شنو مشتاقتله امشي اقري احسلج
دلال...بالاخير هاذا بيته ويريد يرجع اله
سمر...اي شنو اني لازمته خل يجي
دلال...سمررر روحي نضفي
سمر...امشي درر كنسي الطارمه واني رايحه للغرف
دلال...رجعت كعدت على الكرسي لان جنت اخيط شعنده كلبي ممرتاح اتمنى ما يطشرنه ويبهذلنه مرة ثانيه
عمر روح للمحل جيب عصاير
عمر...اوو يمه عوفيني نايم
دلال...راح يجي ابوك كوم
عمر...ياابو هاذا عوفيني رحمه لاهلج
دلال...احجي عدل ويلا كوم
سمر...يمه ترا ما جاي من المريخ عوفي نايم خطيه بس اليوم استراحته مو كل يوم يطلع من الصبح يشتغل لليل يلا يرجع وعايف دراسته
دلال... ابقو انتو اني ادزز دعبول
درر...ها ماما
دلال...روحي للمحل جيبي عصاير
درر...ايي رايحه
دلال...البسي حجاب لا ترحين هيج
رحت للمطبخ طبخت ثلاث دجاجات وتمن ومرك وشويت سمج والترتيبات وسمر بس تتباوع ما راضيه اذا تريد تساعدني تنتر
سمر...فرحت من سمعت بابا راح يرجع بس اجت على بالي معاناتنه بهاي الفترة سنه ونص سجن وسنتين بغداد وسنه ونص ب.... يعني سنين هاجرنه وهسه فكر يرجع انقهر من اشوف اخوي الصغير ما يعرف كلمه بابا اصلا ولا مرة يلفضها وهي هاي الكلمه الطفل ينطقها اول وحدة ويكون ابوه فرحان بي
اريد افرح وارتب ابوي راح يرجع بس اكو شي بداخلي يمنعني اني مو زغيرة شفت معاناة امي وعمري 14 بهاي السنين كلها ما شفتها ضحكت ضحكه من كلبها
صح هو جان ما مقصر ويانه واتذكر من جنت طفله يشيلني ويلعبني وياخذني للمحلات ويدرسني جان حنين علينه ودوم يسأل شنو محتاجه بس مو دائما متواجد مثل باقي الاباء اكو اوقات نحتاجه بس نلكاه ماكو
