ادعموني بتعليقاتكم و تصويت *ڤوت*
________
كعدت ثاني يوم الصبح ساعة بالعشرة هيج كولشي جان طبيعي غسلت ورتبت فراشي واكلت بس بعدين من اجيت افتح فوني لكيته مقفول ومجانت تشتغل البصمة ومن كتبت الرمز جان يطلع غلط كتبته كومة وكل ما يخلص وقت ارجع اكتبه
بس بالآخير اتذكرت ان بس اختي الي اكبر مني ليان تعرف الرمز وعدها بصمة بـفوني لانها مرات تستخدمه لشغلات الجامعة مالتها وهيج فرحت كبل لأمي واني متعصبة
_ماما هاي ليان لاعبة بفوني من جنت نايمة ومغيرة الرمز روحي احجي وياها
راحت امي لغرفة ليان حجت وياها واني شفت امي اتأخرت فخفت وبديت افكر بس لا عرفوا فرحت وراها واني محظرة قائمة إنكار حتى اذا يعرفون فد شي ما انطي الي عندي كله واتورط
طبيت للغرفة لكيت امي واكفة تحجي وي ليان وكبل امي اندارت علية ضربتني راشدي قوي هاي جانت اول مرة امي تضربني هيج ضربة يعني لا شاقة ولا شي
_سارة
رديت عليها واني لازمة خدي
_ها
_انتِ ويامن تحجين
_شنو ويامن شعندي غير صديقاتي
_متأكدة؟ زين وصورج المن دازتهن
_ما دازتهن لأحد غريب بس صديقاتي الي وياي
_ولج سوسو بس صديقاتج موو؟
_اي لعد منو قابل
_يا طايحة الحظ هسة تلكيه فاضحج كدام الرايح والجاي
واني من سمعتها هيج ما اتحملت وزل لساني
_لا ماما هو مستحيل يسوي هيج
_يعني تعترفين انتِ تحجين وي واحد
اني سكتت وهي رجعت كالت
_ويامن تحجين سارة؟
اني جنت اعرف هم يعرفون منو بس يريدوني اعترف فاخذت نفس وكلت بصوت ناصي
_محمد
_منوو؟
عدت عليها نفس الشي بس بصوت اعلى واني بعدي لازمة خدي من الراشدي
_محمد
_بس لو اعرف هذا شجابج عليه وشلون وصلج بنتي هذا واحد ما يضم سالفة يسولف ويبرذع للرايح والجاي
اني ما رديت وضليت اسمع كلامها واني احس كأنما امي دتضربني بسهام على كلبي وبطبيعتي الباردة طبعا ردة فعلي مو بنفس الوكت بس ساكتة وحتى عيني ما نزلتها وماكو اي تعبير ندم ع وجهي لان حتى لارا الي عقلها عقل طفل كالت لي طريقي اعوج بس اني من البداية قررت ان اتحمل اي شي يصير نتيجة هاي العلاقة حتى لو يضرني ويضره
أنت تقرأ
أراكَ لاحقاً (رواية عراقية جريئة)
Romanceهسة اكيد فرحتي من عرفتي بهالخبر موو؟ ومنو كال اني مهتمة اصلا رواية قصتها حقيقية باللهجة العراقية عن عشق إثنين بين فتاة عزباء و شاب متزوج فهل يا ترى سينصرهم القدر ام كما يقال لا تجري الرياح بما تشتهيه السفن.
