#صابر_1و2
مجاهد يوسف
بالصدفة سامية عندها صاحبتها اسمها سعاد شغالة في دار الايتام واليوم داك جات بعندو قالت تغشاها تسلم عليها وتشاغل الشفع شوية وكانت طوالي بتجيها فيهو وهي ما عندها اولاد متزوجها علي ود الشول وببقى ليها بقاية سرارة ومي قريبة بالحيل ومن حلتهم ، اتزوجها قبل خمسة سنة وربنا ما قسم ليهم بالخلفة وجروا في درب الجنى لمن حفوا ولفوا ما خلوا علاج ولا دكتور ما فاتولو لكن القسمة ما ادت وربنا ما قسم ليهم بيها
اليوم داك لمن فاتت لصاحبتها شافتلها بت من الفي الدار عجبتها ورادتها ساي من شافتها والبت صغيرونة وحليوة ودخلت قلبها من غير استئذان وسامية حست زي الفي حاجة رابطاها بيها وقلبها انشرح بس للبت دي
وكلمت بيها سعاد قالت ليها البت دي انا ردتها والله وحاسة زي الفي حاجة شاداني ليها
سعاد قالت ليها انتي ربنا ما اداك اولاد طبيعي تنجذبي للاطفال
_لا لا ما كدي انا كم مرة جيتك هنا وشفت الاطفال ديل لكن زي الاحساس دا اول مرة احسو وانا بدور البت دي اربيها
سعاد ولا كضبت قالت ليها طوالي وانا بعمل ليك كل الاجراءات بس خلي راجلك علي يجي معاك لانو في اوراق توقعوها سوا
سامية مشت واقنعت علي بعد تعب شديد انو لازم ياخدوا البت دي ويتبنوها ويربوها واهي تعوضهم الخلفة وتملا عليهم البيت
علي شغال محاسب في بنك وحالو ميسور ومع الحاح سامية وافق وفات معاها دار الايتام لي فطوم وبعد وقعوا الاوراق وعملت ليهم سعاد الاجراءات اللازمة ساقوها معاهم
ومن اول يوم والبيت دبت فيهو الحياة وفطوم غير حليوونة كانت ذكية خلاس وفصيحة رغم صغر سنها وعلي زاتو حباها واتعلق بيها ورادها وبقى متين بس ينتهي من الدوام عشان يجي جاري البيت جري ليها ويومي يغشى الدكان يشيل ليها حلاوة وألعاب وسامية دايرة تطير من الفرحة التقول بتها صحي صحي واكانت رايحة منها ولقتها والحنان العندها كلو وهبتو لفطوم دي وجابوا ليها احسن لبس واحلى العاب وفرحانين بيها فرح شديد ويلعبوا معاها زي الشفع
بعد كم شهر علي قال لسامية دايرين نمشي الحلة لانو عندي اجازة اسبوع بتبدا من يوم الاحد الجاي وكالعادة ح نعديها في الحلة
اجازة الاسبوع دي بدوها ليهو كل تلاتة شهور وبمشوا يعدوها في الحلة وكانت سامية بنتظر الاجازة دي بفارغ الصبر قالت ليهو مالو نمشي طوالي
_ وفطوم ؟
_نسوقها معانا
_نسوقها كيفن ونقول لاهلنا شنو ؟
_ نكلمهم بالواضح اننا جبناها من دار الايتام
_ لا لا انا عندي حقو الكلام دا ما نوري بيو زول من الحلة وانتي براك عارفة اهلنا ما جديدين عليك احسن حاجة نخليها هنا مع سعاد في الدار لمن نمشي ونجي
_ والله ولا برجعها دار الايتام ولا بكضب عليك احسن نعدي اجازتنا دي هني دي ان ما داير توريهم بالواضح وانت اكان خايف منهم خلي الموضوع دا علي انا بتفاهم معاهم
_ ما حكاية خايف بس ما برضوا وورح ونسوقها معانا وبتشوفي براك
يوم الأحد الاجازة بدت ومن اول يوم ركبوا فاتوا الحلة
علي امو حاجة الشول طيلة الخمسة سنة وهي تنجه فوقو عرس عرس انا دايرة اشوف جناك
وهو بصبر فوقها وبقول ليها سمح بس متابعين مع دكتور وان مافي امل بعرس وهي الصبر غلبها وما باقي ليها علا تقول ليهو ان ما عرست ماني عافية منك لكن صبيرو ليها مسكتها لكن خاتاها ليهو في طرف خشمها وآخر مرة لمن جاهم قالت ليهو المرة الجاية ان جيت ومرتك دي ما فوقها جنى ياني المعرسة ليك قال ليها خير وفات
في الطريق وهم ماشين علي الحلة قبل اكان شايل هم امو وخايف تقول ليهو علا تعرس وما عافية منك ان ما عرست وهو بريد مرتو سامية ريدة شديدة ما بدور يعرس فوقها لكن اليو بقى ما شايل هم تقول ليهو علا عرس وخايف منها ومن اخواتو لمن يعرفوا فطوم جابوها من دار ايتام ، ولانو ما بقدر يقول ليهم دي بتي عشان فطوم كبيرة وعمرها تلاتة سنة وهو ليهو منهم كم شهر بس وعارف امو ما بتقبل بالكلام دا ويعمل شنو ما عارف وبقى سارح وساكت و يفكر لمن التفكير صدع بيهو وسامة راكبة جمبو وشايفاهو شايل هم امو واخواتو قالت ليهو خليها علي الله لمن نصل ان شاء الله كل شي بمشي تمام التمام
يتبع .....
صابر (2)
مجاهد يوسف
اول ما وصلوا الحلة ود الشول قال ليها انا شايف يا سامية ننزل في بيت اهلك اول مع انو بيت اهلو اكان اقرب من بيت اهلها لكن خايف من امو
سامية قالت ليهو احسن برضو لكن امك ما بترضى وانت براك عارفها
قال ليها صاح بتزعل لكن ما مشكلة بس انا ما بدورها تعرف فطوم لانها بتساعل مع دخلتنا وداير ارتب لي كلام اقولو ليها واحاول اقنعها بيهو ، وقال لسواق العربية الجابتهم الحلة واكان بعرفو بالله لو سمحت ودينا فريق قدام ما تودينا بيتنا
ونزلوا في بيت اهل سامية وام سامية واخواتها فرحن بي فطوم فرح شديد وسامية ورتن كل شي وعلي قعد معاهم لي بعد العصر ولمن جابوا الغداء قعد يبلع فوقو تبلع من الهم وشرب الشاي وصلى العصر واتوكل وفات ناس امو , في الطريق لاقاهو اللمين صاحبو وفردتو وحلف يمين اكان يغشى معاهو بيتو وما فكاو علا بعد المغرب
بهناك الشول عرفت زمان علي ولدها جاء الحلة لانو ما في حاجة بتندس والزعل داير يفرطقها تفرطق وتتململ منتظراهو بس متين يجي
وهو حكى للمين صاحبو الحكاية كلها حقت فطوم الاتبنوها من دار الايتام واللمين عارف امو قال ليهو والله ما كان تجيبوها معاكم هسي امك تعمل ليك موال وتسمعك كلام كتير فيها وهي اصلا انت عارفها ليها مدة دايراك تعرس غايتو الله يعينك بس
كلام اللمين دا طمم بطن علي زيادة وزاد ليهو الهم الفوقو واتوكل وفات
وامو زعلانة في نزلتو عند نسابتو ولسة ما عرفت بفطوم
اول ما دخل وقبال تسلم عليهو قالت ليهو كتر خيرك آ النسيت امك وقاعد من الصباح عند نسابتك خلاس المرة الفقر العاقر دي لبستك خاتم وختت فوقك سرجها وبقيت امك ما بتطراها ؟
_ دا كلام شنو يا امي بس ...
_ لا بس ولا شتين وهي وينها هي كمان المشنطة العيفة مستكترة تجي تسلم علينا وبعدين تعال هني صحي الكلام السمعتو دا؟
قال ليها وهو يبلع في ريقو كلام شنو ؟
_ كمان بقيت تدس من امك ؟ الحلة كلها تتكلم بيهو
علي قايلها عرفت بي فطوم قال ليها اي صاح آ يمة بس ما فيها حاجة
قالت ليهو سجم خشمك وسجم خشمك والترابة في خشم امك
قال ليها ليه يا امي ؟
قالت ليهو والله تعرس وكراعك فوق رقبتك والمرة الفقر دي علا عاملة ليك عمل ، انا من شفت امها يومداك متلبسة ومارقة عرفتها فاتت للفكي وكتبتك عشان ما تعرس فوق بتها والليلة من نزلت عندهم ساي عرفت العمل مشى فوقك لكن ان ما عرست فوقها وقهرتها وقهرت امها دي ماني عافية منك آ علي لا دنيا ولا آخرة
_ يمة انا ما عارفك قاصدة شنو ولا عرف كلام شنو دا السمعتيهو ؟ بس انا قاصد ليك فطوم
_ وفطوم دي شنو كمان؟
_ فطوم دي بت جبناها من دار الايتام وبت حلوة خلاس اكان شفتيها ساي بتريديها
_ يرض عضامك آ السايب كمان بتدور تربي اولاد الحرام وووب علي
وقعدت في الواطة وخمت ليها تراب وكشحتو في راسها وقعدت ترفع في يديها وتقول بري بري الرمادة كالت خشمك آ الشول والعوض في ولدك علي العليهو العوض حليمة بت حكم كتبتو وبتو الفقر لبستو خاتم
واخواتو وخالتو نعيمة برضن نبحن فوقو زييين واخواتو قالن ليهو اكان ما طلقت سامية الليلة لا اخونا ولا بنعرفك وقعدن مع امو في الواطة وهو غلبو البقولو ليهن قام فات لي ابوهو وراهو القصة كلها
ابوهو قال ليهو الكلام دا اعوج تب كيفن آ جنى تربي ليك بت حرام ما معروف اصلها ولا فصلها وانت مرتك ان ما بتلد وداير ليك جنى ما تعرس ، الراجل محللات ليهو اربعة ، مالك ناقص وللا ناقص ؟ انا الليلة دي بعقد ليك علي بتول بت عمك الطيب والكلام دا ما فوقو رجعة تب تاني
علي مرق فات علي اللمين صاحبو وغالبو البسويهو
يتبع ....
