#صابر_15
مجاهد يوسف
كل يوم صابر يكبر وهموم فطوم معاهو بتكبر ولسة في معاناتها في بيت ناس سامية الاتربت فيهو وخالتها اللا بالاسم ولا بالعشرة ممغساها ودايرها تغور منهم باي طريقة وهي محتارة تقبل وين مرات تعاين في صابر وتبكي ما عارفة مصيرو شنو والايام داسة ليها وليهو شنو ولمن تشوف ليها راجل سايق ولدو في الحلة تتوجع لصابر هي ما عاشت مع اب ولا عرفت قيمة الاب سامية اكانت امها وابوها واختها وصاحبتها وهي البسمة والحاجة الوحيدة الفي حياتها كانت سمحة ولمن فاتت فات معاها كل شي سمح كانت دايرة صابر يتربى مع ابوهو يوريهو الصاح من الغلط ويعلموا المبادي والقيم لكن للاسف اتيتم من الاب قبال ما يمرق للحياة مع انو ابوهو حي ما مات لكن اخير عدمو ياها القريشات الكان برسلن ليها ومن اتزوج قطعها ونساها وعمرو ما جاء شال ولدو ولا فكر يوم يجي يشوفو خايف من الناس ومنن الناس كتير بتسأل نفسها ومرة سألت زينب صاحبتها قالت ليها الناس منو يا زينب ديك ما فهمتها قالت ليها الناس منو كيفن يا فطوم
قالت ليها انا وانتي وداك ودا وديل كلنا بنقول الناس الناس والناس قالوا وبقولوا وفعلوا وتركوا وبنخاف منهم ومن كلامهم وهم منم الناس ديل ما نحن زاتنا اي واحد فينا عادي نفسو مختلف منهم وكلمة الناس دي مجاز او حاجة مبهمة خاتنها قدامنا ساي ونحن الناس
زينب فهمتها لكن ما عرفت تقول ليها شنو كل القالتو ليها انو كل الناس بقولوا كدا ما نحن بس وكل الفالحين فوقو نداري عيوبنا وندسها من الناس خوف منهم عشان ما ينضموا بينا وهم كدا كدا ما بريحونا
صابر يبكي وفطوم تقول ليهو كمل بكاك من صغير وطلع دموعك كلها ما تخلي فوقها دمعة من هسي وقبال ما تعرف الدنيا والناس الفيها عشان تاني انا ما بسمح ليك تبكي بعد تكبر لانك راجل لازم تتحدى اي شي وانا بربيك علي انك تطلع زول كعب ما في زول يقدر عليك ولا يظلمك ولا تظلم زول انت صابر ود فطوم وبس وفطوم بت سامية وبس مع انك ود مرة وبت مرة لازم تطلع مختلف عن كل الرجال واكان طلعت لي زيهم عوضي فيك علي الله وصابر يبكي ولا عارفها بتقول في شنو لمن زينب قالت ليها حرام عليك بدل تطلعيهو زول ينفع المجتمع
قالت ليها وينو المجتمع دا ؟ المجتمع البحاسب الناس علي غلطة غيرهم المجتمع الكلو عنصرية المجتمع الاي زول شايف روحو ملاك دا مجتمع ما فيهو رحمة ولا يوم بحن علي زول ضعيف والضعيف بدل ياخدوا بيدو ويملوهو ثقة لحدي ما يبقى قوي لا لا دايرنو يبقى ضعيف كدي لمن يموت
لفت الايام وفطوم ما زالت في بيت ناس سامية لمن اتقدم ليها ميرغني ود الفكي ودا زول شغال في الحلة وما من الحلة وطوالي وافقت عليهو حست فيهو زول غير ناس الحلة وورتوا كل شي عنها وكان شرطها الوحيد انو يرحلها من الحلة دي ويعد صابر زي ولدو
ميرغني ود الفكي وافق اصلا فطوم حلوة وعاجباهو شديد وما صدق زاتو لمن وافقت عليهو سريع كدا اكان شايفها من بعيد لبعيد ولمن عرف انها مطلقة اتعجب من راجلها الكان معرسها وقال للكلمو ياخ دي بطلقوها ؟
تم العرس وفطوم رحلت مع ميرغني ود الفكي حلتهم
بهناك الفاتح راجلها بعد عرس بت المدير ونسى ونسى صابر ولدو ديك جابت ليهو ولد مع ولادتو طوالي اتذكر صابر الكان مفروض يسميهو فادي وللا فريد وسمى دا فادي بس حياتو اكانت اي كلام ما شاف فيها غير المشاكل والهم وبقى يسكر ومرتو مركبة سرجها فوق ضهرو بحكم انها بت مديرو ومنجضة امو نجاض وخشمهم ما قادرين يفتحوهو معاها تعمل الدايراهو وتمرق وتدخل علي كيفها
بعد تم معاها سنتين وفي يوم كدا فجأة اتذكر فطوم وايامو لمن كانت معاهو كانت كلها حب وريدة وسعادة رغم انها ما طويلة لكن ما بتتنسي بالساهل وكل ما يتوجع من دي يقول يا حليلك يا فطوم
كبر صابر ودخل المدرسة وميرغني ود الفكي كان نعم الاب بالنسبة ليهو لانو بريد فطوم وفطوم بعد كرهت الرجال لكن ميرغني غير فكرتها نهائي وبقى البسمة التانية في حياتها بعد سامية زول ما متعلم لكن راجل ما بدور الاعوج كلو كلو وفي الحلة ليهو كلمة وهيبة ما في زول بقدر يفتح خشمو وللا يتكلم فيهو بكلمة ما سمحة ومن اول يوم جاب فيهو فطوم الحلة قال لاهلو فطوم دي مرتي وانا عرستها وهي مطلقة والمرة دي يتيمة ما عندها اهل مقطوعة من شدرة ما عندكم شغلة ببت منو ولا من وين ولا اصلها ولا فصلها ودايركم تبقوا ليها اهل وتلقى فيكم الام والاب والاخت والاخ والخال والعمة وانا ببقى ليها الراجل وكل القلتهم ديل وقسما عظما تشكي لي من زول فيكم وللا زول يتكلم فيها كلمة ما يشوف خير مني
وشالوا فطوم فوق راسهم وهي زاتها مرة بتتراد خلقة واخلاق
يتبع ....
