#صابر_21
مجاهد يوسف
صابر حكى ليها يوم شافها في العربية واكان قايلها امو وقال ليها من اليوم داك وانا ما فارقت الموقف فتشت ما خليت ليك محل والموقف دا حفظت حتى اسامي السواقين والكماسرة وحتى العربات كلهن ويومي بجيهو واصلو املي ما خاب في اني بلاقيك تاني غايتو سبحان الله شبه شديد بس امي اكبر منك شوية بكم سنة كدا لكن من بعيد والله ياها زاتها
قالت ليهو والله شوقتني اشوف امك دي واسمها منو ؟
قال ليها انتي ابوك اسمو عبد الله عبد الرحمن عبد الرحيم ؟
قالت ليو لا ابوي اسمو حسن السيد مالك قايل امك اختي وللا شنو ؟
قال ليها انتي لو شفتيها والله ما تصدقي وتقولي اختك
-انا زاتي لمن شفتك انت انخلعت والله بتشبه ولدي شبه شديد انا لمن كلمتني بتول صاحبتي والله ما صدقت قالت شافتك في عيادة
- انا دخلت مع ابوي الدكتور اليوم داك ولمن جيت ما لقيتها وهي زاتها قعدت افتش ليها كتير عشان الاقيك وامك وابوك حيين ؟
- اي حيين انت قايل امك اختي وللا شنو يا ولد ؟
- عندي احساس بقول كدا اصلا امي دي قصتها قصة غريبة وعجيبة وانا بمشي بكرة اجيبها ليك هنا
- تجيبها لي لشنو انا ما عندي اخوات ولا ابوي معرس فوق امي وكل العندي اخوين اصغر مني وانا البت الوحيدة
- الشبه دا اصلو ما ساي انا غايتو بجيبها بجيبها احتمال تطلع اختك وانتي خالتي ما معروف
- هوي يا ولد ما عشان امك بتشبهني داير تتسلبط فوقنا امش من هنا انا ما عندي اخوات
في اللحظة ديك جاء راجل المرة داخل وقال ليها دا منو البشبه ولدنا دا ؟
مرتو قالت ليهو والله شبه شديد لا وكمان قال امو بتشبهني شبه شديد وقايلني انا اخت امو كمان
راجل المرة دي اكان ضابط ومتحري قال لصابر كدي تعال وريني انت منو والجابك هنا شنو زاتو وكيف قايل مرتي دي اخت امك
صابر قال ليهو انتظرني يومين تلاتة بس امشي اجيب امي واجي
قال ليهو لو ما وريتني قصتك شنو اول ما بتمش ولا بخليك تمرق من هنا
وصابر حكى ليهم قصة امو كلها من طق طق اصلو ما نقص فيها حاجة
والمرة زعلت منو زعل شديد وقالت لراجلها اطردو من هنا الولد دا شنو الداير يلبس فينا امو وكمان بت حرام
قال ليها اصبري لمن نشوف اخرو شنو فعلا الشبه القريب والغريب والعجيب ما بكون ساي احتمال اختك زي ما قال وقال لصابر امش جيب امك وتعال
صابر جرى جري لابوهو وراهو انو لقى المرة البتشبه امو وحكى ليهو الحصل كلو وقال ليهو انا ماش اجيب امي
قال ليهو امش جيبها طوالي وزي ما قلت وقال الضابط احتمال الشبه دا لحكمة ما معروفة
صابر ولا انتظر بكرة في نفس اليوم ركب فات
وصل امو وكلمها بكل شي
وامو قالت ليهو مستحيل يكون في شبه كدا حتى لو في شبه ما معناتو ديل اهلي وحكاية اهلي دي انا قنعت منها زمان ولا بدور اكوس ليهم خليني يا ولدي اكمل ايامي بت حرام كدا اصلا انا اتعودت علي الهم والغم وما بدور ازيدو زيادة خليني يا ولدي
صابر قال ليها اخليك كيفن بعد لقيت اهلنا يمة ؟
عايني لي وعايني لروحك عايشين في نظر الناس اقل منهم عشان ما عندنا اهل ولا اصل وهسي لمن ربنا فتح لينا طريق نلقى بيهو اهلنا مالك دايرة تقفليهو يمة ؟
فطوم اخدت ليها بكية شديدة وقلدتو وقالت ليهو والله انا اكان مشيت معاك الا امش عشان خاطرك انت بس لكن انا ما بدور لي اهل وحتى لو طلعوا اهلي ما دايراهم عشان رميتهم لي الرمية دي
صابر قال ليها اي امشي عشان خاطري انا بس وفي نفسو دايرها تمشي عشان تعرف اهلها وما تعيش بت حرام في نظر الناس وتاني يقطع لسان اي زول يقول عليها بت حرام مع انو لسة ما اتأكد انو ديل اهلها صحي صحي وللا بتهيأ ليهو ساي عشان الشبه لكن الامل جواهو كبير في انهم ديل اهل امو
فطوم كلمت مقبول وورتو كلام صابر كلو ومقبول قال ليها ما في كلام زي دا وولدك دا مغيب ساكت ومن هنا ما بتفوتي اصلا انتي بت حرام اكان ما بت حرام ولدك دا زاتو ما بطلع كضاب وود حرام كدا ما بتمشي واكان عندك اهل ال يجوك هم اكان فعلا اهلك وباقيين عليك
وكلامو دا زعل صابر شديد وجاهو قال ليهو لا لا بتمش يا عمي
قال ليهو يا جنى هوي انا لا عمك ولا بعرفك وانا ما قلت ليك ما تجي هنا تاني الجابك شنو ؟
قال ليهو ما جيت ليك انا جيت لامي ومقبول مسكو دقاهو دقة كعبة خلاس لمن يدو فترت وكسر فيهو مطرق وزي البدق ليهو في حمار دق بلا رحمة
وامو جات تحجز برضو دقاها معاهو وقال ليهو يلا فوت من هنا وتاني ما اشوف وشك في البيت دا وقال لفطوم الجنى دا اكان جاك تاني هنا انا بكتلك وبكتلو
اهل مقبول بكاء صابر وامو فات اضنيهم لي غادي ولا فيهم زول جاء قال ليهو حرام عليك وخاتين الخمسة في الاتنين وصامين خشمهم عليهم وخجيجة مبسوطة تتكشم وتقول بركة بركة ان شاء الله يكتلها هي وولدها بت الحرام الختافة
وصابر مرق من البيت يبكي وخلى امو جوة البيت تبكي
مرق والدنيا دي في وشو سووودة ومسودة وانسدت بعد ما جاء لامو فرحان ومن الفرح جاري وطاير طيران رجع منها مدقوق ومجلود وباكي وحزنان
كره مقبول واهل مقبول وكره الدنيا دي كلها والعبرة سادة حلقو والدموع مالية عيونو والامل الجاء بيهو كلو في لحظة اتبدد
الشي الكان جاري وراهو شهور ويساسق ليهو وينوم ويصحى بيهو بعد لقاهو كرهو
مرق من امو وهو يقول في نفسو بضر شنو مقبول لو خلى امي فاتت معاي عشان تلاقي اهلها
صابر رجع بورسودان ووصل ابوهو محبط شديد وعلى حسب جهلو قال لابوهو موش امي دي اكانت مرتك ورح معاي نجيبها من الناس الكعبين ديل يا ابوي
الفاتح سكت مسافة وقال ليهو امش معاك كيفن يا ولدي واقول ليهم شنو وكيف اجيبها وهي في ذمة راجل تاني ودا كلو كوم وحكاية انا الاقي امك دا كوم براهو يا ولدي كيفن انا اقدر اعاين في وشها وللا اوريها وشي بعد الغلط العملتو في حقها بسبب غلطة هي ما عندها فيها ذنب , الغلط الهسي انا قاعد ادفع في تمنو يا ولدي انا طلقت امك وهي عروس طلقتها وكانت حامل بيك وبعد ولدت يوم واحد ما كلفت نفسي اجي اشوفها او اشوفك ولا اشتغلت بيكم الشغلة يا صابر يا ولدي امك دي جات بالغلط في مجتمع غلط في غلط . مجتمع يحاسب الناس علي الغلط وهو كلو غلط في غلط
صابر قال ليهو اها والحل شنو يا ابوي ؟
قال ليهو الحل تصبر بس يا صابر
وصابر النوم جافى عيونو تب تب ويفكر ساي والغبينة كاتلاهو كتله يفتش في الناس البعرفهم اكان يلقى ليهو زول يساعدو وقدر ما يتذكر واحد يلقاهو ما بحل ليهو مشكلتو فكر في علي ود الشول و اللمين صاحبو تاني قال لا لا الاتنين اكان فات ليهم ما اظنهم يعملوا ليهو حاجة
الاحساس بالوجع والهزيمة طعمو مر خلاص
ومافي زول موجوع وشايل هم امو غيرو
وفجاة اتذكر الضابط المتحري راجل المرة البتشبه امو قال بسسس دا بساعدني ومنتظر متين الشمش تطلع والواطة تصبح عشان يفوت ليهو
يتبع ...
