#صابر_14
مجاهد يوسف
الفاتح راجل فطوم كان عاجبو صابر ولدو عجب شديد وبينو وبين نفسو دايرو وبريد فطوم بس خايف من اهلو وكلام الناس وهو زول وجيه وجنتل وشخصية تشوفو يعجبك تعرفو تحتار وما الزول عليهو تكل داك امعة ساكت مدير المصنع الشغال فيهو عندو بنيتن بايرة فرح لمن عرف الفاتح طلق مرتو وما عارف السبب قام عشان ينحل من بتو ويفك بورتها بقى قريب شديد من الفاتح وطوالي بعزمو هو واهلو لحدي ما درعها فوقو وعرسها ليهو
قبل يعرس أكان طوالي بدي فطوم قروش ويصرفها بعد ما عرس بت المدير تاني ما اشتغل بيها ولا داير نسابتو يعرفوا عنو شي نساها أو اتناساها تب
فطوم القروش الكانت بتجيها من الفاتح كانت مريحاها بعد انقطعت راسها انقطع ابو سامية الخرفان داك لحق بتو وودع وام سامية واخت سامية الما عرست ديك بقن هن المعاها وام سامية زاتها كبرت خلاس وبقت بتشوف كشح
سامية عندها اخت متزوجة جات سكنت معاهم في البيت هي وراجلها عشان ما تخلي امها واختها براهن بعد ابوهم مات
فطوم البيت ضاق عليها وكمان بقى فوقو راجل غريب نظراتو ليها فيها الكتير الفاهماهو وعارفاهو كويس ونفس النظرات الدايما كانت متعودة عليها البتنهش وتقضم
مشت حكت لعلي ود الشول هو ما ابوها ولا عمرها حست انو ابوها لكن بحكم انو جابها مع سامية لمن كانت شافعة بقتو ابوها بالكلام ساي وغير كدا حافظة ليهو مشيتو لاهل الفاتح والمساعدات الكان بقدمها ليها مافي زول بتقدر تمش ليهو
ود الشول قال ليها انا بمش تاني للفاتح قالت ليهو لا خليهو ما دايرة منو شي انا بدور امش اشتغل واربي ولدي وورتو انها ما مرتاحة في البيت ولا دايرة تبقى عالة علي الناس هي وولدها صابر
قال ليها تعالي اقعدي في بيتنا قالت ليهو لا وهي عارفة امو واخواتو وسبب طلاقو من سامية الكانت بسببها
علي زاتو احتار في البسويهو معاها وما عندو غير دكانو يادوب فاتح ليهو بيتو والبركة في اللمين صاحبو العملو ليهو
قام فات للمين وحكى ليهو الحاصل
اللمين زول مرتب وزول نصيحة وراي صنقع ودنقر وقال ليهو نشوف ليها راجل بس يكون زول فيهو خير نعرسها ليهو
وقعدوا يفكروا في ناس الحلة
ما لقوا ألا العبيد ود رحمة مرتو ماتت ومن موتتها ما عرس فاتوا ليهو وكلموهو لكن ابى والخبر انتشر في الحلة والناس بقوا يشربوا بيهو في الجبنة
حاج الرضي راجل كبير اولادو كبار وبناتو اصغر واحدة فوقن ان ما قدر فطوم ما اصغر منها بالحيل قال بعرسها وكان زول مرتاح عندو حواشات يجر فوقها الحصان ولوري وبقر وطاحونة في الحلة
الناس هرجوا وجاطو خاصة اولادو وبناتو لكن ما اشتغل بيهم وفطوم قليلة حيلة رضت مع انو كبير في السن لكن اخير ليها علي الاقل تربي ولدها في يد راجل يوجهو ويعلمو ويوريهو بعدين هي أكان رفضت ح يكون مصيرها شنو
تم العرس سريع سريع وكان عرس اكتر من عادي لا دلوكة اندقت ولا حنة اتختت
كرامة وضبحوها شخ
وكرامة مضبوحة اصلا شخ
فطوم قبال تتم شهر من عرسها بنات حاج الرضي وامهن ورنها المكشن برا بصلة وشافت الويل وسهر الليل لكن صبرت وسكتت وكتمت بس في حشاها لا شكت ولا حكت
وحاج الرضي ابوهن زاتو ما ريحنو وفي اللاخر طلقها بعد تلاتة شهور بس من العرس
ورضينا بالهم والهم زاتو ما رضى بينا
ورجعت تاني فطوم ام حظ عاثر في زمن سافر وغادر لبيت ناس سامية
نظرات راجل اخت سامية لفطوم بقت واضحة وظاهرة لمن تعاين ليهو يعاين ليها تكره نفسها وتتضمضم وتتلملم علا هو لا بختشي ولا بتحشم ومرتو اخت سامية فكرت ليهو وعرفت الفي راسو والناوي عليهو ولا لامتو هو ولا واجهتو بس بقت تكره وتغير من فطوم وهي ما عندها اي ذنب والكانن بنات حاج الرضي بسونوا ليها دي بقت تعمل اكعب منو
وفطوم النسمة البسمة الحلوة الجميلة احتارت في البتسويهو وممكونة وصابرة راجية بس متين يكبر صابر
وبقت تكره كل الرجال
يتبع ....
