#صابر_13
مجاهد يوسف
زينب صاحبة فطوم وبت جيران ناس سامية ونديدتها قرت معاها واقرب الناس ليها هي الوحيدة البتعرف فطوم صاح ودايما بتدافع عنها وواقفة معاها في كل شي والوحيدة الفاهماها صاح وحاسة بمعاناتها يوم فطوم شايلة صابر تلولي فوقو وهو يبكي ساي وتقول ليهو اسكت يا صابر واصبر انا سميتك صابر عشان تصبر علي الدنيا وعلي الناس
زينب اكانت معاها قالت ليها انتي مالك متشائمة كدا يا فطوم
فطوم ضحكت بس ضحكتها زاتها ما الضحكة المتعوده عليها زينب اكانت صفراء وليها وفيها مليون ألف معنى
- متشائمة ؟ انتي يا زينب اختي طيبة خلاس وان شاء الله ربنا يسعدك ويديك علي حسب نيتك الطيبة دي وشنو ما بخليني اتشاءم عليك الله من فتحت وانا فتحت لقيت روحي في دار ايتام ومع شفع ما معروف ليهم اصل ولا فصل اطفال منبوذين من غير ذنب لا أم تحضن وتلعب وتلولي ولا أبو يعلم ويرشد ويحن والشغالات في الدار زاتهم زهجانين منها ومننا المحظوظ البجيهو راجل ومرتو الله ما قسم ليهم جنى وبريدو بعض ونفسهم في طفل يتونسوا بيهو ويونسهم ويملا عليهم بيتهم ويسوقوا ليهم طفل مننا بعد تردد كتير وغير دا يعزلوهو عزل على حسب المواصفات الخاتنها في راسهم والدار بتفرح بيهم وبسلمونا ليهم بكل سهولة ما عشان خاطرنا بدوروا لينا السمح لا لا عشان يخلصوا مننا ويقل عددنا وامكن عشان في غيرنا محتاجين لمحلنا في الدار
- ما تقولي كدا هسي انتي مالك ما عشتي احسن عيشة والمرحومة سامية قصرت معاك في شنو ما كانت ليك نعم الام
- سامية دي امي وعمري ما اتخيلت انها ما امي وجميلها في رقبتي بس انا بتكلم ليك بصفة عامة والناس ما بريحوا يا زينب ولا خاتين لينا اعتبار نحن ناس منبوذين المجتمع ساخط علينا زي النحن ما ناس قد نكون جينا الدنيا دي بغلط من واحد وللا واحدة في لحظة حقت طيشان لكن الغلطة دي نحن البندفع تمنها من عمرنا هسي انا دي من وانا صغيرة عايشة في الحلة دي وعادة نفسي واحدة منها وبريدها لكن انا في عيون الناس ما منها ولا عندي حق فيها وغريبة غريبة الحريم اكان شافني ساي يتغامزن والرجال بعضهم يصر لي وبعضهم يحن في حالي والبنات امهاتن بحاولن يبعدنهن مني والشباب ينهش بعيوني فيني والمريضين منهم شايفني احسن اسكت يا زينب اختي مافي داعي
- لا لا كملي وفضفضي اكان ما حكيتي لي انا دايرة تحكي لمنو
- كنت قاعدة احكي لامي سامية اكانت صاحبتي اكتر منك الله يرحمها , سليمان ود الضو سيد الدكان بتعرفيهو
- اي بعرفو مالو دا
- موش زول فاهم ومتعلم
- آي بقرا في الجامعة واتخرج اكان قاعد يدرسنا في الكورس
- اها يوم كدا رسل لي شافع صغير عشان اجي بيتهم جاني الشافع قال لي بدرية اختو دايراك انا استغربت عشان بدرية دي انا ما عندي علاقة بيها كدا تخليها تناديني المهم انا مشيت بس الكلام دا بيني وبينك عشان اوريك الزول الفاهم من الشباب في الحلة دي عاديني شنو
- اها كملي
- لبست طرحتي ومشيت ناس بدرية لقيت سليمان دا واقف في باب الديوان اول ما دخلت سلم علي ومسكني من يدي وساقني علي الديوان انا جريت يدي منو قال لي تعالي دايرك في موضوع طلع زول نيتو كعبة انا شاكلتو واديتو كف وتفيت ليهو في وشو وقلت ليهو بكلم ليك ابوك قال لي انتي بت حرام هههههه شوفي ساي عليك زي البلاوي دي وغيرو كتار ما في داعي احكي ليك شايفني زي المفروض اكون ليهم زي ما هم دايرين عشان انا بت حرام . الفاتح ابو صابر دا ابوهو قال ليهو لازم يطلقني عشان انا بت حرام والعرق دساس ومصيري اعمل زي ما عملت امي ودا كمان زول فاهم شديد . انا بعد ما الفاتح اتزوجني ومشيت من هنا عشت ايام حلوة معاهم صابر دا مفروض يكون اسمو فريد وللا فادي عشان الفاتح وفطوم الاسمين بحرف الفاء قلنا اولادنا كلهم تكون اساميهم تبدا بحرف الفاء ولو بت اخترنا فاتن وفريدة وفايزة هسي ما معروف اقبل بيهو وين وللا اعمل شنو عشان كدا سميتو صابر بتمنى يطلع حظو سمح لكن قالوا اي زول ليهو من اسمو نصيب ان شاء الله يكون صبور في الدنيا دي مافي اطيب من الصبر
يتبع ...
