#صابر_3و4
مجاهد يوسف
علي مرق فات علي اللمين صاحبو وغالبو البسويهو ولقى اللمين منتظرو زي العارفو بجي راجع ليهو واول ما علي قعد قال ليهو ياخ والله لا امي ولا ابوي ولا اخواتي ما رضوا بالبت وكمان ابوي داير يعقد لي علي بتول بت عمي الطيب ياخ انا زاتي اريتني اكان ما جيت
اللمين قال ليهو اول حاجة والله جيتك صاح لكن جيبت البت معاكم ونزلتك عن نسابتك دي الما صاح ، اكان تخلوها في الدار الجبتوها منها وانت اجازتك كلها اسبوع ما فرقت ولمن ترجعوا تاني تشيلوها منو وزول اكان بجيب خبرها مافي ، هسي الحلة كلها تنضم بيكم انت ومرتك وانا الكلام دا وصلني لحدي هنا ومافي زول ما ماسك سيرتكم
علي قال ليهو بنهرة ياخ نحن عملنا شنو غلط ؟
_ انت آيا علي شايف العملتو صاح ما غلط لكن غيرك شايفو غلط ياخ بعدين الناس الهنا ديل ما بتقبلوا حاجات زي دي وانا ممكن اضع ليك الاعذار والمبررات بحكم انك زول صاحبي وبعرفك كويس وفاهمك على حسب فهمي ليك وبرضو مفهومي البختلف من مفهوم الناس الكبار ، لكن غيري لا ، وما بقدر حبك لمرتك وانك ما داير تتزوج فيها وانو الولادة دي قسمة ونصيب
_ انا عرس ما بعرس
_ برضو انت لازم تعذر امك وابوك لانهم دايرين يفرحوا بأولادك خاصة انت ولدهم الوحيد وما عندهم ولد غيرك فمنو البشيل الاسم حق ابوك ؟ اخواتك بعد يتزوجن اولادن لا بسموهم باساميهن ولا باسم ابوهن لانو الاولاد بشيلوا اسم ابوهم
_ ياخي امكن العيب مني انا والمرة دي ما عندها مشكلة في الولادة وامكن اللتنين ما عندنا مشكلة بس ربنا ما رايد لينا نخلف الا بعد كم سنة
_ ياخ دي كلها احتمالات ساي يا علي يا اخوي انت عاين للموضوع بمفهوم ابوك مثلا خليها امك بترضى ولدك يمشي دار الايتام يجيب ليهو بت يربيها ؟
_ انا عن نفسي برضى والله
_ دا كلام ساي عشان انت عملت كدا بس انا قلت ليك خت نفسك في مكان ابوك وفكر بنفس تفكيرو ودرجة مفهومو وابوك ما الزول المتعلم ومعرفتو مع احترامي ليك ما زي معرفتك لانو من قام ما مرق من الحة دي والعادات التقاليد الزمانك لسة متمسك بيها اما امك كلامها صاح برضو وانا عن نفسي وعلى حسب معرفتي بيهم انا معاهم وعاذرهم وانت الغلطان وستين غلطان وفي نفس الوكت انا برضو معاك على حسب ما انا بعرفك عشان كدا انا من هنا ابيت امشي معاك لبيتكم وقلت اخليك تواجه مشكلتك براك لاني لا مغلطك ولا مغلطهم وفي نفس الوكت مغلطك ومغلطهم
علي قال ليهو دي هسي يفهموها كيف ؟
_ والله صاح ، ودي مشكلة دي
_ اها الحل شنو؟
_ الحل واحد من اتنين يا تسمع كلام ابوك وتعرس يا اما تحنسهم وتقول ليهم ادونا بس فرصة تانية وانا البت برجعها وعندنا علاج ماشين فيهو كويس ان ما جاب نتيجة بعرس وحاول اقنعهم براحة برضوا
بهناك سامية فرحانة بفطوم واهلها زاتهم فرحانين بيها علا امها كانت خايفة لانها عارفة الشول ما بترضى وقالت لسامية ما كان تجي المرة دي وما كان تجيبي معاك البت دي هسي الشول تلقيها عاملة ليها شكلة لانها تورجغ وتهرج من الصباح وانا الكلام وصلني هني وقالت لراجلك الا تعرس والليلة دايرين يعقدوا ليهو علي بتول بت عمو الطيب
سامية انخلعت ولبست توبها دايرة تمشي ناس الشول لكن امها احمتها قالت ليها كراعك دي ما بترفعيها ، مالك دايرة تسوي ليك مشاكل معاهم ؟ خلينا ساكتين بعد نشوف البحصل شنو
وسامية قالت ليها انا ماشة لراجلي ما عندي شغلة بيهم وكيفن اسكت و اخليهو يعرس فيني بتول الكريهة دي ؟ انا الليلة دي بسوقو وبنرجع الخرطوم
_ لا كدا بتزيدي الطين بلة وبتزيدي النار حطب والمشكلة بتكبر
_ يعني دايراني اسكت
_ آي اسكتي وخشمك عندك لمن يجيك هو براهو هنا وللا رسلي ليهو زول يناديهو لكن اوعك تمشي ليهو في بيتهم
سامية ما سمعت كلام امها ولفحت توبها ومشت ناس الشول
