#صابر_20
مجاهد يوسف
صابر كان متأكد تماما انو شاف امو لكن زي ما قال ليهو ابوهو امو البجيبها هنا شنو الظاهر انك اشتقت ليها يا صابر اخد ليك مشية ليها وشوفها وشوف حالها كيفن مافي شي بجيبها هنا واكان جات ما عندها غيرك اكان جاتك
صابر قال ليهو انا عرفت العربية الكانت راكبة فوقها حافلة ظهرية كدا ومكتوب فوقها رحال بي وراء في القزاز انا بمشي الموقف اسعل السواق حقها واعرف دي مواصلات وين
وفعلا صابر فات الموقف ولاقى السواق وسعلو قال ليهو قبيل اكانت راكبة معاك مرة في الكرسي البجاي دا ما عارفها نزلت وين
السواق قعد يضحك وقال ياخ كم مرة ركبت معاي اليوم وانا لو راسي كمبيوتر ما بقدر اعرف واحفظ اشكال الناس ومحل بنزلو لكن فتش ليها في الحي الفلاني وللا كل يوم تعال الموقف هنا مدام ركبت من هنا مصيرها تجي تاني تركب
صابر قال ليهو بس هي ما من هنا ولا عارف الجابها هنا شنو
السواق فات منو ومشى علي شغلتو
صابر احسن حاجة تفك حيرتو دي يمشي حلة ناس ميرغني لامو اكان لقاها تكون دي شبه ساي واكان ما لقاها بعرف محل فاتت
اليوم التاني صابر قال ليهو انا ماشي لامي
ابوهو قال ليهو طيب اكان لقيتها لا جات هي ولا الشفتها دي هي بتعمل شنو
قال ليو والله يا ابوي انا لي يومين شغال افكر ساي لمن جاني صداع لانو مافي شبه كدي الا في التيمان وان شاء الله تكون ما هي ودي تومتها على الاقل امي تعرف اهلها اتعذبت شديد وشافت الما شافو زول ومافي زول ما ظلمها وعمرها ما ظلمت زول صابرة علي العليها
الفاتح سكت مسافة وقال انا اول واكتر واحد ظلمتها والسبب ابوي وامي والله انا ما كنت داير اطلقها ومن طلقتها الدنيا دي ما شفت فيها راحة لكن الواحد يقول شنو ويعمل شنو الحياة كدا يا ظالم يا مظلوم وخاصة في زمنا دا وانا زي ما ظلمتها وطلقتها عشان هي بت حرام مشيت عرست بت حلال لكن بت حرام صحي صحي مشيلاني القفة كرهت الحريم كلهن بسببها وكرهت اي حاجة وهي قايلاني طيرة ساي تعمل في الفي مزاجها وانا ساكت وشايف وعارف وصابر عليها وما صابر عليها عشان الاولاد لا لا ولا خوف من ابوها مديرنا وزاتو انا ما عارف صابر عليها لشنو وكل مرة اقول اطلقها اقول اصبر شوية ما هسي في الاخر وكل القدرت عليهو مرقت وخليت ليها البيت مرات احس باني زول ما عندي شخصية ومرات احس باني مريض نفسي ومرات اشوف روحي زي المجنون وقبال ما تجيني انت هنا الحياة دي كان ما ليها اي طعم عايشها وبس عدي يومك وكمل زمنك ما هاميني اي شي لكن انت جيت وطعمتها لي واحلى ايام في حياتي السنتين وللا التلاتة سنة ديل القعدتهن انت معاي امش يا ولدي شوف امك وان شاء الله تكون ما هي وتكون دي اختها زي ما قلت
صابر فات لقى امو قاعدة ومن الحلة ما مرقت واصلو ما وراها بالمرة الشافها في بورسودان بس قال ليها يمة انتي حصل شفتي البحر الاحمر وبورسودان ؟ قالت ليهو انا بعرف تلاتة محلات بس الخرطوم وما بعرفها كويس والحلة حقت ناس امي سامية والحلة الانا فيها دي ولا بدور اشوف غيرن
قعد معاها يومين والتالت رجع فيهو بورسودان وبقى يكوس
وكل يوم يجي الموقف يقعد فوقو لمن الدنيا تقرب تمغرب ومرات لمن تمغرب لا لقى المرة البتشبه امو ولا كل ولا مل ولا زهج
في داخلو امل وفي راسو تفكير كتير ومتفاءل جدا
عدى الشهر الاول والتاني وصابر مسوي الدرب ساساق
يوم الفاتح ابوهو اكان عيان مشوا سوا للدكتور قاعدين في الصالة حقت العيادة بعد دفعوا حق الكشف منتظرين دورهم في مرة اكانت بتعاين في صابر ساي اصلو ما نزلت عينها منو وفي نظراتها حيرة واستغراب هو زاتو لمن فكر اتعقد من معاينتها ليهو ولكز ابوهو قال ليهو المرة دي عاين ليها بتعاين فيني كيف
الفاتح ضحك وقال ليهو والله اكان نمشي نسعلها
السلام عليكم قالت ليهم عليكم السلام
قال ليها مالك بتعايني في ولدي دا كدا ؟
قال ليها مشبهاهو بولد شبه التعريفة لكن دا كبير شوية اكان قدرو اكان كوركت ليهو باسمو ياهو زاتو والله
الفاتح قال ليها يخلق من الشبه اربعين
قالت ليهو بس شبه للدرجة دي والله يحير
الفاتح ضحك وقال لصابر اها انت بتفتش للبتشبه امك اها الليلة لقينا زول شبهك انت زاتك
دورهم جاء وابوهو دخل الدكتور وصابر دخل معاهو لكن اكان مشغول شديد بكلام المرة دي وراسو بقى يودي ويجيب وقال في نفسو اي زول بقول لي بشبه امي احتمال المرة دي تكون قاصدة ولد المرة الشفتها انا زاتها ما بعيد ومرق خلى ابوهو مع الدكتور وجاء راجع للمرة ومحل فاتت المرة ما لقاها
سأل البت الكانت في العيادة قال ليها في مرة اكانت قاعدة هنا قبل نحن ندخل الدكتور ما عارفاها مشت وين قالت ليهو الكنبة دي اصلو ما بتفضى من الحريم انا ما عارفاها ولا عارفة ياتو مرة انت قاصد قال ليها لابسة توب لونو .. قبال يكلم كلامو معاها قالت ليهو ما بعرفها ما بعرفها فتش العيادات الجمبنا امكن مشت ليهن
وصابر مرق من العيادة يكوس والمرة ريحتها في الارياح مافي التقول الواطة دي انشقت وبلعتها
ابوهو مرق من الدكتور وشالو دواهم الكتبو الدكتور ليهم وفاتوا وصابر يقول لابوهو المرة ما لقيتها كلو كلو قال ليهو يا ولدي ما تشغل بالك ساي الناس دي كلها بتتشابه انا القدامك مرة سلم علي واحد وقال لي يا عبد الجليل الجابك الخرطوم شنو وقدر ما قلت ليهو انا ما عبد الجليل ما صدقني قال لي والله دا شبه غريب خلاس التقول تيمان فعادي تلقى زول بشبهك شديد
صابر قال ليهو بس المرة البتشبه امي دي انا عندي احساس انها من اهل امي
وصلوا البيت اتعشوا والفاتح نام لكن صابر كلو كلو ما نام يفكر ساي لمن الواطة قربت تصبح هو ما نام وقال مالها الدنيا دي معاكساني كدا كل ما القى لي طرف خيط وقبال ما امسك فيهو افكو وارجع تاني اكوس ليهو وما ألم فوقو
بهناك سلوى قالت لراجلها ابوالفاتح والله انا اشتهيت الفاتح ولدي حقو نمش نقعد لينا معاهو يومين تلاتة في بورسودان اهو نغير شوية ابو الفاتح قال ليها لا بورسودان لا وزعل واتضايق شديد من كلامها دا
قالت ليهو مالك هسي في شنو
قال ليها قلت ليك لا يعني لا ما تنضمي كتير
صابر بقى كل يوم يساسق مرة في الموقف ومرات في العيادة يفتش لواحدة من الحريم يا البتشبه امو يا المرة القالت ليهو بتشبه ليك ولد بعرفو
والايام جارية وتنقلب اسابيع والاسبابيع تتربع وتقفل شهر لمن تم ليهو اربعة شهور ما بطل من الساساق
لمن يوم وهو قاعد في مسطبة في الموقف داك جات المرة البتشبه امو نزلت ليها من حافلة ومن شافها ساي جرى عليها ولمن وقف قدامها قبال ما يفتح خشمو المرة شافتو ونططت عيونها وشهقت
ورجعت الحافلة اكانت معاها مرة تانية قالت ليها تعالي يا عفاف شوفي دا بشبه محمد ولدي كيف والله لو ما كبير اكان قلت هو
قال ليها انا البشبه ولدك وللا انتي الما خليتي في امي اي حاجة والله كأني واقف قدام امي بس انتي اقصر منها شوية ولونك افتح منها وفي اختلاف بسيط لكن شبه شديد
المرة ضحكت وقالت ليهو الا تمش معانا تشوف ولدي البشبهك قال ليها انا تاني بفوتك هو انا لي شهور بفتش ليك
المرة خلت السوق ورجعت مع صابر البيت عشان توريهو ولدها وهو فات معاها عشان يعرف اصلها وفصلها وبيتهم لانو الشبه دا اصلو ما شبه عادي حتى في الاولاد كمان
يتبع
