عشقى وغرامك

الفصل التاسع

فى عربية فهد
فهدبشك:متأكدة عموما ياستى الطريق لسة طويل كلمينى عن نفسك انا معرفش عنك حاجه
لين :تحب تعرف اية
فهد بهدوء :يعنى بما اننا مكملين مع بعض فاانا معرفش عنك حاجه خالص فحكيلى عنك
لين :انا لين امجد الشرقاوى اعظم مصممة ازياء فى العالم كملت ال٢١ من اسبوع عندى هوايات كتير بس اغلبها فى التايكوندوا والملاكمة الناس بتقول عنى مغرورة ولسانى متبرى منى وعندى فوبيا من الاماكن المغلقة والاماكن العليا بس
فهد بهدوء :طيب
لين بإستغراب :طيب بس ،طب قول اى حاجه احكيلى عن نفسك
فهد :عادي يالين اصل دلوقتي عرفت لية جدك اختارنى ليكى واضح انك متعبة وهتتعبينى اوى
لين :بص يافهد مانكرش انو كنت فعلا هتعبك زيادة عن طباعة اللى هيا متعبة لوحدها بس صراحة انا مش حبا كدة اية رايك لو بقينا اخوات واصحاب
فهد بصلها وبعدها رجع تانى يبص للطريق :حلوة صراحتك على فكرة يعنى بتعترفى انك هتتعبينى
لين بخجل :هااااانا مش بحب اكذب فبجد فكر فى عرضى على الاقل هنتخلص من العند ومعظم المشاكل اللي هتبقى بنا
فهد ببرود:ماشى اصحاب ممكن لكن اخوات لا انتى مراتى ولازم تحطى دا فى دماغك يعنى فى تصرفات كتير لازم تراعيها
لين بزعيق :نعم يااخويا انت هتتحكم فيا ولا اية
فهد ببرود :صوتك ميعلاش عليا بحب الدقة والنظام بكرة الفوضى واة هعاملك بهدوء فى الفترة الاولى لكن مش هفضل كدة كتير لازم تعرفى امتى بتعصب امتى بهدى اية اللى بحبة واية اللى بكرهة فمش هصبر عليكى كتير لازم تتعلمى دا كلة بسرعة
لين خافت من كلامة وافتكرت كلام ياسو ان كل الرجالة متحكمين فما بالك بصعيدى للحظة اتمنت ان دا كلة يبقى حلم وترجع تانى لحياتها الوردية وشغلها لكن لحظة هى فعلا كانت حياتها وردية ولا كانت بتهرب من حياتها بشغلها..فضلت تفكر فى افكار كتير فى حياتها وازاى هى كانت كرهاها على الرغم من شغلها وسفرها وحفلاتها لكن اكتشفت ان دا كلة مجرد قناع بتستخبى وراء لدرجة انة لو اتخيرت بين الموت وحياتها مش هتحس انو فى فرق بينهم وانها لسة ملاقتش حاجة تتمسك بيها فى حياتها..بعد صراعها مع نفسها فاقت على كلام فهد
فهد بهدوء :انا عارف انو خوفتك منى بس مش انتى بس اللى طباعك صعبة وانتى كنتى صريحة معايا فحبيت اكون صريح معاكى عشان تعرفى انتى داخلة على اية ،وبص للين لاقاها مغمضة عينيها
فهد بقلق  :لين انتى كويسة تعبانة فى حاجه ،ولما ملقهاش بترد قلقة زاد عليها  فاابتدى يمسح على راسها :اسف متزعليش منى انا دبش كدة علطول
لين بدموع :قدامنا كتير على مانوصل
فهد :لا خلاص قربنا ،حقك عليا بقى متزعليش كدة
لين بعدت ايدة من على راسها وادارت وجهها للناحية التانية ناظرة من الشباك
فهد اضايق من حركتها فكمل سواقة من غير ولا كلمة
****************"*"****""***********
فى عربية ليث
ليث وروح كانوا نايمين وفضل عزيز وليان يكلموا ويضحكوا مع بعض
عزيز بضحك :بس كدة ياستى عرفتى كل حاجه عنى  يالا بقى احكيلى عنك
ليان :يعنى حياتى الى حدا ما مملة مش مشوقة زيك
عزيز :حتى لو يهمنى اعرف كل حاجه عنك
ليان : انا ليان كملت ٢٣امبارح بشتغل مترجمة فورية فى شركة انترناشونال ناس كتير بتقول انو هادية لدرجة انو شخصيتى ضعيفة مش زى لين
عزيز بإبتسامة :بس عجبانى ودا كفاية ولا اية
ليان بخجل :شكرا على الهدية بس مكنتش ضرورية
عزيز :لا ازاى لازما كان المفروض ادهالك بنفسى بس حبيت انك تاخديها فى يوميها المهم عجبتك
ليان بإبتسامة :اة طبعا عجبتنى جدا تسلم ايدك
عزيز :تسلمى من كل شر انبسطت انها عجبتك
ليان بتعب :احنا قدامنا كتير انا تعبت اوى وعاوزة انام
عزيز :لا خلاص على وشك اهو انو نوصل
بعد حوالى ١٥دقيقة وصلت عربية ليث وفهد
عزيز بزعيق :اصحى ياليث وصلنا
ليث بنوم :بطل زعيق يالا ،صحى روح ونزلوا لاقوا فهد واقف قدام عربيتة وجمبة لين
عزيز بهمس :شكل فهد هيعلم علينا النهاردة عينية بطق شرارة
ليث بضيق :شكلها كدة
فهد بغضب :ليث كنت بتعمل اية جمب روح وراء مش مكانك قدام
ليث بخنقة :فهد فى اية دى خلاص بقت مراتى بلاش الغيرة الزايدة دى خليها لمراتك
فهد شد ايد روح تقف جمبة وعزيز وليان ولين واقفين مزهولين
عزيز بهمس ل لين سمعة فهد:ربنا يعينك فهد متخلف فى حكاية الغيرة دى
فهد بزعيق وغيرة :عزيز اتلم وابعد عنها وشدها مسك ايدها هى وروح ودخلوا البيت وفضل ليث متعصب برة وعزيز وليان يضحكوا
ليث :بتضحكوا على خيبتكوا
عزيز بضحك:ماهو مقدرش على الحمار قدر على البردعة
ليان بخجل :واللة ياليث مش بضحك عليك انا بضحك على لين اللى كانت واقفة شبة الكتكوت المبلول اول مرة تبقى مسالمة كدة
ليث :يابنتى حتى لو بتضحكى عليا عادى انتى مرات اخويا واختى الصغيرة وفعلا شكلها صعب عليا ربنا يعينها على مابلاها
عزيز :ياعم خليك في نفسك مش هيسيبلك روح
ليث بضيق :واللة ماعارف طالعى فى البخت طول عمرة ومش مخلينى اجى ناحية البت 
ليان بتفكير :انا عندى فكرة بس مااعرفش هتظبط ولا لا اية رايك ياليث تكلم لين انو تشغل فهد عنك انت وروح
ليث :تصدقى فكرة بردوا اهى على الاقل تشغلوا شوية عنى ،عجبتينى يالولو شكلنا هنعمل دويتو مع بعض
عزيز بغيرة :لاشكرا ياخويا خلصنا ،وشد ليان ودخلوا البيت
ليث وهو بيضرب كف على كف:ياولاد الهبلة ،اما ادخل انا كمان
************************************
فى داخل البيت
فهد كان ماسك ايد روح ولين بتملك ولاقى ابوة وامة واعمامة وجدة قاعدين بيبصولة بإستغراب
فهد سابهم وراح حضن مامتة :وحشتينى ياامى
اميمة بحنان :وانت اكتر يابنى
زيدان بغيرة :ماتتلم ياولد يعنى شحط وتحضن فى مراتى
لين بهمس لروح:انا كدة عرفت فهد جايب الغيرة منين
روح بهمس :صراحة فهد اصعب من بابا فى موضوع الغيرة دا
لين بصتلها وقلقت
سماح وهى خارجة من المطبخ :وحشتنى يافهد
فهد وهو يحتضنها :انتى اللى وحشتينى ياقمر
طة بضحك :انت مقدرتش على امك جاى تحسن مراتى ولا اية
فهد بضحك:فى اية ياجدعان وحشونى بطلوا اللى الغيرة دى بقى
الجد بضحك :قول لنفسك ماانت لسة جاى وساحب مراتك واختك
فهد وعينية اتحولت لشرارة:محدش يدخل بين علاقتى انا واختى او انا ومراتى
اميمة ضربتة بكتفة :بطل رغى وتعالى عرفنى على مراتك ،وراحت للين :انتى لين مرات ابنى مش كدة
لين بإبتسامة :اة ياطنط انا لين
اميمة حضنتها :انا اميمة ام فهد وروح بجد مبسوطة انو خلاص بقى عندى بنت كمان فبطلى تناديلى طنط وقوليلى ياماما
لين بإبتسامة :وانا مبسوطة اكتر انو قابلت حد زى حضرتك
سماح بهزار :خلصونا بقى ياجدعان يالا يااميمة عشان اسلم عليها ،راحت للين:بصى بقى انا مرات عمك طة
لين:اهلا ياطنط اتشرفت بمعرفتك
سماح بضحك:شكلها فعلا بكاشة ياعمى بس حلوة خلى بالك منها يافهد
فهد بإبتسامة :مش عارف لية حاسس انها هتاكل منى الجو
لين بهزار :لا متقلقش كل حاجه ملكك هاخدها فبلاش الغيرة دى
فى الوقت دا دخل عزيز وهو ماسك ايد ليان
عزيز بإبتسامة :مساء مساء ياجودعان
الجد :ياواد اتلم انت دلوقتي مسؤول عن واحدة يعنى اكبر والعقل
عزيز بإبتسامة :عادى بقى ياجدى هى هتتعود
امجد بإبتسامة :من ناحية هتتعود ف ليان جدعة وطيبة وهتستحمل
لين زعلت وادارت وشها لانها عارفة انها لو بقيت شايفاهم هتعيط على الرغم من ان ليان بتحسدها على اجتماعيتها وشخصيتها بس لين بتحسدها على قربها من والدها ف لين كانت دايما مقربة من والدتهاومن بعد ما والدتها اتوفت وهى حاسة بعقدة نقص بس مع كدة ابوها كان علطول بيفضلها بس كان بيضايق من طباعها (ناس كتير بتقول ان الغيرة وحشة بس فى غيرة بناءة او هادفة دى مطلوبة فى حياتنا عشان نبقى احسن ودا مش انا اللى بقولة دا متخصصى فى علم النفس هما اللي بيقولوا كدا فغيرة لين وليان مش الغيرة اللى بتودى للكرهة بس غيرة انو كل واحدة فيهم عايزة تبقى الاحسن يعنى ليان حبا شخصية لين جراءتها فى انفعالاتها كلامها بتعمل اللى فى دماغها اما لين حبا شخصية ليان الهادية الخجولة اللى مبتقدرش تعبر عن اللى هيا عايزاة يعنى المضحية بصفة اعم حبا تكون الشخصية دى عشان الناس كلها تحبها)
فهد حس ان لين ممكن تكون بتغير من قرب امجد لليان 
زيدان بهزار :فين الغداء ياستات البيت لاكدة مينفعش التأخير دا
اميمة :ثوانى ويكون الاكل اتحط على السفرة ،ودخلت المطبخ
لين لسماح: هاجى اساعدكوا ياطنط
سماح بترحاب :تعالى واهو اعرفك على البيت بالمرة ،وخدتها هى وليان وروح ومشيوا
الجد :يالا ياواد منك لية خدوا الشنط ودوها على فوق وغيروا هدمكوا وتعالوا
امجد :انا كمان هطلع اغير هدومى وهنزلكوا
الجد :ماشى ياامجد اوضتك زى ماهيا حضر جلباب عشان احتفال بليل هنعزم رجالة و ستات البلد عشان احتفالية زواج الولاد
امجد :هى لسة العادة دى موجودة ،ماملهاش لازمة هما كدة كدة كتبوا كتابهم
الجد:لالازما عشان البلد كلها تعرف بزواجهم عشان ميحصلش مشاكل قدام
فهد :طب ياجدى لو جت عيلة الهوارى
الجد بغموض :اهلا وسهلا بيهم يابنى احنا من امتى بابنا مقفول لحد
ليث :بس ياجدى هما هيجوا ناويين على المشاكل
الجد بعصبية :وانت خايف من المشاكل ولااية ليث انت حفيد الشرقاوى يعنى فى وقت المشاكل تنسى جو انك محامى ومتعلم عشان تقف قصاد اللى قدامك وانت ياعزيز عاوزك تنسى شوية جو الضحك والهزار دا احنا داخلين على حرب معاهم ومن الممكن ان يكون فيها دم
امجد بقلق :بس ياابوى انت مفهمتنيش كدة انا كدة بناتى فى خطر من وجودهم هنا
الجد بغضب:امجد قولتلك قبل كدة انو حفيداتى اهم منكوا كلكوا يعنى مستحيل اخلى حد يقرب منهم وبعدين هما دلوقتي مش فى رقابتك فى رقبة رجالتهم
امجد :ياابوى افهمنى انا بخاف على بناتى ومش هستحمل انو واحدة فيهم تتجرح مابالك بااللى انت بتقولة دا
الجد :خلص الكلام اطلع اوضتك وحضر نفسك
امجد وهو طالع كان فهد فى وشة ففهد وقفة :متقلقش ياعمى بناتك فى رقابتنا ومش هنسمح لحد  انة يفكر بس يمسهم بإذى ،راح امجد ربت على كتفة وطلع اوضتة
************************************ خلص البارت
اية رايكم ؟
ياريت تعملوا فوت للبارت لان الرواية جديدة عشان توصل ❤❤
بجد بشكر الناس اللى دعمانى وبتشجعنى كل بارت والقصة مش انكوا تعملوا فوت او كومنت بس لما بشوف حد عاملة فوت او كومنت بتبسط جدا وبحس بإهتمام انو تعبى فى كتابة البارت مراحش على الارض فاستمروا❤😘