عشقى وغرامك

الفصل ١٩

فى نهار تانى يوم من رحلتهم استيقظ فهد على صوت رنة تليفونة ففتح عيونة بضيق لاقى تليفونة بيرن ولين نايمة على دراعة فمش هيعرف يقوم فااستلقى على ضهرة واتكلم
فهد بنوم:نعم ياليث
ليث بضحك :طب قول صباح الخير الاول
فهد بنوم وهمس :عاوز اية ياليث
ليث بضحك :طب بتتكلم بشويش كدة لية
فهد بغيظ :لين نايمة اخلص عاوز اية
ليث بهزار :اللة يسهلوا ياعم شكلك مقضيها طول الليل طب قلى سبع  ولاضبع 😂😂
فهد بسخرية :لية ياخويا انت مفكرنى زيك من اول يوم وانت معلم البت ومش عاتقها ولاعاتق نفسك وبعدين خليك فى حالك انت بتتصل لية
ليث بضحك :اللة اكبر فى عينك بطل الغيرة دى عندك مراتك المفروض تعيشوا احسن ايامكوا مع بعض بزمتكوا اللى يشوفكوا يقول ان انتوا لسة عرسان جداد يابنى اخلقوا ذكريات مع بعض
فهد وهو مسلط نظرة على لين:ماانا قررت اعمل كدة
ليث:احسن قرار عموما صحيها بقى واجهزوا انا حجزت حمام سباحة
فهد :طب اصبروا اما نفطر الاول
ليث :متقلقش انا مظبط كل حاجه حتى الهدوم والفطار كل حاجه جاهزة اجهزوا بس لان عزيز وليان عندى فى الاوضة خلصوا بسرعة بقى
فهد :حاضر ،وقفل ،وابتدا فى تقبيل لين على وجهة وشفتيها وعنقها
لين بنوم :بطل ازعاج يافهد سيبنى انام
فهد بإبتسامة :بطلى نوم دى ايامنا المفروض نعيشهاقومى بقى خلينا نخرج
لين شدتة ونامت على كتفة :لما انام يافهد
فهد فاجأها بحملة لها :خلاص اغرق بقى
لين بصريخ :لا والنبى يافهد نزلنى بطل الرخامة دى
فهد بضحك على شكلها:خلاص اهدى هنزلك بس تجهزى بقى بسرعة
لين :حاضر نزلنى بقى
فهد وهو يقبل وجنتها :حاضر ،صباح الخير ياقلب الفهد
لين بإبتسامة :شكل اللقب دا عجبك
فهد بحب:اوى ،ويالا بقى بدل مانفضل هنا طول اليوم ،خرج
بعد فترة جهزوا الاتنين وراحوا لاوضة ليث
ليث :ادخلوا اتأخرتوا كدة لية
فهد :لا مش مهم نادلهم يالا عشان منتأخرش
ليث :طيب ،دخل
فهد بهمس ل لين :حبيبتى زى القمر النهاردة
لين بإحراج :وانت كمان قمور ،واسكت بقى
فهد قعد يضحك على شكلها وفى نفس الوقت خرجوا لاقوة بيضحك فإستغربوا
عزيز :غريبة الفهد بيضحك
ليث بخبث :بركاتك يالين
فهد بجدية :طب يالا ياخفيف منك لية ،واخد ايد لين ونزلوا اما الباقي فضلوا يبوصوا لبعض بإستغراب ومشيوا وراهم لحد وصولهم لقاعة السباحة
ليث :دلوقتي احنا وصلنا فية حمام جواة مجموعة حمامات تقدروا يابنات تدخلوا وفية لبس جوة ياريت يتلبس لو هتنزلوا الماية تمام
روح :طيب ياليث ودخلت هى والبنات
فى الحمام روح وليان مسكوا لين
روح بفضول :ها احكيلنا
لين بضحك :احكى اية
ليان بخبث :سر الضحكة دى يالا بقى خليكى جدعة
لين بضحك :طيب دا انتوا فضوليين وحكتلهم على كل اللى حصل امبارح
روح بصدمة :اخويا عمل كدة
لين :انتى لية محسسانى انو اخوكى هولاكو
روح :يعنى بس اول مرة اعرف انو بيحبك اوى كدة
ليان بفضول :ازاى يعنى
روح :اصل فهد طول عمروا جامد وكدة عمروا ماسمح لحد انو يشوفوا ضعيف بس انو يبين ل لين ضعفة كدة معناها انها حاجه جامدة عندة
لين بإبتسامة :ومن غير تفسيراتك العميقة دى انا واثقة فى الحب اللى بشوفوا فى عيونة
ليان وروح بهزار :تيرارا واية كمان
لين :يالا ياباردة منك ليها ،بت ياروح اية لبس الضفادع اللى جوزك جايبة دا
روح بغيظ :متفكرنيش  دا عشان مش هنبقى لوحدنا هما اة بيثقوا فى بعض بس عندهم غيرة تهد جبال
ليان مكملة :وعشان كدة ليث ربط على الهدوم دى وعزيز اتفق معاة انهم ينزلوا بتشيرتات عشان ميبقاش فية احراج
لين :طب خلاص البسوا انتوا انا كدة كدة مش هنزل
ليان :لا البسى انتى كمان محدش ضامن الظروف عشان هدومك متتبلش وانتى معاكيش غيرها
روح :وانتى مش هتنزلى لية فى حد يقول لا للعوم
لين :انا مبعرفش اعوم ،يالا بقى عشان زمانهم خلصوا ،خرجوا كلهم
عزيز :تعالوا بقى افطروا وبعدين ننزل براحتنا
لين بهزار :بس انا شايفة ان الفطار فية كل اللى نحبة
عزيز بضحك :ياستى انت تؤموروا عشان متقولوش حارمينكوا من حاجه
فهد بغيرة :طب تعال افطر يازفت
عزيز بخبث :غيور انت دا اختى الصغيرة يافهود
لين بإبتسامة :طب يالا لاحسن واقعة من الجوع ،وابتدوا ياكلوا تحت ضحكاتهم وهزارهم
روح بحماس :يالا بقى ننزل الماية
ليان :انا كمان هموت وانزل الماية بقالى كتير معومتش
ليث :خلاص يالا ،انتى كمان يالين يالا
لين:انا بخاف ومبحبش السباحة فخد فهد واستمتعوا
فهد :اية خد فهد دى انا مش هنزل من غيرك
ليث :بس كدة مش هنستمتع طب مقولتيش لية يالين ونلغى الفكرة دى
لين :ونلغيها لية انت مش شايف روح وليان وعزيز مستمتعين ازاى لدرجة انهم سابوك ونزلوا وانا هستمتع وانا بتفرج عليكوا وانت يافهد بجد هزعل لانى مكتفاك انزل استمتع معاهم
فهد :طب وانتى
لين بمرح :هقعد على الحافة وانزل رجلى فى الماية وكدة كأنى معاكوا
ليث بغيرة :طب يالا احسن عزيز واخد الجو
عزيز بصوت عالي :سامعك ياغيور خلصوا بقى وانزلوا
ليث نزل وفهد شال لين ونزلها بالعافية
لين وهى تتمسك برقبة فهد:لا يافهد انا بخاف
ليان بتشجيع :ايوا كدة يافهد هيا مش هينفع معاها الا كدة
لين بصريخ :اخرسى ياجزمة ،نزلونى
فهد بضحك :ودنى يخربيتك ،وبعدين اهوة ونزلها
لين وهى بتتشعلق فى رقبتة :لالا متسبنيش يافهد هغرق وهموت وهخلى روحى تمرمطك
الكل انفجروا فى الضحك عليها وفهد فضل ماسكها
لين بغيظ :واللة لاوريكوا انتوا كمان اطلع بس من هنا فهد امسكنى عدل بدل مااغرق
عزيز بضحك :لابجد مش قادر يابنتى اتهدى ماهو الواد ماسكك اهو فكى ايدك من على رقابتة هيتخنق منك ويموت فى ايدك
لين بشراسة :بعد الشر عنة ان شاء الله اللى يكرهوة
ليث وعزيز بصفير :اللة يسهلوا يافهود
فهد بإبتسامة :بطلوا قر دا انا وهيا خناقتنا اكتر من صلحنا وبهمس ل لين :بحبك ياقمرى
ليث بصدق:لامتقلقش مش هنقر لانوا بنتمتالك الخير
فهد بإبتسامة :طب هنعمل اية دلوقتي
عزيز بضحك :ياعم نزل بس اللى متشعلقة فى رقابتك دى هتموت مخنوق لين انتى مكلبشة فية كدا لية ،
فهد بحب :سيبها هيا لما هتتعود هتسيب رقبتى
ليان :خلونا نتسابق
روح :لاخلونا نلعب بالكرة
ليث:خلينا نتسابق الاول ياروح لحد مالين تاخد على الماية ونلعب بالكرة
الكل :طيب ،وابتدوا يتسابقوا ويضحكوا مع بعض وسابوا فهد ولين
فهد بحنان ل لين :واثقة فيا يالين
لين :اة بس متقوليش سيبى ايدك
فهد :طب حاولى ،انا لايمكن اسيبك
لين شالت ايديها من على رقبتة ولاحظت ان فهد محاوطها وساندها على صدرة
فهد :شفتى بقى انك مش مضطرة تمسكينى لانى عمرى ماهسيبك
لين بإبتسامة :انت فهدى الحلو
فهد بإبتسامة :طب بلاش بقى الكلام دا بدل مانتمسك اداب هنا اخواتى واطيين ويسلمونى تسليم اهالى
لين بضحك :وروح وليان مش احسن منهم دول فضيحة ،وابتدوا يتكلموا هى وفهد مع مشاكسات فهد الجريئة التى لم تعهدها منة وحبة الظاهر وبعد فترة انضم لهم باقى الشباب وقضوا كل يومهم فى السباحة
***********************************
اما عند امجد فقد اعتزل غرفتة وذكرياتة القديمة تداهمة ولذلك تذكر اخر كلامة مع اهلة
فلاش بااااااك
امجد خرج من غرفة هدى بعصبية لاقى العائلة قاعدة فرمى قدامهم دفتر مذاكرات هدى
امجد بعصبية :للدرجادى بتكرهونى وبتفضلوها
الجد :عصبيتك بتدل انك عرفت
امجد :اة عرفت عرفت انكوا مخبين عليا معملتوش حساب انو لازم اعرف
طة :طب اهدى بس ياامجد وانا هفهمك
امجد بحسرة: تفهمنى اية تفهمنى ان ابنى شايفك انت ابوة وانى مجرد عم لية ولاتفهمنى انتوا لية خبيتوا عليا ولاتفهمنى انكوا زى العادة حبين تظلمونى بجد انا مش عارف انتوا بتعملوا معايا كدة لية كل دا عشان محبتهاش
الجد بعصبية :ولما انت اخترت اللى بتحبها لية معدلتش بنهم لية فرقت لية حسستها دايما انها ملهاش اى مكانة فى قلبك
امجد :يعنى غلطتى انو صارحتها انى مستحيل احبها لية بتعاقبونى كدة انتوا عارفين ان مراتى هيا اللى كانت فى قلبى طول عمرها
الجد بتنهيدة :عاوزنى اعمل اية دلوقتي
امجد بسخرية :لا ولا حاجه عاوزنى انو اعرف انى ليا ابن بقى بطولى وميعرفش عنى حاجه واسكت صح
الجد بعصبية :اتكلم عدل ياامجد انت نسيت نفسك
امجد بحزن :مش كفاية فرقتنى عن حبيبتى زمان محطتش فى بالك انك بتفرقنى انا وابنى عشان خاطر الست هانم خليتنى اعيش فى ذنبها طول عمرى
الجد :هيا خلتنى اوعدها قبل ما تموت مكنش ينفع اقولك
امجد :طب وانت يازيدان محطتش نفسك مكانى ولاانت ياطة محستش بالذنب وانت بتخطف ابنى وتسجلوا على اسمك طب ابوكوا عمروا ماحس بيا انتوا محستوش بأخوكوا بجد انا مش مسامحكوا على القهر اللى بتعيشوهولى ،وخرج لاوضتة
باااااااااااك
امجد لنفسة :بجد مش عارف اقول عليكى اية ياهدى بس ربنا يسامحك على اللى بعيشوا بسببك
الجد خبط على الباب ودخل :ممكن ادخل
امجد :ماانت دخلت يابابا
الجد وهو بيقعد جمبة :على فكرة ماتغيرتش نفس طباعك الصغيرة تحبس نفسك وتتمنع عن الاكل
امجد بضيق :حتى طباعك انت كمان ماتغيرتش علطول بتجرح قلبى
الجد بحزن :حقك عليا انا عارف انو جيت عليك كتير بس انت عارف انا كنت بحب هدى بنت عمك ازاى وان انا اللى مربيها كنت بتمنهالك دايما
امجد :بس قلبى كان بيتمنى غيرها
الجد :انسى اللى فات ياامجد وبلاش تفتح جروح قديمة وان كان على ليث ف أنا كنت ناوى اكلمة عشان لااظلمة ولااظلمك بس متنساش انة طة وسماح هما اللى ربوة يعنى مش هيستغنى عنهم وانت غلط فى اخوك لما قولتلوا خطفت ابنى وسجلتوا على اسمك
امجد بتعب:انا تعبان اوى قولت خلاص قلبى هيرتاح طلع مكتوبلى التعب والبعد دايما
الجد :خير قوم بقى عشان نتعشى مع بعض وسيب الموضوع دا لما الولاد يرجعوا من السفر
امجد :حاضر ،ونزل مع ابوة لاقى الكل قاعد على السفرة مستنينهم فراح قبل رأس طة :حقك عليا ياطة بس كنت متنرفز
طة بزعل:انت اللى حقك عليا يااخويا كان المفروض احس بيك وموافقش على اللى حصل
امجد:اللى حصل حصل ياطة سيب الموضوع للايام
وبعد فترة خلصوا اكل وراحوا قعدوا مع بعض شوية
وبعدها طلع كل واحد لاوضتة للنوم
************************************
اما عند الشباب فكان كل يومهم فى صالة السباحة لحد ماتعبوا وغيروا هدومهم وطلعوا لاوضهم للنوم
*********"*************************
وهكذا عدت الايام على الشباب بين الفسح والخروج والتسوق وكان كل يوم بيعدى على فهد ولين بيقربوا لبعض اكتر وهكذا باقى الشباب وكانت العائلة دائمة الاطمئنان علية وبعد ماقضوا فترة الاجازة الخاصة بهم رجعوا للبلد قبل اليوم المحدد لمفاجئة العائلة
***********************************
فى البلد
رجعوا الشباب والكل اتفاجئ بيهم وكان الجو كلة ضحك وهزار لحد ما الجد اخد ليث وطة وسماح المكتب لانة حس انوا ظلم امجد كل السنين اللى فاتت دى فقرر انو يفاتح ليث علطول
فى المكتب
ليث بهزار:ماهو اكيد موحشتكوش للدرجادى البت روح هتيجوا تخنقكوا عشان خدتونى منها
الجد :ليث بطل هزار انا عاوزك فى موضوع مهم
ليث بقلق :خير ياجدى
الجد بص ل طة وسماح وبعدها حكالة كل حاجه
ليث اتصدم وسكت فسماح وطة قلقوا علية
طة :ليث انت كويس
ليث بجمود: وحتى لو هيا قالتلكوا تعملوا فيا كدة تنفذوا انتوا مظلمتهوش هو بس لا ظلمتونى انا كمان لما خبيتوا عليا ياريتكوا ماكنتوا قولتولى ،خرج جرى على برة ووقف قدام امجد
ليث بسخرية :انت ولاحاجة بالنسبالى فاهم
لين بغضب :اتكلم باحترام مع بابا ياليث انت ناسى انو عمك
ليث بسخرية :لاوانتى الصادقة ابويا وانتوا اخواتى ،انا بس عاوز اسألة سؤال انت جرحتها لما حبيت واحدة غيرهاوهى جرحتك ببعدى عنك استفدتوا اية بقى من كل دا
لين :انت كداب الكلام دا مش صح بابا مكنش فى حياتة غير ست واحدة وهى ماما
امجد بغضب :لين اتكلمى مع اخوكى الكبير عدل
لين بصدمة :يعنى كلاموا صح وانت كنت بتخون ماما
امجد :لين بطلى غباء مامتة كانت مراتى قبل مااتجوز مامتك
ليث بسخرية :يعنى كنت بتخون امى انا
امجد :ليث الموضوع مش كده واظن جدك وعمك حاكولك
ليث:انى عم واللة مابقى معروف مين الاب من مين العم
امجد :افهمنى ياليث انا لسة عارف مبقاليش كام يوم
ليث :متتوقعش منى انى اقبلك على الاقل سيبها للوقت ،يالا ياروح واخدها وطلعوا اوضتهم
فهد وهو يتخلى عن صمتة :يالا احنا كمان يالين ،اخدها وطلعوا لاوضتهم
وعزيز عمل نفس النظام والكل طلع لاوضتة ليرتاحوا من اليوم الصعب دا
************************************
البارت خلص
اية رايكم ؟
ياريت ياجماعة الكل يتفاعل عشان الرواية لسة جديدة صراحة انا عارفة انو البارت دا مش متقن وانا مكنتش عاوزة انزل اصلا لانى مضايقة من التفاعل 😔انا كل يوم بنزل والبارت بيعدى ٦٠٠قارئ بس التفاعل قليل جدا ولا يذكر بعدد القراءانا لاعمرى حطيت شرط فى عدد الاصوات عشان انزل البارت الجديد ولا انا قولت مرة اللى مش هيصوت للبارت ميقرأهاش لان دا مش طبعى انا ممكن اقول مثلا الرواية وحشة او مش محبوبة لو عدد القراء قليل انما عدد قراء كل بارت بيزيد فلية مبتحاولوش تدعمونى💔😔

اما الناس اللى انا عرفتها واتعرفت عليها من الرواية ودايما بيدعمونى ويشجعونى بجد الناس دى فى قلبى ومميزة جدا عندى وتسلمولى ❤❤