صراع إمرأتان

الفصل الأول

*****ليساء تحكي*****

فتحت عينيا الصباح على صوت الرافاي مقلب الحالة...رميت يدي طفيتو و جيت قاعدة على السرير...تجبدت مليح و انا حاطة يديا في راسي نحك في شعري..كي كملت صوطيت من فوق السرير و جريت للدوش لي عدنا في الدار...دخلت ضربت فيها دوش و توضيت...و لبست بيجاما خفيفة باسكو الدنيا صيف و خرجت نمشي في الهول و انا نشف في شعري بسربيتة(المنشفة)...غير دخلت لشومبرتي قستها فوق السرير و رحت هزيت حوايجي تاع الصلاة و حكمت الطريق لشومبرة كنزي الغالي في هاد لحياة...فتحت لباب غير بلعقل و وحدي تبسمت كي لقيتها قاعدة كي العادة فوق السجادة و بين يديها لمصحف تقرا فيه...دخلت نمشي غير بلعقل باش مانديرونجيهاش...لبست حوايجي تاع الصلاة و رحت فرشت سجادتي حداها و قعدت..هزيت لمصحف نقرا فيه انا تاني حتى أذن الفجر الثاني...ستنيناه كمل و وقفت انا و هي صلينا مع بعض..غير كملنا خزرت فيها ديراكت و صوطيت عليها نحضن و نبوس حتى طيحتها...رجعت هي في الارض و انا فوقها....

ليساء:صباحو يا احلى ام في العالم

ماما:صباحو يا احلى بنت في العالم

قالتها و هي تجبدلي في خدودي بيديها و تضحك...كي كملت حكمتلها يديها بستهم و نضت عليها و عاونتها تنوض...

ليساء:حابة برك نعرف كيفاش دايما تسبقيني و نلقاك فايقة ياك راني نبكر فوق اللازم غير باش نلقاك كاش نهار راقدة

ماما:ههههههه يا بنتي من صغري و انا كي يجي وقت معين نفتح عينيا و يطيرلي الرقاد مانحتاج رافاي مانحتاج ناس تفيقني و نتي جيتي بين ليلة و نهار حابة تسبقيني

كنت نمشي انا وياها خارجين من شومبرتها بعد ماجمعت هي سجادتها و هزيت انا سجادتي بين يديا مرجعتها لشومبرتي و نحكيو...

ليساء:يعني مام انا كي يجي واحد لوقت نلقى روحي توالفت نفيق في وقت معين؟

ماما:ان شاء الله

ليساء:مادام هاكدا خلاص ماراحش نزيد نزعف كي نلقاك فايقة قبلي ههههههه

ماما:هههههه مهبولة

ضحكنا و هي راحت نيشان جازت لشومبرة صغيرة كاينة في دارنا و أنا دخلت لشومبرتي حطيت السجادة و خرجت رحت للكوزينة نوجد القهوة كي العادة...

أنا و ماما عايشين وحدنا في هاد الدار الصغيرة...فيها الريتشوسي برك...كي تدخل مع لباب تلقى على يمينك صالون صغير مفتوح...و على يسارك الدوش و توالات حاشاكم...تزيد تمشي تلقى شومبرتي و اون فاص ليها الكوزينة...و قدام شومبرتي كاين شومبرة ماما و اون فاص ليها الشومبرة الصغيرة لي دخلتلها درك...و عند لباب برا حاطين مرجيحة صغيرة في وسط الجاردان تاعنا لي زارعة ماما نصها بالخضرة و الفاكهة و انا زارعة النص الاخر بالورد...يعني دارنا صغيرة ماراهي شابة تهبل ماراهي قديمة و مبهدلة..قيسنا قيس روحنا...