طريقنا نحو الجنة

ليه الموسيقى والأغاني حرام؟!

البنت الى كانت بتقول عاوزة تبطل أغانى ،
اقرأي المنشور دا هيفرق جدااااا عن تجربة 💙👍

ليه الموسيقى والأغاني حرام؟؟!

من خمس سنين تقريبا لما بطلت اسمع اغاني عشان حرام ماكنتش عارف هي حرام ليه .. ايه المشكلة لما اسمع صوت كام آلة شغالين مع بعض ويعملوا صوت حلو مع شوية كلام بيتقال بلحن معين يمشي مع الموسيقى دي؟؟  يمكن مثلا كلام الأغاني هو اللي عامل المشكلة عشان كله بيكون حب وعلاقة وبتاع؟! بس انا بسمع بس يعني اكيد مش بطبق اللي بيتقال دة ومش بيدخل دماغي !
المهم أسئلة كتير مالهاش إجابة ظاهرة بس في الآخر هي حرام .. سيدنا محمد صلى الله عليه وسلم قال "ليكونن من أمتي أقوام يستحلون الحر والحرير والخمر والمعازف" رواه البخاري .. سيدنا محمد في الحديث دة وفي كذا حديث تاني حرم المعازف تحريم صريح مافيهوش جدال .. فقدامي حاجة من اتنين ياهطيع يا هعصي .. ففي حديث تاني بيقول  ( لا يؤمن أحدكم حتى أكون أحب إليه من والده وولده والناس أجمعين ) رواه البخاري ومسلم .. اكيد حبي للأغاني مش هيكون أكبر من حبي لأبويا وامي ولسيدنا محمد اللي هعصي كلامه عشانها
والآية اللي في سورة النساء اللي بتقول ( مَنْ يُطِعِ الرَّسُولَ فَقَدْ أَطَاعَ اللَّهَ وَمَنْ تَوَلَّى فَمَا أَرْسَلْنَاكَ عَلَيْهِمْ حَفِيظاً )
واللي في سورة النور : (فَلْيَحْذَرِ الَّذِينَ يُخَالِفُونَ عَنْ أَمْرِهِ أَنْ تُصِيبَهُمْ فِتْنَةٌ أَوْ يُصِيبَهُمْ عَذَابٌ أَلِيمٌ)

يعني عشان اختار الأغاني يبقى هعصي المبعوث رحمة للعالمين ومش هيبقى أحب إلي من الأغاني ومش هبقى مؤمن وكمان هستنى فتنة تصيبني وعذاب أليم يجيلي !!
فخلاص من غير تفكير اكتر من كدة قررت مش هسمع اغاني

المهم فات خمس سنين اهو ووصلت لمرحلة اني مش عارف اسامي المغنيين اصلا ومش حافظ غير كام اغنية قديمة من اللي كنت بسمعهم زمان وكانت هي دي كدة علاقتي بالأغاني

لحد من شهر فات لما حصلي كذا مشكلة وكنت متضايق جدا ولازم اغير جو وواحد صاحبي قالي يلا نكلم أصحابنا و نطلع اسكندرية يومين
قاعدين في العربية فييجي واحد يمسك ال aux ويشغل اغاني .. وانا عايز اغير جو بقى فماقلتش حاجة (على غير العادة 😂) كان احساس غريب جدا بصراحة ماحسيتوش بقالي زمان .. كنت مبسوط بطريقة غريبة وانا بسمعها والعيال بتغني وترقص جنبي وانا مستغرب نفسي ازاي سايبهم مشغلين الأغاني بس فيه حاجة جوايا بتقولي اسكت بقى افرح شوية ! .. وفضلنا على كدة طول اليومين

لما رجعت البيت بقى الموضوع كان حلو وعايز ارجع اسمع اغاني تاني وحفظت كام اغنية وبتاع .. كانت حاجة فعلا غريبة ماحسيتهاش من زمان !
قعدت اسمع يوم واتنين واسبوع واكتشفت أن فيه حاجة متغيرة بس المرة دي للأسوأ .. انا كان بقالي كتير جدا مافوتش فرض في الصلاة بس من يوم ما جيت من السفر وانا بقيت انام من غير ما اصلي العشاء .. ممكن المغرب يروح عليا وانا قاعد .. حتى لما بصلي كنت بقوم وانا كسلان وعايز اخطف الكام ركعة بسرعة.. حتى الصلوات اللي فاتتني مش عارف اقضيها وبتتراكم عليا .. بسرح كتير في الصلاة وكمان وانا بقرأ السور في الصلاة بفتكر كلام الأغاني اللي حفظتها .. كنت بتعذب وانا في الصلاة وبقرأ في سورة حافظها ويصلي بيها كتير جدا بس دلوقتي نسيتها ومش قادر افتكرها خالص !! بقيت بسجد سجدتين السهو كتير
حتى القرآن اللي كنت بدأت اقرأه بتدبر وبدأت اطلع علاقات بين الآيات وبعضها واسأل نفسي ليه ربنا حط الآية دي في المكان دة بالذات وليه حط اللفظ دة مش لفظ تاني مثلا وبدأت استشعر عظمته فعلا .. لما رجعت اسمع الأغاني مابقيتش بقرأ القرآن وانا مستمتع زي الاول ومابقيتش افكر في الآيات ورجعت اقرأ القرآن تاني كأني بقرأ كتاب عادي وبعمل الواجب وخلاص ويبقى اسمي بقرأه... بدأت اشتم واقول ألفاظ ماكنتش بقولها في حياتي قبل كدة.. كنت بصوم الأيام القمرية من كل شهر بس الشهر دة ماصومتهمش ... كنت بدأت اصلح من نفسي في حاجات بس كل اللي كنت بصلحه باظ تاني ... في الفترة دي حصل لي مشاكل ومواقف غريبة مالهاش اي تفسير .. نفسيتي باظت أكتر بكتير من الفترة اللي كنت متضايق فيها وسافرت بعدها

رجعت تاني أدور على أدلة بتقول ان الموسيقى مش حرام ورجعت تاني افكر في الموضوع اللي كنت قفلته من زمان .. ومع كل لينك بفتحه وبيقول أن فيه شيخ حلل الأغاني كنت بفرح واقول اهو الأغاني مش حرام .. بس اللي كان بيبقى مكتوب دة كلام مايدخلش العقل .. مافيش أدلة وحتى لو فيه دليل بيبقى ضعيف جدا ومايتصدقش ... انا والله عايز أصدق الكلام دة واقنع نفسي انها مش حرام بس فعلا الكلام مايدخلش العقل وماينفعش يتقارن بالكلام اللي مكتوب فوق في أول البوست خالص

خلاص كرهت نفسي واستحقرتها جدا وقررت اني مش هرجع اسمع القرف دة تاني ... فات يوم على القرار دة وانا لسة بصلي وانا كسلان ومش عارف اقضي اللي عليا
يومين .. مش عارف اقرأ القرآن زي الاول
اسبوع.. لسة مش عارف ارجع زي الاول وبدأت انسى عدد الصلوات اللي عايز اقضيها وبدأت اكتبهم في ورقة .. لسة بشتم ومستحقر نفسي جدا  ..  بفتكر من 3 شهور فاتوا وانا مش بضيع فرض وبقرأ القرآن بتدبر

.. مش عارف ارجع زي الاول .. كل دة بسبب كام يوم ؟! كل دة بسبب اني سمعت اغاني؟!!!

المهم قعدت اجاهد واحاول بكل الطرق لحد لما واحدة واحدة بدأت ارجع تاني زي الاول الحمد لله ..

ممكن لما بطلت اسمع الأغاني من خمس سنين ماكنتش عارف هي حرام ليه ومش لاقي سبب للموضوع دة .. بس لما قعدت فترة مابسمعش اغاني وحصلتلي انتكاسة وسمعت اغاني لمدة قليلة جدا لقيت ان الفرق بين حياتي في الفترتين دول كبيير جدا  وعرفت ان الأغاني برغم انها حاجة تافهة اوي بس هي مرض خطير جدا للقلوب وبرغم أن المرض دة انتشر بسرعة جدا في قلبي بس لما جيت اعالجه اخد وقت ومجهود كبير جدا جدا جدا
يمكن اكون فرحت لما سمعت الأغاني بس انا نفسي أكرم بكتير من أنها تبقى حقيرة في نظري، وحبي لديني أكبر بكتير جدا من شوية كلام اهبل بيتقال مع أصوات آلات بتدمر قلبي وديني

يمكن اكون دلوقتي عرفت ليه الموسيقى حرام... 😃🌸