طريقنا نحو الجنة

الخشوع في الصلاة

الخشوع قل ف الصلاه ؟! ..

ساعات بتبقي عايز تجدد شويه معاني عن الصلاه عشان ترجعلك روح  الصلاه تاني.

ف البوست دا بعض من معاني الصلاه .هو طويل شويه .بس دي صلاه لازم نلم بيها

وبردوا  يعتبر نقطه ف بحر. " ومن جاهد نفسه ف الصلاه. حضر مع الله "💙
لعلها تكون سبب ف تجديد بعض المشاعر الخاصه بأجمل علاقه ع وجه الارض .علاقتك بربك ف الصلاه.

-أستقبلت القبله ..
و حطيت أيديك ف وضع التكبير . والدنيا ورا ضهر ايديك.
و بدأت التكبير بـ " الله أكبر " !

الله أكبر من أن يخطر ع قلبك غيره الله أكبر كم أن تؤثر ع الاقبال عليه نفس أو أهل أو كبير أو صغير

ف اللحظه دي أعرف ان بيحصل حاجات غريبه جداً حواليك ؟!
1- ربنا عز وجل بينصب وجهه لك  بكيفيه لا يعلمها الا هو .
2- ذنوبك كلها أتجمعت ع كتفك عشان تتساقط مع كل حركه .
3- لا ف أكل ولا شرب ولا حتي إبتسامه حتي نظراتك بحساب .
4- ف شيطان مخصص بيحضر متخصص بس ازاي يضيع الصلاه.

عايز تعرف تقف ازاي بين أيد ربك ؟!

تخيل لو دخلت مكان لقيت ناس واقفه باصه ف الارض وحطين ايديهم الاتنين ع قلبهم كدا . وناس تانيه رافعه راسها بتبصلك ف وشك . هتعرف تفرق بين العبيد والملوك ولا لأ ؟!

" خلي وقفتك قدام ربك وعينيك باصه ف الارض موضع القبله الـلي يشوفها يقول عبد واقف .شكلك شكل عبد "

ف حد بيدخل ع ملك من غير ما يحيه ؟!

ينفع تبعت لصاحبك رساله من غير ما تمهد ف الاول ؟!
و لله المثل الأعلي طبعا.  حيي ربك بدعاء الاستفتاح.
الادعيه كتير أوي .أخترتلك منها واحد بمعناه💙

" اللهم باعد بيني وبين خطاياي كما باعدت بين المشرق والمغرب ، اللهم نقني من خطاياي كما ينقي الثوب الأبيض من الدنس ، اللهم اغسلني من خطاياي بالثلج والماء والبرد "

يعني ايه ؟!
' اللهم باعد بيني وبين خطاياي كما باعدت بين المشرق  والمغرب ؟
يعني الذنوب اللي لسه معملتهاش يارب أبعدها عني اوي .'

' اللهم نقني من خطاياي كما ينقي الثوب الأبيض من الدنس؟
دي الذنوب اللي انا عملتها يارب نقني منها علشان يرجع عملي ابيض تماماً '🌿
.
اللهم اغسلني من خطاياي بالماء و الثلج و البرد ؟
بالماء : عشان الذنب يتمسح تماماً .
الثلج و البرد : عشان مكان الذنب بيكون ف نار الندم إنك أخطأت , فيجي الثلج يبرد مكان الذنب اللي محته الماء .والبرد يجعل كأن شئ لم يكن💙

- أستعيذ بالله من الشيطان : الشيطان هيجي ساعه الصلاه يفكرك بمشاكل حصلت من سنين و يقترح عليك أذكي الحلول. والشيطان خلق من خلق الله , و ان كنت
لا تراه فإن الله يراه و يقدر عليه . الجأ لله يبعده عنك ساعه صلاتك. لا مالك الا الله🌏💛

- سمي بالله الرحمن الرحيم .واعرف ان التسميه دي معناها ان البي هتقرأه ف رحمات. كل سوره فيها رحمات كتير . أستشعرها .

- أبدأ الفاتحه . وبعد كل أيه أسكت ثانيه إسمع رد ربك عليك ف قلبك. أنت حالاً كليم الله لكنك لا تسمعه . لكن هو بيكلمك حالاً . عارف زي المذيع أول ما اللمبه الحمرا تنور ان ع الهوا . بيخاف ويرتبك هل هو شايف حد ؟! هو بس " عنده يقين " أن ف ناس متابعاه.

- الركوع : " انا عند المنكسره قلوبهم من أجلي" 💙 يارب عقلي دا مهما عظم ف هو أمامك صغير جداً .سبحان ربي العظيم . عارف لما تكون بتحب حد أوي
و بتدافع عنه دايماً . اهو أنت بتعمل كدا ف الركوع بتنزه ربك عن كل اللي بيقول فيه ما ليس فيه .أو بيعصيه . التسبيح تنزيه إنه أعظم من كل دا سبحانه .

- سمع الله لمن حمده : أيديك أتحررت. 
ف غيرك من مخلوقات تانيه بتمشي ع أربع. أنت الحمدلله ربك حررك  و أنت بتقول سمع الله لمن حمده.💙
كأنك بتسمع جواك حاجه بتقولك ربنا بيسمع اللي بيحمده .تقوم أنت قايل ربنا ولك الحمد .وتكمل بالدعاء اللي ورد عن النبي اللي أتسابق عليه بضع وثلاثين
ملك أيهم يكتبه " حمداً كثيراً طيباً مباركاً فيه " 🌎

- و تيجي لأهم محطه ف الصلاه كلها " السجود " 🌏
أقتراب من الحبيب . قرع باب الله .لا تنحني الا لله . اللحظه اللي إبليس بيبكي بسببها. اللحظه اللي بتكون أقرب ما يكون لحبيبك. أطلب أحكي. وطول فيه أوي . مفيش جعان بيشبع من لقمه ولا أتنين.
كان ف واحد فضل طول الليل ساجد ويقول : متي ألقاك وأنت راضٍ عني يا الله ؟! .

- و تيجي التحيات :
شكرا ع لقائك يارب.  بدأت بتحيه وخلصت بتحيه

تخيل كدا ؟!
النبي صلي الله عليه وسلم  بعمامته البيضاء . بوجهه المشرق المبتسم .بشعره الاسود . نعله المخصوفه وانت قدامه وبتقوله : السلام عليك ياحبيبي يارسول الله
و هو يرد عليك 💙

و تكمل تحياتك بالتشهد وانت بتجدد العهد كل مره مع ربك بإن هو ربك وحده
و محمد رسوله . وتخلص التحيات و تدعي كتير أوي  أصله وقت اجابه برضه.
و بعدين تعلن للكون كله السلام وتسلم ع الكون كله ع يمينك و ع شمالك .

أنت جيت من عند السلام  وهتعيش مع الكل بسلام الكبير والصغير . الحيوانات والارض .كل ما خلق الله .جرب تقعد بعد الصلاه نص ساعه متقولش كلمه وحشه  ولا تتعصب . جرب ترجع للناس وقد جئتهم من عند الله . جرب تخرج من الصلاه بالصلاه🌏

اللهم أجعل صلاتنا سر تحولنا لأفضل حال 💙