طريقنا نحو الجنة

قيام الليل 1

قيام الليل🌸

"فاكرة لما كنت بقولك مش عايزاكي حافظة كدة وخلاص لا انا عايزاكي فاهمة وحاسة كويس جدا بكل حاجة بتعمليها💜"

احنا كلنا حافظين ان ربنا سبحانه وتعالى بينزل لنا كل يوم فى الثلث الأخير من الليل🌸

طب استوعبي معايا كدة..
عارفة يعني ايه ربنا بنفسه بينزل لنا فى الدنيا ويسألنا هل من مستغفر فيغفرله كل ذنوبه..هل من داعي فيستجيب لكل أدعيته..هل من سائل فيقضي له حاجته
ده احنا لو عرفنا ان في حد بيوزع هدايا وجوايز مجانا كدة فى منطقتنا بنبقى عايزين نجري عليه..
ما بالكم ربنا ولله المثل الأعلى والأعظم والأجمل والأرحم والأحن

ربنا فعلا بينزل لنا بس هو وحده سبحانه وتعالي اللي عارف كيفية النزول..مفيش مخلوق يعرف هو بينزل لنا ازاي..
بس الأكيد والجميل جدا انه فعلا بينزل لنا وبيستجيب لكل دعواتنا فى الثلث الأخير من الليل

تخيلي كدة تبقى الناس كلها نايمة والجو هادي خالص وانتي واقفة قدام ربنا وبتعبديه وعمالة تفضفضيله على اللي فى قلبك وتتكلمي معاه..

ياااه بجد مجرد التخيل بيريح القلب

تعرفي ان انتي لو واظبتي على القيام نور الايمان هيملى قلبك و وشك كمان..وأبواب المعصية هتتقفل فى وشك وأبواب الطاعات هتتفتحلك وكمان مفيش مرض هيمس جسمك وهتحسي بالبركة فى فلوسك ورزقك واولادك ودراستك وحياتك كلها..وبجد والله ومش ببالغ جربي بنفسك وانتي هتعرفي..

ربنا مفيش أجمل وأرحم منه يا بنات..
بيرزقنا كتير جدا وبيباركلنا فى كل حاجة بس لو لجأناله فحاولي تصلي حتى لو ركعتين بس كل يوم لحد ما يبقى القيام دا زيه زي الفروض ال5 بالنسبة لك متقدريش تستغني عنه أبدا وابقي زودي فى الركعات بعد كدة براحتك

طب بنصليه ازاي بقى؟🌸

بصي يا غالية قيام الليل بيبدأ من بعد صلاة العشاء لحد قبل الفجر وبنصليه مثنى مثنى يعني ركعتين ونسلم وبعدين ركعتين ونسلم وهكذا وبتقرأي فيه أي سور براحتك وبعد كدة بتختميه بصلاة الشفع والوتر

سُنة عن الرسول صلى الله عليه وسلم انه كان بيصلي 11 ركعة "يعني 8 ركعات قيام و3 ركعات الشفع والوتر"

بس لو مش هتقدري على العدد دا فصلي زي مانتي عايزة "يعني ممكن تصلي ركعتين أو اربعة..فاللي تقدري عليه صليه بس المهم مثنى مثنى🌸"

والشفع والوتر ممكن تصليهم 3 ركعات مع بعض من غير ما يكون في تشهد فى النص..
بتصلي ال3 ركعات مرة واحدة وتقولي التشهد كامل فى الركعة التالتة "يعني كإنك بتصلي المغرب بس مش هتقولي التشهد فى الركعة التانية وهتقرأي فى الركعة التالتة الفاتحة وبعدها سورة"
أو ممكن تصلي ركعتين الشفع لوحدهم وتسلمي وبعدين تصلي ركعة الوتر لوحدها وتسلمي

"والوتر بيبقى ركعة واحدة وبنصليها مرة واحدة بس فى اليوم"

"والركعة الاولى الرسول صلى الله عليه وسلم كان بيقرأ فيها سورة الأعلى..والركعة التانية الكافرون...والوتر بيصليه بالاخلاص..وانتي ممكن تختاري السور اللي عايزاها لكن السور اللي فوق دي سُنة عن الحبيب صلى الله عليه وسلم ويستحب انك تقرأي بيها

طب بصليه امتى؟
ميعاده بيبدأ من بعد العشاء لحد الفجر يعني ممكن تصلي العشاء وبعدين ركعتين قيام ليل مثلا وبعدين الشفع والوتر وخلاص كدة وممكن تستني لحد بالليل خالص "بعد الساعة 12"

لكن الأحسن اننا نصلي القيام فى الثلث الأخير من الليل لان ربنا بنفسه بينزل لنا ف الوقت دا

المعم انك تصلي الشفع والوتر مرة واحدة فى اليوم كله

_طب انا لما ساعات بقوم اصلي القيام بنام تاني وبتروح عليا نومة ومش بصحى للفجر🤦🏻‍♀

بإذن الله هقولك على فكرة جميلة جدا

بصي يا ستي خليكي ناصحة وصلي قيام وفجر مع بعض..
يعني نامي بدري ولو الفجر مثلا بيأذن 3 عايري المنبه على الساعة 2 وخليها ساعة عبادة...قومي بقى صلي قيام واستغفري كتير واقرأي قرآن وهتلاقي بعد كدة الفجر بيأذن صليه واقرأي أذكار الصباح ونامي

وبكدة تبقي كسبتي القيام وكمان الفجر فى ميعاده وهيبقى أجرك عظيم جدا عند ربنا بإذن الله🌸

وزي ما قولتلك ابدأيها بركعتين الأول وانا واثقة انك بنفسك هتزودي الركعات دي بعد كدة لانك هتعشقي القيام فعلا💜

ومتنسوش تدعوا اننا نتجمع فى الفردوس الأعلى بقى وندخلها من غير أي حساب ولا عذاب يارب🌸

بحبكم فى الله💫

الـمُـتـفـائـلـة بـالـفـردوس🤲🏻
#منى_صالح💜

‏مَن عَجز عن قِيَام الليّل؛ فَليَستغفر فيه.
﴿ *وَالمستغفرين بِالأسحار*﴾💚