طريقنا نحو الجنة

الصبر

طول ما انت واقف قدام اللبن علشان يغلي مش هيغلي، أول ما تلف وشك تعمل حاجة ترجع تلاقيه فار كمان ..

كان حد قال مرة مُستدل من الفكرة دي تعريف جميل للصبر :

هو فن العثور على شئ أخر تقوم به .

اوقات بيكون الصبر مُر علشان انت قاعد مركز جداً على حدث معين مستنيه يحصل، وسُنة الكون بتقول إن كل شئ لازم ياخد وقته ( الطبيعي ) فـ تركيزك ده بيصّعب عليك الصبر، ويحسسك بطول المدة جداً، على عكس لو كُنت شاغل نفسك بحاجات تانية، اول لما يجي لك الفرج هتحس إنه جه في وقته بالظبط لأنك مكنتش مركز معاه التركيز اللي يرهقك نفسياً.

حاول يكون عندك " مؤانسة للزمان " يعني الوقت اللي بين الحدث والفرج استغله قدر الإستطاعة في حاجات تنفعني لأني هعيشه هعيشه، تركيزي المبالغ فيه في الفرج، مش هيغير توقيته.