وش هالكون بعدك علمني وش يكون وش هي الدنيا بدونك غير صمت وسكون الصبح شاحب والليل تملاه الظنون والزوايا موحشه فاقده قلبا حنون عادي كل هالناس عندي يروحون أويجون الا أنت ياعمري روحتك ماتهون
""""البارت الواحد والثلاثون """"
تكلم فهد وهو منزل رأسه :وهذا الي صار ياااخوي وش اسوي قلي انا محتار
فيصل بعتاب :كل هذا يصير لك ولا تتكلم وتتزوج وتطلق ولا ندري أفا يافهد ماهقيتها منك
فهد رفع رأسه :قلت لك يااخوي كل شي صار بسرعه
الحين ابي شورك
فيصل ابتسم له بحنيه وحط يده على كتف فهد
: هونها وتهون راح تنحل بإذن الله
والحين قوم ونام بغرفتك الي دايم كنت تنام فيها تراني كلمتهم يجهزونها
هز فهد رأسه وقام
راح لغرفته الي ببيت فيصل
دخل وكان كل شي على حطته يمكن له سنه مانام في بيت أخوه
انسدح على السرير وهو يتنهد من وين يجيه النوم وهو يفكر بالي مأخذه عقله
رن جواله معلن وصول رساله عقد حواجبه
ورفع الجوال فتحه شاف رسالة واتس
من الوليد استغرب بالعاده الوليد يكون بهالوقت نايم
فتحها وقرأ الرسالة
""فهد تكفى طلبتك يااخوي انا محتاجك زايد طاح علينا واحنى اللحين بالمستشفى تعال ابيك تكون معي """
فهد فز من قرأ الرساله :لاحول ولاقوة إلا بلله
اللهم اجعله خير
ارسل ل أخوه رساله انه بيروح ضروري
وطلع بسرعه متوجه للمستشفى.
"""""""""""""""""""
بالمستشفى الكل كانوا بالسيب قريبين من غرفة العمليات والكل بحالة صعبه ام الوليد تبكي وام افنان تبكي معها
وام غلا الي من دقت عليهم غلا وقالت لهم جوا كانت جنبهم وتهديهم
وأبو الوليد جالس على اعصابه وجنبه أبو أفنان وأبو غلا
وطلال رايح جاي بالسيب ماهو عارف وش يسوي ويدعى الله انه يقوم زايد بالسلامه
الوليد كان جالس ومنزل رأسه وكل هموم الدنيا عليه
شافته غلا ماعنده أحد تركت البنات وراحت لجهته قربت منه وجلست جنبه وحطت يدها على فخذه :قل مايصيبنا إلا ماكتب الله لنا
الوليد أدعي له الحزن ماراح يسوي شي الحين هو محتاج الدعاء مو الحزن
لف الوليد لجهتها ونظرة عيونه كلها حزن وخوف من الجاي :غلا انا خايف لانفقده خايف على اخوي
غلا تحاول تواسيه :ماراح يصير له إلا الي ربي كاتبه صح
الوليد بخوف ومن غير مايحس :صح... بس يا غلا انا مااقوى على فراق أحد ثاني كفايه
اني فقدت محبوبتي كفااايه ...
غلا جات بتتكلم بس شافته
وقف من شاف فهد جاي جهته راح له وترك غلا مكانها
ناظرت له بحزن وسكتت
قامت لجهة البنات وببالها
""مين محبوبته مو اول مره اسمعه يقولها معقوله نسيتني يالوليد نسيت دانه ومعاد لها وجود بحياتك """
راحت لأروى الي من شافت فهد زادت شهقاتها
قربت منها غلا وافنان تهديها وهي تبي من يهديها
غلا بهدوء :أروى مايصير الي تسوينه أدعي له حبيبتي
أروى ماردت على غلا و ناظرت أفنان ومن بين دموعها :هذا وش جابه له وجه يجي
أفنان تضمها وتبكي :يكفي يااروى خلاص مووقته الحين
أدعي لزايد أروى انا قلبي يتقطع عليه تكفين اهدي وخلينا ندعي له
بعدت عنها ومسكت يدها :تعالي معي دورة المياه نتوضى ونروح نصلي ركعتين بمسجد النساء
سحبتها وراحوا لدورة المياه
