منقولة
<3حوش جدى 2 <3
الحلقه الرابعه <3 <3
وسام ... استنى <3 اقرى رساله قبل ماترقدى <3
نهال .. اوك حبيبى <3
سكرت نهال تلفون وفتحت الكميدنو وطلعت رساله وفتحتها وهنا كان وسام كاتبلها <3
وسام ... خليها مسكره وافتحيها بعد مانسافر نهولتى <3
ضحكت نهال وكيف بدت تفتح فيها ... سمعت امها تتكلم ورا دار وتقول ..
امها ... نهاااااااال .. مازالتى نااااااايضه ..
وهنا نهال طفت ضى سهاره بسرعه ولوحت رساله ودارت روحها راقده لما امها خشت ... ومن تعب اليوم مشت نهال فى نوم عميق ومافاقتش الا على صوت امها تقول ...
امها ... نهاااااااااااااااااااال يامنجوههه نوضى .. مدربه تكلكس من بكرى .. نووووووضى ..
ناضت نهال بسرعه تجرى وفتحت باب دارها وقالتلها ..
نهال .... ماما بالله عليك كلميها ... قوليلها خمسه دقايق بس ونجى ..
مشت نهال بسرعه للحمام غسلت وجهها وخشت لدار لبست بسرعه بسرعه وطلعت ...
وركبت لسيارة مدربه وبدو فى اول تدريب ليها ... وهنا قالتلها المدربه ...
المدربه ... نهال مبلغ متع الحصص كاش مادمك تبى تاخدى 10 حصص والتدريب يوم بعد يوم ومن ساعه الى ساعتين اقصى شى ..
نهال . اى اى تفضلى هاك ....
المدربه ... ومرات الحصص الاخيره يجى يكملهملك خوى وحتى هوا يدرب . لانى مسافره ...
نهال .... احنا ماتفقناش هكى ...
المدربه .... وهما حصه او اتنين بس ... ومرات نكملهملك انى ..
نهال ... ياريت تعملى فيا معروف ...
المدربه ... تمااااام .. وانسى كل شى وركزى معاى .. بسم الله الرحمان الريحيم ..
بدت نهال فى اول تدريب ليها للقياده .... وروحت للحوش متهتكه وتعبانه واول ماخشت لدارها لقت امها مخليتهاله الدار زى فله من نضافه .... بس نهال كانت ردة فعلها العكس و هبلت وبدت زى مجنوه ولوحت شنطتها ومشت تجرى لامها ..
نهال .... مااااااااااااااااماااااااا .. ضميتى دار ؟؟
امها .... اللطف ياربى .. خير دعاويك ؟؟ ماهو لقيتها نضيفه زى الفله ... لدرجة حتى من الورق تحت سرير ملوح ..
نهال ... قصدك لقيتى ورق تحت سرير .. ؟؟؟ اما كناسه حطيتيه ؟؟
امها ... حرقته مع شوية ورق عندى ... تعرفى بوك ديما يقول احرقيهم مرات فيهم كلمة الله ..
نهال ... انى ماقولتلكش ضميها دار ... علاش انتى ديما هكى ؟؟
امها .... تى بتمشى يامعفنه ولا لا ... خلى لين يشهدو وسخنا على موت ولا حياه .. نوضى صكة خمار باهيه ..
نهال .. وافرض الورق الاتبيهم مهمات عندى ...
امها ... حسستنى وراك الشركات ولافاتحتيهم .. ولانسيت اى ماهو بوك فاتحلك حساب بالميليرات ومرات فيهم وريقة شيك ... تى بتمشى من جنبى ولا لا .. والعفن هوا ديريه فى عش زوجيه مش هنا ... تى قسما بالله ولد فرج الاما يربيك من اول وجديد يابايره ياحطيطه ..
نهال .. انى فديت ... امتى بنفتكى من حوش اغبر هوا ... ديما وانتم لامبالاه ..
امها ... اغبر فى عينك يالى ماتتحشميش خززززززى عليك ... يالى مش لاقيه من ياخدك ... ماهو من لسانك الحلو ماشالله ..
نهال ... اى اى غير ولد خوك قريب يموت عليا بس ..
امها ... اهاااااااااااااا اى اى كانا مالصقناشى ليك راهو نبتت فيك نخله .. نوضى كرنبه باهيه ... انتى وين والعقل وين ..
نهال ... انى مهبوله ولو سمحتى ياامى دارى معاش تلوحى منها اى شى .. مره الا فاتت لوحتيلى رقم وطنى وقبلها كرت .... قصدى والله ماهى عيشه هكى ..
امها ... تى والله كانا ماتسكتيش ياقليلة الادب مانى جايتك الا بطوبو على سيقانك العوج ...
نهال .... فى قلبها << اقلب الجره لفمها تطلع بنت لامها >> امس جمله هادى سمعتها من حناى واليوم منك ..
امها ... شن حسك تفترشى ؟؟؟ ميلااااااااا زال ... صدقت روحها وبدت تنفرش فى ريشها من توا ... تى والله ياكلبه نقصهولك هالسان الا مازال تقابحينى بيه ... وفى جديد .. مفتاح دار عندى وبنظمها كل يوم وورينى شن بديرى باهى ...
نهال .... انى بنلم شلاتيتى وبنمشى لحوش جدى ..
امها ... ميللااااااا فكه ... برى برى سليمتك ...
وفجاه نهال مقعمزه على سرير تغلى وتبكبك .. لين شرين تلفونها .... وقالت ..
اميره ... الو .. ايو كوليبه ههههههه
نهال ... اسمعى راقيتلى من الاخير اطلعى من راسى ..
اميره ... خيرك ؟؟
نهال ... اسكتى دمى محروق < وقعدة تبكى >>
اميره ... خيرك يادعوه شن فى ؟؟ حسك خوفتينى ؟؟
نهال ... امس وسام عطانى رساله قبل مايسافر وقالى اقريها بعد مانسافر ... وبعد ماروحت من حوش جدى موخر ... تكيت وقعدت نحكى معاه .. شورا امى حست بيا بس بعد ماسكرت ... فاطقطقت على دار وانى كانت فى ايدى رساله كيف بنقراها .. لما فتحت باب طفيت سهاره بسرعه ولوحت رساله فى تركينه ورقدت .. ونوضت صبح على صوت كلاكس مدربه فاندهبت شيرتى وطلعت بسرعه من غير مانقيمها ولما روحت لقيت امى ناكته دار وظامتها وانتى تعرفى امى لما تظم .. حتى من سرير تنحيه .. وقالتلى لقيت ورق وحرقته .. اااااااااااااااااااااااه
اميره ... هيا هادى ؟؟ خلعتينى نحسابه حاجه كبيره .. عادى انتى عندك وسام بطوبته مازالتى دورى فى رسالته ..
نهال .. انتى مش فاهممه .. فى شى فى رساله وسام كان يبى يقولوهولى ... واصر عليا نقراها بعد مانروح .. وحسيت من عيونه انا فى شى فى رساله .. مش عارفه مرات يتهيألى بس هكى حسيت ..
اميره ..... وووووووووه قصدك انتى كانا فى حاجه مهمه مايبيش يقولهالك وجه لوجه .. مستحيييييل .... اكيد حب وغرام وانتقام <3 هههههه ...
نهال ... تقولى هكى ؟؟ باهى كانا سألنى شن نقوله ؟؟
اميره ... ردى بالك تقوليله ماقريتهاش .. بتخشى فى مووايل تانيه .. انت ماتحبينيش ومش مهتمه بيها اصلا .. وكيف لوحتيها ومفروض دستيها فى وريدك والجو الحامض هوا .. لدلك ننصحك قوليله اى قريتها .. وتهببببببببل وشكرا حبيبى على كلام رومانسى .. وبصراحه بعد ماقريتها رساله ولت الليله بمبى <3
نهال ... تقولى تمشى عليه ؟؟
اميره .. تى أي يامهبوله وصدقينى هوا بعدها ينسى طوووووول ويخى يدوخ <3 هههههههه
نهال ... هدا الا بيصير اصلا .. تعرفى امى نصبتها معاها لسقف ..
اميره ... حى ياكلببببببببه وانى كيف جيت بنقولك قوليلها تحطك عندى بعدين .. اهلى طالعين وانى مكسده ..
نهال ... مش عارفه فى شك اليوم ترضى عليا ... هههههه برى برى .. توا نشوف ونقولك <3 باى <3
سكرت نهال تلفون ... وقعدت تقلب فى نقالها لين نعسها نوم ورقدت ومافاقتش الا على صوت تلفونها يشرين ..
نهال ... الو . وسام .. وصلت ..
وسام ... راقده ياخميرة نوووووم ...
نهال ... اى والله روحت وانى تعبانه من .. << وهنا فاقت على روحها وتفكرت انها مازال ماقالتله >>
وسام ... من شنى ؟؟ نهال .. الووو
نهال ... لا لا تغطيه هربت بس ... اه اى كنت فى حوشكم اليوم .. مهم شن درت انت ولى ووين نزلت ؟؟
وسام ... هههههه نزلت فى ديره سنتر .... ووالله كنت مانبها دبى بس تفاجأت انها عالم تانى .. وبعون الله رح نسعى انا نحصلو عقد خدمه هنا بعد الزواج ..
نهال ... ان شالله يارب حبيبى
وسام ... نهال خيرك نحس فى صوتك متغير .. فى شى ؟؟
نهال ... لا لا بس هكى نضت من نوم وحاسه قلبى غم عليا ..
وسام ... نهال خيرك فى شى صار معاك ؟؟
قعدت نهال مضايقه من موضوع انها تتطلع وتتدرب بدون علمه وزياده كدبت عليه وزياده فى احتمال حصص بتاخدهم مع مدرب وكملت بكل موضوع رساله ... قعدت نهال تتسبل لوسام وماقدرتش تحكيله او تقوله انى كدبت عليك لانها تعرف مسبقا انه عصبى وماتتوقعش انه بيتقبل موضوع .. ولدلك انتهت المكالمه على ...
نهال ... وسام الحوش يطق حبيبى .. فى حد جى .. خلى نطلع نشوف منى اوك ..
وسام .. اوك حبيبتى ... وانى اليوم مش رح نفضى لانى بنطلع مع صحابى وبنسهرو برا ... فااكيد بكرا نكلمك صبح <3
نهال .... لا لا صبح لا ..
وسام ..... علاش ؟؟
نهال .... لانا بابا قاعد وواخد اجازه الاسبوعين هما .. كلمنى العشيه اوك حبيبى ؟؟
وسام ... اوك .. بس بنسالك قبل ماننسى قريتى رساله ؟؟
نهال ... اى قريتها .. وخلاص توا نقولك بكرا ... فى دوشه فى حوشنا شكله فى حد جى لماما .. باى حبيبى ...
سكر وسام تلفون وحس انا نهال متغيره وفى شى صاير بس .... بس كدب نفسه ... وخش للحمام لبس ودوش ... ووهوا كيف يواسى فى شعره ... لقى رنه من امجد ...
فاتدكر انه ماكلمش امه وخوته وطمنهم على وصوله ...فااخدى تلفون واتصل بى امجد وقاله ...
وسام ... امجد يابارررررررد منين جاتك واتصلت
امجد ... درت رنه الحق ههههههههه معقوله ساعه 9 فى الليل قريب وانت ماكلفتش نفسك وتتصل يابارد ..
وسام ... ههههههههههههه والله هادى وصلتى وكيف كنت بنكلمكم ..
امجد ... من الاخير امك قالتلى كلمه وانى رنيتلك بس هههههههه <3
وسام .... هاتها هاتها ترا ..
امجد ... دقيقه بس هيا لوطه مع عمتك .. خلى نزلها تلفون..
وسام ... اه مع عمتى .. هيا عمتى قصدك هنا ؟؟
امجد ... اى وضحكتها تنسمع هنا وغادى ... اما هديكا فاانت مش موجود وجهها ماربنه ...
وسام ... نهال اليوم ماجتكمش ؟؟
امجد ... لا لا ماشفناش وجهها .. جت عمتى بس من ساعه 4 عشيه ..
زاد وسام ركب فى قلبه نار وحس انا نهال تكدب عليه وانا فى شى صاير ومسكته عليه ... فااول مانزل تلفون امجد لامه .. تكلم معاها شوى وبعدين قاللها ...
وسام .. اعطينى عمتى ترا نسلم عليها ...
امه .. باهى هاك خودها ياوليدى غير مره مره طمنا عليك بس ..
وسام .. ان شالله <3
ام نهال ... اه وسام .. وصلت . حمدلله على سلامتك .
وسام ... شن اخبارك واخبار عمى محمد ..
ام نهال .. الحمد للله ...
وسام .. << وهنا كان يبى يوصل هوا >> ونهال شن اخبارها وخيرها ماجتش معاك راهو طمنت عليها .. وبنسالها شن تبى من غادى ؟؟
ام نهال ... والله ياوليدى اليوم روحت من تدريب القياده زى الغول تعيط وتكشخ ومش طايقه حد ... ومن اول ماروحت . خشت لدار ورقد ت.. وحتى طلعت خليتها راقده ...
وسام ... ماشى ماشى عمتى .. طمنينى عليك مره مره ماشى وسليملى على باقى لانى بنسكر توا ...
عمته .. ماشى ماشى وليدى ورد بالك من روحك ..
سكر وسام وعفاريت دنيا كلهم تتنط فوق راسه ... واتصل بصاحبه واعتدر من طلعه وسكر نقاله ... وخش رقد ....
ناض تانى يوم ... وفتح نقاله ... ومشى للمؤتمر .. وكان اغلب الوقت المايك ليه بحكم انه مدير ولقى اكتر من خطاب ..
فى هديكا الليله ... تغيرت فى وسام حاجه .. وقررها بينه وبين نفسه .. واول شى قرره .. مش رح يقيم تلفون ويتصل بيها تانى ..
فاتو الايامات يوم ورا يوم ... ونهال ... تتصل بيه ومايردش عليها ... واستنت اكتر من مره يتصل بيها بس ماشفتش منه حتى مسج ... وكانو الايامات يفوتو عليها ببطئ شديد .. وكانت احيانا تبكى وتضايق وتحبس فى روحها فى دار لما تعرف انا وسام كلم اهله وماكلمهاش .... وبدت تحس انا وسام متغير عليها بالفعل .. وفات اسبوعين على حال هوا ونهال تستنى فى تبرير من وسام .... بس مافيش اى ردة فعل .... ويوم جمعه تحديدا .. قررت انها تمشى لى حوش جدها وتفهم من خالتها شن صاير مع وسام ... وتعرف امتى بيروح ..
وكالعاده .. ناضت صبح على صوت امها تقوللها ..
امها ... نهال ... نوضى هيا كانا بتوعنينى باش نمشو نتغدو فى حوش جدك .
نهال ... ماشى ماشى .. نضت ..
خدت تلفونها من تحت المخده وفتحاته على امل تشوف ولو حتى رساله .. بس مافيش اى شى من وسام .. وبعدها خدت لاب توبها وفتحت وقعدت تفتش على اكاونته بس نفس الشى مالقتش اى ستيت او كومنت منزله ليه اسبوعين ..
تنهدت تنهيده عميقه ولوحت تلفونها على سرير وطلعت واول ماطلعت من دارها امها قالتلها ...
امها .... خودى انتى ظمى الحوش وخلى انى نكمل مطبخ ونخش لصابون .. وفطورك على طاوله تلقيه ..
نهال .... ماعنديش نيه ....
امها ... حطيه فى تلاجه مالا .. قوووليلى .. قداش مازالك على تدريب القياده حصه ..
نهال .. حصتين تقريبا .. علاش ؟؟
امها ... لانا بوك متسقد بعد بكرا واحنا بنمشو لحوش جدك خلاص ..
نهال ... لا لا خلاص مازالى حصتين وامتحان وتم ..
امها ... ماشى ماشى .. مالا كملى قبل مابوك يجى هيا مادبيا نطلعو قبل صلاة الجمعه .. لانا بوك يبى يلحق عليها فى جامع ..
نهال ... اوك ماما
بدت نهال فى ظمان الحوش وماخداش منها ساعتين لين كملاته وحتى امها نفس الشى ... وقبل صلاة الجمعه بشوى لبسو حوايجهم وطلعو ...
واول ماوصلو غادى ساعدو ام وسام فى غدى قبل مايروحو رجاله من صلاة الجمعه .. ونهال وتتت سلاطه وبعدين حطوا لغدا وتغدو .... وكملو حوستهم هما وصلاة العصر .... واول ماادن العصر ام نهال قالت لنهال ...
امها .... نهااااااال .... نوضى ديرلنا صفرة شاهى وقههوه وحطى من الحلاوات الا جابهم مبكرى بوك ..
نهال ... ماشى ماشى ماما .. وين خالتى ؟؟
امها ... فى حمام تتوضى باش تصلى ..
مشت هال للحمام وطقت على خالتها وقالتلها ..
نهال .. خالتى نبى نطلب منك طلب ..
خالتها .. نعم ..
نهال .. نبى ندير رنه لوسام من تلفونك ممكن ؟؟ غي انى ماعنديش رصيد << ماتبيش تقولها مايكلمش فيا >>
خالتها ... تلقيه فوق على كميدنو متع سريرى ...
نهال ... اوك انى بنركب ندير شاى وقهوه وكانا امى سالتك قوليلها مشت بديرهم ماشى ..
خالته .. ماشى نهوله وسلمسلى عليه ..
ركبت نهال تجرى فوق وخشت لدار خالتها وخدت تلفون وبعدين خشت لداره ... قعدت تشبح شوى لدار وعيونها دمعو وتفكرت كل موقف الحلو هالا جمعتهم مع بعض من اول موقف صار بينهم .. متع يوم صحابتها والكيكه ..
طلعت من دار تجرى .. وخشت للمطبخ ودارتله رنه من تلفون امه باش يعاود .. وحطت القهوه على نار وقلبها يدق
ومافاتتش 5 دقايق لين عاود الاتصال .. واول مافتحت الخط لقاته يضحك وباين انه مع صحابه وقال ..
وسام ... امى مستاحشك مووووووووت
نهال ....
يتبع
