منقولة
<3 حوش جدى 2 <3
الحلقه السادسه <3
وللحظه فكرت انها تطلع من الحياه هيا وتريح كل الناس من مشاكلها فاطلعت الدبله الا كان جايبهالها ولبستها وباستها وهيا تبكى وبعدين مشت تجرى وخشت للحمام وفتحت الصيدليه وخدت حبوب الضغط متع بوها ... وفى لحظه الا بتبدا تفتح الماصو ... سمعت الباب تسكر وحد ينادى .. فابدت تفتح بسرعه فى الباكو بس سمعت بوها فى لحظه هيا يقول ..
عمى محمد ... << قعمز على كنبة وسط الحوش الا جنب حمام >> نهااااااااااااال بنتى وووينك .. بالله بسرعه جيبلى حبة ضغط متعى نحس فى راسى بينفجر .. شكله ضغط راقيلى ومش عارف حتى ناخد نفس مش قادر ناخده ... بسرعه يابنتى بالله عليك ..
وهنا نهال مسحت دموعها ونست للحظه حتى شن كانت بتدير وخدت الحبوب وطلعت تجرى بيهم .. ومدتله طاسه ميه ودواه ... وساعدته يخش لدار ويستريح على سرير ... وبعدين قعمزت على كنبه وحطت ايدها على راسها وقعدت فى حالة تفكير وصمت ودموع من غير صوت وللحظه حست انها تافهه جدا وهوا انانى جداااا لانه ببساطه ماعطهاش فرصه لايسمعها ولا حتى يفهم منها .. وماخلاش لتقه اى مكان .. وحست انها بعيده على ربى جدااااا ... فاعلى خاطر شخص تخلت على ربى وايمانها ... وحاولت تنتحر على شى هيا ماكناتش قاصدته فامسحت دموعها وخشت للحمام ودارت دوش وقعدت اكتر من ساعه تحت الدوش والميه تضرب فوق راسها وهيا تفكر وتفكر وتقلب فى راسها كل شى صار ...وبعدين طلعت وتوضت وصلت وقعمزة تقرى فى القرأن وتبكى ... وتستغفر فى ربى على لحظه شيطان قدر فيها يتملكها ولولا رحمة ربى وبوها .. كانت توا فى عداد الاموات بسبب شخص تعامل معاها بكل انانيه .... قعدت لحد ساعه 10 فى الليل وهيا تقرا وتستغقر فى ربى .. وماوقفتش الا على صوت الباب تقربع ... وخشت امها لدار فالقتها تقرى فى قرأن وهنا قالتلها ...
امها .... نهال بنتى ... عرفتى وسام روح ؟؟
سكرت نهال مصحف وقالتلها ...
نهال .... ماما انى بنرقد تعبانه .. وبابا شكله ضغط رقاله .. وبكرا بيتسقد فاشوفيه ..
امها .. علاش مااتصلتيش بيا ؟؟
نهال ... ماحبيتش نقلقك بس مبكرى شوى خشيت عليه وحسيته كويس .. ولقيته فاتح الاخبر ويتفرج .. مهم انى قوتلك هيا تصبحى على خير .. اى ماما بابا بكرا امتى بيتسقد ؟؟
امها .. تقريبا طيارته ساعه 5 عشيه .. وبتجى سياره ترفعه من هنا .. يعنى حتى مطار مانقدرو نرفعوه ..
نهال ... خلاص نودعوه من هنا وخلاص <3 ... والله بابا بيخلى مكانه الحق ..
امها .. اااااااى انتى بتقوليلى .. الحوش بيولى مظلم بلاه ..
نهال ... اى حقا ماما بنقولك شى .
امها .. شنى ان شالله خير ؟؟
نهال ... لغيته من دماغى موضوع الخدمه .. والفلوس الا بابا قالى بنخليهلك بنخش بيهم كورس انجليزى العشيه فى بن عاشور ..
امها ... علاش ماتبيش تخدمى .. شن غيرلك رأيك ؟
نهال .... لا لا يومن عاش بعد مانتزوج ...بس توا خلاص لغيته من دماغى موضوع ..
امها ... الا يريحك يابنتى ... انتى اصلا ديما ماشيه براسك وماتشاورى فى حد .. العفو من يكلم فيك فى هالليل ..
نهال ... اميره ... خلاص تصبحى على خير <3 بنكلمها شوى وبنسكر ..
امها ... وانتى من اهل الخير .. غير سكرى روشن دارك قبل ماترقدى ..
طلعت ام نهال من دار وهنا نهال فتحت الخط وقالت ..
نهال .. اهلين اميره ...
اميره ... شن جوك يابلوووه .. خيرا نتصل بيك من بكرى وانتى ولا كأنك
نهال ... كان تعرفى البلوه الا صارتلى .. ولولا رحمة ربى راك توا تعزى فى ام صاحبتك ..
اميره ... هىىىىىىىىىىىىىىىى شن فى قولى .. حسك خوفتينى ؟؟
نهال ... طلعت نبى نتدرب زى عاده واليوم الحصه الاخيره ... والكلبه المدربه عارفتنى وقتلها مانبيش نتدرب مع راجل .. بعد مالهطت الفلوس وجت فى اخر حصه وبعتتلى خوها ... وانى الكارته ركبت فى سياره زى مستبلهه من غير مانشوف من فيها وماتوقعتش نهائيا انا يكون فيها راجل والسياره مدرسه فم الباب بزبط ودورجات حوشنا عاليات فامابنليش شى .. وركبت طول ..
اميره ... بااااااااه... غير استنى .. ماتقوليلش شافك فارس ظلام .. وروح من دبى ؟؟
نهال .... هوا فى غيره ؟؟
اميره ..... تبصررررررررررى قصدك شافك معاه وانتى طالعه
نهال .... ياريت اقلها كنت قولت انى غالطه ... كارته انى كنت نعتدر لراجل بلباقه ونقوله خطيبى وكدا ومانبيش نحضرها الحصه ... وفجأه لقيته فوق راسى زى مجنون ويضرب فى راجل ..
اميره ... كداااااااااااااااابه ؟؟
نهال .... خلاص قلبى وقف ولوح الحاجات الا كان جايبهم وضرب بوكى الورد برجله وطلع وسيبنى ..
اميره ... باه وبعدها ..
نهال .... خشيت زى مجنونه ونبكى وبعدين حاجه ضربت فى راسى وقالتلى برى ريحى روحك من هالحياه الغبره والمشاكل ونكد الا لاحقك فى كل تركينه وحظك مزفت هوا .. ولقيت روحى فى الحمام وفى ايدى شريط دواء بابا متع ضغط ... ولولا انه خش بابا للحوش ياسبحان الله وكأن ربى بعته ليا .. ويستنجد بيا لانه رقاله ضغط وينادى ويقولى جيبلى حبوب معاش قادر ناخد نفسى ... وطلعت بدون وعى .... راهو توا سفيت الحبوب ومشيت فى عالم الامووووات ..
اميره .... حى عليك ... يمشى مرض يسبله والله مايستاهلك .. ومفروض تربيه .. لانا بعد الزواج هكى بتتعبى معاه ..
نهال ... وانى هدا الا بنديره ... قسما بالله الامانستكرده ... ونعلمه نهال من تكون ... ويفكر ميتن مره قبل مايتعصب ويمشى ويسيبنى ... وحتى خدمه طلعتها من دماغى ..
اميره ... علاش ؟؟
نهال ... هدا مجنون .. وبنخدم معاه فى نفس المكان يعنى خوديك كل يوم وتانى مشكله مع حد .. والبسى كدا وهادى ضيقه وهادى ابصر شنى ... وبنقعد فى مشاكل معاه وخلاص ... لدلك حتى لو فكرت نخدم ... هوا فى تركينه وانى فى تركينه ..
اميره ... بينى وبينك <3 والله صح ..
نهال ... ومش قبل كنت بنديرله مفاجاه وبنشرى عبايات ونبدا نلبسهم بس ؟؟ قررت الفلوس الا اعطهملى بابا باش نشرى بيهم العبايات .. بنخش بيهم كورس فى بن عاشور العشيه .. باش هوا صبح فى خدمه وانى العشيه فى كورس .. فاهكى لانتلاقى معاه ولايتلاقى معاى ... وتوا نوريه .. من هاللحظه بنلبس ونتكم .. وماليشى علاقه بيا ويشرب من مية البحر ..
اميره .... تعجبينى الحق هكى نبيك ... نقولك شى ... الرجاله هكى يبو لانا مهما حاولتى ترضيهم مش رح تقدرى ... وافضل شى انك بتخشى كورس .. حتى تشغلى وقتك وتتطلعى من الفراغ الا انتى فيه ... وتتعرفى على ناس جدد
نهال .... اى اكيد ... وطبعا بابا غدوا بيتسقد ... فابنمشو لحوش جدى .. واول مره ماعنديش نيه نمشى ولانشوف وجهه ..
اميره ... هههههههههه اى اى صدقتك .. ترا نشوفه توا يتصل بيك .. والله حتى باى مانسمعها وتسكرى فى وجههى
نهال ... هدكا قبل .. بس توا وبعد الا داره ... تغيرت هلبه .. والضربه الا ماتقتلك تقويك ..
اميره ... بتتصلى بيه ؟؟
نهال ... بجد انتى ؟؟ نجوم سمى اقربله هالصوفه مززيه هوا
اميره ... ههههههههههههههههههههههههههه
نهال .... تضحكى ؟؟ زاهيتلك الايام شكلها وانى بس الا دمى محروق ..
اميره ... لانى متاكده انكم رح ترجعو لبعض وبقوه اكتر من قبل ... غير يبى شوية تربايه بس <3
نهال .. باين شخصية حناى وريده تنفع .. بنمشى نتعلم منها .. تعرفى وجعنى حالى تعرفى ... ليا اكتر من اسبوعين فى نكد بس وبكى ... ومبكرى فكرت حتى ننتحر .. وين دماغى انى بس .. وهوا بعدى يتزوج ويجيب صغار ..
اميره ... امالااااااااااا شنى ياماما ومرات تلقينى انى مرته ويخون فيا مع سلمى صاحبتنا ..
نهال ... مصحك وسام مايديرش هكى سكرى فمك .. صح انى متعفلقه بس مش لهدرجه ..
اميره ... اما انتى وقحه .. يعنى انى الا ندير هكى . بعتينى عند اول مركب ..
نهال .... تعرفى مش هوا بيقيم خشمه عليا ... تى توا تشوفى اللبس الا هوا مايحباش الا مانلبسه .. وونمشى بيه للكورس وسياره الامانجرى بيها على 120 وتغبيره على وجهه .. ولما ندير زملاطو ونبخ البرفان ... ونخليه يهببببببببببل ويموت ..
اميره .... ههههههههههه قلبك مليان ياحنه <3 يستاهل ... بالله معاش تحرقى دمك والله الا ماترجعو لبعض والامانرقص فى سهريتك
نهال ... اصلا معاش هامنى ..
اميره .... اى اى صدقتك .. تعرفى حاليا ماشيه معاك اغنية شرين .. متع انا مش مبينالو انا ناويلو على ايه سكته ومستحليفالو ومش قيلالو سكته ليه ..هههههههههه
نهال ... انى دمى محروق وانتى تغنى وتضحكى ... والله مبردك ... برى برى راسى بيتفجر وبنرقد ..
اميره .... كلمينى بكرا ..
نهال ... اوك .. سلام
سكرت نهال تلفون <3 وخشت رقدت .. وناضت كالعاده على صوت امها تقوللها ..
امها .. نهااااااال .. نوضى انى مش فاضيه مازلى بنوتى شوىة حاجات لبوك قبل مايتسقد ..
نهال ... نوضت ياماما ..
امها ... وتى فطور ... بوك شوى وجاى ..
نهال ... ماشى .. شن ندير ؟؟
امها ... هونى دحى فى تلاجه ديرى شكشوكه وماتكتريش فلفل وتمروجينه بيه .. وحطى الشاهى والقهوه على نار وتلقى وريقات نعناع على جدولهة الغرس الا فى جنان اقطفى الوريقات وماتقلعيش جدور زى عوايدك ..
نهال .... ماشى ماشى ...
مشت نهال للمطبخ وحطت شاهى على نار .. وبعدين خشت لدارها .. شافت لنقالها شوى .. وكانت متوقعه بتنوض زى قبل وبتلقى رساله منه ... بس احيانا الشخص يتوقع هجرانك بس لانك تحبه وشايف ضعفك ... وهدا الا حست بيه نهال .. وهنا خدت دبله الا حطتها امس على رف مكتب بعد ماكانت لابستها فى الليل .. وقعدت تشبحلها شوى وبعدين نزلت منها دمعه .. فامسحتها بقوه ... وكأنها ناويه على شى اكبر من الا صار ... وبيها يعرف وسام قيمة نهال ...ويفكر مره واتنين .. قبل ما يفكر يعطيها بالقفى ويمشى ويسيبها ..وردة الخاتم فى باكوه فى الدولاب ومشت ... للحمام .. غسلت وجهها وحكت سنونها ومشت للمطبخ نحت شاهى لانه طاب ودارتله سكر وحطت القهوه ورجعت لدارها ... وخدت نقالها وبعتتله ..
نهال ... مش رح نشد فى شخص كل يومين يزعل بسبب وبدون سبب وماكلفش نفسه فرصه يسمعلى .. حاجاتك رح نجيبهملك اليوم .. وان شالله تلقى نصيبك مع بنت اصدق وأوفى منى .. سلام وسكرت تلفونها وصلت صبح ومشت للمطيخ
وتت الفطور .. وقعنزة هيا وبوها وامها على فطور وهنا بوها قاللهم ..
بوها ... نهال هونى خليتلك مع امك 10 جنى وكانا نقصت عليك شى كلمى امك ..
نهال ... بابا .. انى بنخش كورس انجليزى لمدة اسبوعين فى بن عاشور العشيه .. واهو حتى نضيع وقتى .
بوها .. والله يابنتى الا يريحك دريه .. مهم شوارى امك فى غيابى بس .. اما العلم انى مانقدر نشدك عليه ..
نهال ... تسلم حبيبى انت <3 وتمشى وتجى بسلامه ياررررب <3
امها .... شنى نكلم فرج يجينا يرفعنا ؟؟
عمى محمد ... لاش تعبى فيه راجل .. هونى بنتك تعلمت وماشالله عليها ..
نهال ... مش تعرفى بس ياماما .. بابا قداش واتق فى قدراتى ههههه
امها .... باهى باه غير ان شالله مانلاقاش روحى فى بالو ملصقه ..
قعدت نهال وامها مقعمزين فتره طويله مع عمى محمد وهما يحكو ويهدرزو ويضحكو ... ويحاولو يودعوه بطريقتهم ومن غير دموع <3 وبعدها ناضت نهال وضمت الحوش بسرعه باش تكسب اكبر وقت مع بوها .. اما امها فاحطت الغدا وقعدت اغلب وقت معاه توتيله وتوصى فيه على صحته .. واول ما وتى الغدا وحطوه على طاوله .. شرين الحوش ... فا مشت نهال باش تفتح باب ... واول مافتحت الباب لقت وسام قدامها ... وتلكمست من وجوده فجاه قدامها اكتر مما انه شافها من غير وشاح ... وهنا فتحتله باب وخشت لدارها وامها جت تجرى وتقول ...
امها ... وسام .. جيت والله ربى يحفظك ياوليدى ..
وسام .. جيت باش نشوف عمى محمد قبل مايتسقد ونسلم عليه ..
امها ... حماتك بتحبك ... الغدى واتى هيا خش تغدى هيا ..
وسام ... لا لا مره تانيه خلينى نسلم على عمى ونطلع ..
امها ... تتطلع ؟؟ تى والله الاماتخش . حلوووووه هادى ... تخش وتوصل لفم الباب وماتتغداش معانا ..
خش وسام وسلم على عمه وقعمز على طاوله .. وام نهال قالت لنهال ..
امها ... نهاااااااااااال هاتى صونيه لوسام وكاشيك وتعالى الغدى واتى ..
نهال ... عطيه صونيتى مانبيش نتغدى ..
وهنا امها تزرطت وهرب عليها ضى وناضتلها ..
امها ... شنى خناق العريس جاك ؟؟ تى والله كانا ماتطلعيش الا نهارك اسود وتسلمى على خطيبك ..
نهال .. مامبيش نسلم عليه ومانبيش نتغدى ..
امها ... شن فى ؟؟ توا طلعلك ماينفعش .. شم صاررررر ..
نهال ... مافى شى .. وتوحميتى جت عليه .. ومانبيش نطلع ..
امها ... قسما بالله لو ماتطلعى قدامى توا الا مانعيط عليك قدامه ونخليك بعوضه .. اطلعى .. مرض
نهال ... اوووووووف ..
حطت نهال وشاح على راسها وطلعت وجت تقعميزتها قدام وجهه .. وطول ماهو مقعمز ويهدرز ماحاولتش تشبحله نهائيا ولا هوا حاول يشوفلها ... وماحطش فمين فى فمه لين قال ..
وسام ... الحمد لله .. تسلم ايدك عمتى .. وان شالله تمشى وتجى بسلامه يارب ياعمى وتبى اى شى تفضل .. شنى خالتى نجيكم بعدين نرفعكم ؟؟
وهنا انتصبت نهال وقالت ...
نهال ... انى بنرفعها امى مش ظرورى ... ومش رح تحتاج حد غيرى من اليوم ..
سكت وسام ومسح ايده وقال ...
وسام .. هيا مالا سلام عليكم توا ..
نهال ... استنى .. فى امانه نبيك تعطيها لخالتى .. ارفعها معاك ..
وخشت لدار ولقطتله شكاير الا امس جابهم .. ولقاته يستنى فم باب .. واول ماوقف مدتهمله .. وهوا بطبيعة الحال زبط انا شكايره الا امس جابهم فاقاللها ..
وسام ... امى مش محتاجتهم .. خليهم عندك ..
نهال ... انى مش محتاجه صدقه من حد .. خودهم ينفعوك .. لعرسك ..
وسام ... خليهم عندك انتى الا ينفعوك .. انى خلاص اعتزلت ..
وهنا شبحتله نهال وكان لقت عطاته تيرو ... وسكرت الباب وخشت ... وتبرطمت لين وصلت لدارها لين عيت .. وفتحت دولاب وبلطتتهم فيه .. ودعت لين عيت على عمرها الاسود ...وطلعت من دارها بعد ما نحت الوشاح ورجعت وقعمزت جنب امها وبوها ... باش تكمل غداها او بمعنى اصح تبدا تتغدى ..
فات الوقت بسرعه وهما يتغدو ودورا لبس عمى محمد حوايجه ... وجاته سياره .. وودعو بعضهم بالحضن والدموع ... ولاخر لحظه .. عمى محمد قعد يوصى فى نهال على امها وعلى روحها .. ونهال دموعها مابوش يوقفو لحد ماتسكر الحوش وكبهو من روشن وشافو سياره الا ركب فيها مشت ..
قعمزت نهال على صفرة الاكل شوى وامها قعمزت قدامها وهنا امها قالتلها ..
امها ... خلاص بوك ماهوش بيموت باش تنوحى .. نوضى ديرلى فنجان قهوه نعدل بيه دماغى .. وشوى تانيه ونمشو لحوش جدك قبل ماتظلم العين علينا ..
نهال .. ماشى .
امها .. لميتى شنطة حوايجك ؟؟
نهال ... اهو توا بناخد شوية حاجات ... وكانا نقصت حاجه .. توا نجى هنا بسياره .. واصلا مش معقوله بننقطعو على حوشنا .. اكيد بنجوه يوم بعد يوم نديرو عليه لفه وضمه .. فاناخدى كانا عندى حاجه ناقصه ..
امها ... باه معناها ديرلى فنجان قهوه وبرى لمى قشيشك ..
مشت نهال للمطبخ ودارت لامها فنجان قهووه وبعدين خشت لدارها وبدت تلم فى الحوايج حويجها الحوش وشويه من حوايجها طلعه .. وحطتهم فى شنطه ورفعت شنطة لاب توبها ونقالها .. وكل شى بخصها .. وبعدين فتحت دولا وقعدت تشوف شوى للشكاره الا فيها فيلو وخاتم .. وبعدين فتحت شكاره الا فيها شكلاتات وقعدت تشبحلهم شوى بعدين خدتهم ورفعتهم للمطبخ وبلطتهم فى دولاب ..
ومافاتتش ساعتين لين لمو قشيشهم ومشو لحوش جدى ..
ام وسام ... قصى ... نووووض سيب الا فى ايدك وانزل افتح الباب يشرين ..
قصى ... اووووووف ديما انى ..
نزل قصى وافتح الباب وركب قاللها ..
قصى ... ياماااااااااا .. هادم حوش عمتى جو ..
امه ... باهى باهى .. انى نازله والكيكه ماتمسهاش لين تبرد ..
نزلت ام وسام ... وسلمت عليهم وقعمزت جنب نهال ... وبينما ام نهال لاهيه تهدرز مع حناها ام وسام قالتلها ..
نهال ... نهال خيرك شن فى ؟؟ خيرا وجهك دابل ورايح زى ليمه مريضه ؟؟
نهال ... لا لا مافى شى ياخالتى ..
خالتها .. توا بدسى على خالتك ... شنى فى شى ؟؟
نهال ... توا نحكيلك .. غير نحصل فرصه بس ونقولك . اصلا ماعندى لاش بندس عليك ..
خالتها .. باهى شوى وناديك تديرى معاى القهوه والشاهى فوق واحكيلى ..
نهال .. ماشى ..
هدرزت ام وسام مع سميره شوى على احوال هالدنيا وعمى محمد وهالجو الا يطبق الخلق وهالكساد الا بطفش .. وهدرزو على العرس شوى وبعدين ام وسام قالت ..
خالتها ... شنى سميره .. تشربى قهوه ولا شاهى ؟؟
حناهم ... توا وقت العشى ياحنا ولا بتخلين على بطونا ؟؟
ام نهال .. والله كيف شربت اصلا فى حوشى قيهوه سمحه من ديات نهال ..
خالت وسام .. معناها خلى نركب ونحط العشى على نار ... شنى يالاى عندك نيه فى حاجه ؟؟
حناى وريده .. عندى نيه فى مكيرنه جاريه ناشطه من تحت ايدين بنتى نهال <3
نهال .... من عيونى ياحناى انتى امرى بس ..
خالتها .. خلاص اركبى مالا معاى .. انى عندى طلية صابون بننشرها وندير طويسة شاهى وانتى حطى العشى على نار
نهال ... خلاص خالتى .. تم .. نغير بيجامتى بس ..
لبست نهال بيجامتها .. وحطت وشاح على راسها .. وركبت مع خالتها ... وبدو يحط فى العشى على نار ويحكو ... ونهال حكتلها كل الا صار مع وسام ولحد وين وصلو .. واخر كلمه قالتها نهال ..
نهال ... وهيا هادى الا خلتنى نقول لوسام .. كل واحد يشوف نصيبه .. لانا مش عيشه هكى ياخالتى .. والله امس فكرت ننتحر وقريب مشيت فيها ... شن يبى ولدك تانى .. والله تعبت
خالتها ... لا لا عندك الحق مفروض وانى ديما نقوله فيها .. يتصرف بالعقل والركيزه ويفهم قبل .. بس هوا ديما غيرتيه ومشاعره سابقه عقله .. بس يابنتى والله والله يحبك ومايرضى فيك بقة شوكه ..
نهال ... عارفه ياخالتى .. بس انى بديت نخاف منه اكتر مانخاف من بابا .. قصدى بدت عندى حالة رعب منه .. انى ارتبطت بيه باش نرتاح ونتهنى مش يومك وتانى عركه وبكى ..قصدى كانا توا هكى مالا بعد الزواج كيف .. معقوله يومك وتانى حرجانه فى حوش اهلى ؟؟
خالتها ... لا عندك الحق ووالله الانتفاهم معاه ونخليه يجى راكع على رجليه .. بس نعطيك نصيحه من ا ملى بنتها ... حتى يجيك ويستسمحك ماتوافقيش وبهدليه لين يشعف على عملته ..
نهال .... هههههههه انتى معاى ولا معاه ..
خالتها ... انى مع الحق وعارفه طبع ولدى وعارفاتك .. والله زى الوريده المفتحه .. لاتكشى لاتنشى .. لكن هوا احرف اغبر زى حناه هههههههه مش تقوليلها ..
نهال .... ههههههههه خالتى بالله عليك حتى كانا دويتى معاه ماتجيبلاش سيرة انى نندرى انك بتكلميه .. انى نبيك تفهميه موضوع صح بس لااكتر مش اقلها يعرف انى ماكنتش نبى نغلط ولا كنت نلعب من وراه ..
خالتها ... اى بتورينى فيك .. والله زى بنيتى .. وهوا هالاحرف نعرفه ونعرف نشافة راسه ..
نهال .. اسمعى خالتى حتى بتكلميه .. ماتكلميشى توا ... اهو حسه صوته فى دروج يكلم فى امجد ... خلى لين يتعشو ويركب ..
خالتها .. ماشى ماشى .. غيرى موضوع توا ..
وسام ... امججججججد نادى فيك انت يابلى وووينك ..<< وخش للمطبخ >>
وسام .... اه اسف مانندريش انا فى حد فى مطبخ << وطلع >>
امه ... تعالى تعالى بلا تزعبين زايد .. حسستنى بنت جيرانكم الا لقيتها ... مش خطيبتك الا بعد شهر ونص بتولى مرتك ... شن فى ؟؟ خيرك تنادى على امجد ؟؟
وسام ... نسيت ماجبتش الخبزه ونبى نعطيه مفتاح سياره يمشى يجيبها ويجى ..
امه ... معليشى .. خلاص انى حطينا مكرونه على نار .. ونهال بطيبها ..
وسام ... ماشى ماشى انى بنخش نرقد ف دارى .. ولما توتى نادى عليا ..
امه ... باهى باه
وسام ... فى قهووه واتيه ؟؟
امه ... لا لا مافيش .. تبى تعالى دير بروحك تشوف مافى حد فاضى ..
وسام .. ماشى ماشى هاتى سوزه ..
طبعا هدا كله ونهال واقفه على لودينو وتمصمص فى شوية معاين وتمسد عليهم بشويه باش ماتتلفتش وتصطدم عيونها بيه ... وبينما ام نهال تقرض فى سلاطه ووسام واقف على غار ... ام وسام سالت نهال ..
ام وسام ... نهولتى امتى بتبدى فى خدمه ؟؟
نهال ... لا لا بطلت مانبيش نخدم ..
ام وسام ... علاش اللطف ؟؟
نهال ... بنسجل فى كورس انجليزى فى بن عاشور وان شالله بنبدا نمشيله من بكرا العشيه ..
ام وسام ..<< وطبعا هالحديت كله تلويح دوه لوسام الا مصدوم ويحرك فى القهوه >> باهى ومن بيرفعك .
نهال .... بنمشى بروحى بسيارة بابا .. وبنخطم على صاحباتى لانهم بيسجلو معاى ..
ام وسام .. اووووووو هياجة بنات .. سعدودك
ووسام طبعا فى عالم تانى من صدمه لدرجة فاجت القهوه على غاز وهوا قايم عيونه وسارح فى القرارت الجديده وطريقه الا تدوى بيها نهال ... واول مافاجت القهوه ... خالتى سميحه غمزة لنهال وضحكت وقالتله ..
امه ... القهوه فاجت خيرك يامسبوه وين عقلك ..
وهنا لوح وسام سوزه على غاز وطلع وراكبه ستين عفريت ... وخش لداره وتلوح على سرير .. بينما خالت نهال قالتلها ..
خالتها ... ههههههههههههه ياعطيهالك والله ولدى يانارى قريب نجلط ..
نهال ... هههههههههههه يستاهل وتوا نوريه
خالتها ... قصدك انتى بجد تدوى ولا غير كنتى تستفزى فيه ؟؟
نهال ... لا لا والله ندوى بجد ههههههههههه
خالتها ... والله ربى يهديكم انتم زوز راسكم ايبس من بعض ..
نهال ... هوا الا بدى ياخالتى .. وهوا يتحمل ... مهم انى كملت هاتى نزل منك شاهى
خالتها ... اى وحتى انى كملت .. هيا الحقينى بشاهى خلى نقص نار على طنجره ونجيب الكيكه ..
نزلت نهال بالشاهى ولحقتها خالتها بالكيكه الا طيبتها العشيه .. وحطوهديكا صفرة شاى والكيكه وبدت تنفتح موضيع وتتسكر مواضيع .. لحد ماخش امجد وقال ..
امجد .... ياما ولدك هوا ديرله حل بدى عائق على الحوش وسعادتى الشخصيه ..
نهال .... هههههههههههههه
امجد ... والله الله .. توا خشيت بناخد منه فلوس الا قتله عليهم .. لزنى وقالى اطلع برا ..تى من يحاسب روحه .. تى والله خلاص الامانمشى نبيع فى راشيد ونخش صالة حديد وبعدها يجى ويكلمنى .. فارس ظلام هوا .. الامانهدله تاكمه كله اول مايجى ويقولى خير بس ..
خش وسام لدار وقال ...
وسام ... من هوا الا بتهدله سنونه امجد ...
امجد ... ولد جيرانا .. قالى انى نكره ونستحقر خوك وسام << مش انى لا هووووا >> وانى قررت نهدله سنونه هههههههههههههه
وسام ... اه باه .. غير انتى قولى من هوا بس وماتعبش ايدك ..
امجد ... لا لا تعبك راحه ههههههههههه
نهال ... هههههههههههه
امجد ... نهولتى تلعبى كارته ... ولا بتخافى من فارس ظلام .. وغمزلها على وسام ..
نهال ..هههههههههه لا لا خلاص كبرت توا .. برا جيبها
امجد .... مااااااااااااااااااااااااااااااااااااااشى ..
وطبعا وسام ولا كلمه ولاحرف وراسه بيشيط شيااااااط ..
قعمزت نهال قدام امجد .. وامجد طرح الكارته وبدو فيها ضحك وطقان ايدين ونهال واخده راحتها وكأنه مش موجود ... وامجد طبعا غير حد يبنله سنونه بس ... ووسام يشبحلهم ويحك فى راسه ولحيته ويشبحلهم فى شبحات كلها غل وكره
وبعدين خدى بعضه وطلع من الحوش مره وحده ... ومعاش بى يروح لحد نص الليل .. اما هما فاتعشو وغسلو معاين وركملو سهريتهم ورقدو ...
ناضت نهال صبح تتواب ولقت حناها نايضه ومقعمزه فى جنان ومفرشه حصيره ومندار ولقت جدها وامها وخالتها وامجد وقصى مقعمزين وكيف نحطت صفرة الفطور وريحت الدحى والشاهى وخبزة شعير وطاجين تفحفح من هنا وغادى ... وهنا مشت للحمام وغسلت وجهها وجت قعمزة جنب خالتها وقالتلهم ..
نهال ... صباح الورد .. شن هاللمه الحلوه هادى <3 اااااااااه قداش ليا معاش حسيت الفطور ليه نكهه زى توا <3
امجد ... هدا لانا انى فى صفره بس ههههههههه ياما فرده كامله يمااااا علاش لازم ماتنحى ياسبحان الله تقول بيشبعك توا الا بتنحيه .... تى حطى جبنه فوق دحى الهم لانمزق شلاتيتى
حناه .... بتنوض جرو عربى ولا لا .. نوض طرشيقه طرشقك .. بوك يشرى وجدك يجيب وانت تفتح فى بطنك وفوقها تعيط ....
امجد .... حنينا ياعزيزه راس خيرك علينا ... انتى عارفه مشاعرى حساسه ولا لا ... والله نحلف .. ناكل فردتين راهو ..
نهال .... ههههههههههههه نحسابك بتحلف ماكش واكل .. طلعت بتاكل فردتين هههه بصراحه تعجبنى صحت وجهك ..
امجد .... اااااااااااااااى هكى بنغلطو فى بعض وانى لما يغلط فيا حد نجوع الحق ..
امه ... كول كول وانت ساكت .. امتى بتعقل بس ... وتقولى اخطبيلى .. تحسابنى مهبوله مالا..
نهال ... هههههههههههههههههه عادى عادى امجد اول 80 سنه ديما صعبين
امجد ...ههههههههه حقا ماقولتلكش .. معاش نبيها .. وخرت .. اسمعى نهال .. نبيك فى موضوع بعدين << وغمزلها >>
نهال ... شن فى حد الله بينى وبين مشاريعك الفاشله ..
امجد ... بعدين نتناقشو مش لازم تحشمينا قدام الجماهير ..
نهال ... ههههههههههههههه ماشى ماشى
كملو فطورهم وقامت نهال وخالتها معايين وامها قعمزت جنب امها تهدرز .. بينما نهال خشت تغسل فى معايين وخالتها جت معاها وقالتلها ..
خالتها ... نهال ... كلمته امس وسام ..
نهال ... روح موخر هوا صح ؟؟
خالتها بعد ماانتم رقدتم بشوى ..
نهال ... شن قالك ؟؟
خالتها ... فى الاول ناض ينفرش ويناقش وبعدين رنب وسكت وعرف انه ظالم ..
نهال ... شن حستيه ..
خالتها .... عندى احساس بيبدا يرطب جو معاك ... بس ردى بالك تعطيه وجه بسهوله ... باش معاش يكررها معاك خليك قويه وحسسيه انك لو هوا بايعها انتى بايعتيها قبله ... وصدقينى ولدى ونعرفه ... رح يزيد يكرش فيك اكتر ..
وهنا نهال غمرت خالتها وقالتلها ..
نهال .... صحيتى خالتى والله مارح ننسى وقفتك معاى <3 انى نحبببببببك هلبببه <3
امجد ... << على خشته للمطبخ >> يالله يالله <3 ياما نخش ولا ولا .. قصدى نسمع فى قبلات وعزل ونحبك وحقيقتا مش ظامن من مطبخ ..
امه ... حى علبيه هوا . والله ماتتحشم على وجهك ياجرو والله حناك صدقت فيك .. خش .. شن تبى
امجد ... هههههههه تى والله معزه ياما راهو .. << وخشلها حسين جسمى>> ياامى ياغلى الدنيا واصلك عاصفه فى الكون ..
نهال ... هههههههههههههههههههههههههههههههههه قووويه عاصفه ياعطيهالك ياامجد ..
امجد .. مش تعرفى بس ...
وهوا قاعد ماطملش جملته لين غبرته وطريق وشبشب يطير وراه طياره <3 ..
نهال .. ههههههههههههههه خلاص ياخالتى والله حرام عليك .. والله هوا روح الكوميدي هالا فى حوش ..
خالتها ... سحييييقه اصلا ليا فيهم مجننه انى غير كل واحد هباله شكل ..
امجد ... << طلع راسه من روشن مطبخ وقال >> نهال ماتنيش نبيك فى موضوع اهو قتلك ..
نهال .. ماشى خلاص .. برا لخالتى تقتلك .. ههههههه .... خالتى انى بنطلع نظم الحوش ونسيق جنان .. وانتى كملى مطبخ وبعدين اركبى انتى حطى الغدى على نار وانى نظملك الحوش ..
خالتها ... لا لا نهولتى ماتعبيش روحك .. توا نركب وندب فيه الحوش لين نكمله ..
نهال ... خاااااااااااااااااالتى نزعل منك .. تبى شى نادينى ..
طلعت نهال وضمت الحوش وسيقت جنان وبخراته ... وبعدين ركبت مع خالتها وساعدتها فى الحوش والغدى وغسل الماعين ... وبعدين طلعت شنطتها وبدت تلبس وتوتى فى روحها للكورس .. واول ماكملت ونزلت من دروج شافها امجد وقاللها ... امجد ... اووووووو شن هالرشاقه وهالطرحات .. بصراحه والله وسام محظوظ .. وهيا جاكيت جلد
نهال ... ههههههه مبردك ..
امجد ... قسما بالله نظرات واخدين منك حته على قولت مصرين .. هههههههه حى عليك كانا يشوفك وسام ... نحس فيه يكبر عشرين سنه ..
نهال ... ههههههههه خلاص مبردك <3 حول بنسخن سياره ...
امجد .... امى فوق ؟؟
نهال ... لا لا نزلت من بكرى ...
نزلت نهال باش تولع سيارتها وتسخنها .. وبعدين ركبت باش تجيب نقالها من فوق ... ووهيا كيف نازاله من دروج .. يخش وسام من الباب ويشوفها ... وهيا وقفت شوى وجمدت وقلبها طاح من مكانه .. وبعدين شبحت لوطه ونزلت وتخاطفت هيا ويه كتف بكتف .. وهوا مصدوم يشبح ... ووهيا كيف فتحت باب وبتتطلع .. شبحلها شبحت غيظ ونتش شاربه وقاللها ...
يتبع
