مذكرات خائنة (كامله) لــ خديجه السيد

الانترنت

الفصل الثاني

فتحت باب الغرفه واغلقته خلفها تقدمت بخطوات للداخل بهدوء لايقاظ ابنتها ،وجدتها جالسه علي الفراش واضعه الوسادة علي رأسها و كفي يدها علي الاخري علي وجهها فوق الوسادة ، تنهدت و تقدمت لتفتح الشباك و هي تقول :
- سميره يلا اصحى هتتاخري على المدرسه
لم يأتي منها رد ، تقدمت بنفاد صبر وهي تشيل الوسادة من علي وجهها :
- لما انتي مش قد السهر بتسهري ليه ؟
تمللت وهي تتثاوب بكسل :
- يا ماما حرام عليكي عاوزه انام

تطلعت فيها بغيظ و قالت :
-تنامي ايه انتي ؟ النهارده اول يوم ليكي في المدرسه الثانويه ، ولا عاوزه تسقطي من اولها
كملت بتحذير :
- الله في سماه لو عملتيها يا سميره ومنجحتش في الثانويه العامه , و جبتي مجموع كويس هتقعدي في البيت ، وانا اصلا كنت عاوزكي تقعدي مش جايه على هوايا حكايه البنت تتعلم دي
نظرت لها بضيق :
- خلاص يا ماما ، مش لازم اسطوانه كل يوم ، البنت مش للتعليم و المدارس ، تتجوز وتقعد في بيتها تربي  عيالها
نهضت و ذهبت للخارج للمرحاض و تكمل والدتها :
- ما يا اختي كلنا كده و اديني قاعدة في البيت و بربيكي اهو

خرج زوجها على صوتها :
- في ايه يا سعاد كل يوم خناقه مع بنتك عملتلك ايه ثاني
سعاد بغضب :
-جننتني في صحيانها ، طالما وراها مدرسه بعد كده تتخمد من بدري
تنهد كمال قائلا لهدئها:
- طب خلاص معلش اول يوم ليها في المدرسه
مش متعوده لسه

خرجت سميره من المرحاض بغضب مكتوم :
-وياترى بقى علي وخالد صحيوا و راحو الجامعه ولا لسه ، ولا انتي ما وراكيش غيري بس في الراحه والجايه تقطمي فيا.
سعاد بحده :
- ملكيش دعوه باخواتك هما في النهايه ولاد ، لكن انتي بنت

(كان نفسي اعرف يعني ايه بنت ويعني ولد و ايه الفرق بينهم مش البنت بني ادمه و زيها زي الولد بالضبط الاثنين خلق ربنا ، لكن بالنسبه بابا وماما كان في فرق كبيره اوي بينهم ، في التصرفات و المعامله و كل حاجه ، كنت ساعات بحس ان ماما كان نفسها أن ابقى انا كمان ولد مش بنت ، صحيح عمرها ما قالتها كنت بحسها في تصرفاتها )

نظرت لها بحزن و ضيق فدائما تفرق في المعامله بينها و بين اخواتها :
- انا داخله البس عشان ما اتاخرش
قال كمال بعد الانتهاء من الفطار :
- يلا يا سميره عشان اخوكي يوصلك المدرسه
نظرت لانعكاس المرايا و هتفت بضيق وعدم رضي :
- حاضر يا بابا

سميره 16 سنه قصيره القامه جسم متناسق مع إلي حد ما عيونها عسلي و بشره سمراء لكن ملامحها مع لون سمراء وجهها يعطي شكل جذاب و شعرها اسود و طويل و ناعم
***

في المدرسه الثانويه للبنات ،
صاحت غاده بصوت عالي:
- سميررررره
سميره بابتسامة :
- غاده انتي هنا معايا في نفس المدرسه
رديت بمشاكسه :
- اه الظاهر كده هنبقي اصحاب تاني
-اخص عليك هو انا ليا اصحاب غيرك
- يا بنتي بهزر أنا فرحت لما شفتك معايا في نفس المدرسه ، سميره ايه اللي انت عاملاه في طرحتك حد يلفها كده
قالت بضيق :
- ماما يا ستي صممت البسها النهارده ، و مش بعرف الفها ، هو انتي بتلفي طرحتك ازاي شكلها حلوه قوي