( الدخيله )

الصفحه الثامنه عشر من الدخيله

#البارت الثامن عشر 

#الدخيله 

ضم السالفه وخلي الحجي مستر ..

وخلي بالك اني انخسر مااخسر ..

.......

بقلم : هدى الهاشمي 

-مقداد 

 يابه السلام عليكم شونكم ...؟ 

اعرفكم بنفسي اسمي مقداد اغلبكم يمكن سمعتو بيه بالبارتات السابقه .. مو ؟

حنطيكم نبذه سريعه عني .. اني الوحيد لاهلي جان عندي اخ اصغر مني وتوفى بحادث سير من ١٠ سنين تقريبا الله يرحمه 

عايش ويه امي وابويه ناس طيبه وعايشه على حب الله .مواليدي ١٩٨٥ . 

 خريج اعلام وشغلي مراسل بقناه عراقيه مشهوره ..بهاي السنوات جان الي برنامج ماخذ صدى واسع على مستوى العراق 

لذلك من جنت امشي بالشارع هوايه من الناس يسلمون عليه ويعرفوني ..

داذكرلكم هالتفاصيل حتى تعذروني بعدين ...

 حالتي الاجتماعيه .. جنت خاطب وره قصه حب قويه جدا بيني وبين بنيه جانت ويايه طالبه بالقسم جانو يسموونا ليلى والمجنون 

بطلوع الروح وافقو اهلها ننخطب وره محاولات هوايه وضحيت بدم قلبي في سبيلها ظلينه مخطوبين تقريبا ٣ سنين 

وبعدين اجت الصدمه ... جانت تخوني ويه ابن عمي ... شفتها بعيني مره من المرات صاعده وياه بالسياره وضحك وغزل بيومها  انهاريت وقررت انهي كلشي وماصدك بشي اسمه حب ابدا ..

 تعرفت على ولاء   بالصدفه من جنت صافن ويه روحي واقره نكات  بالحوش وسمعت ضحكتها ولفتتني بالبدايه

 عبالي بنتهم وتعرفون باقي التفاصيل ...

عزيتها كلش لان اجتني بوكت جنت محتاج بيه احد يسمعني ويحس بيه .. وحركت قلبي حرك من سولفتلي قصتها ومعاناتها .. جنت ادري بيها ذتحبني ودتتعلق بيه .. صدمتني من جانت تسولفلي ادق تفاصيلي وحركاتي 

محبيت اكسر بخاطرها بالصراحه لان جنت واثق انو اني املها الوحيد حرفيا الي باقيلها واذا صارحتها بمشاعري  الحقيقه راح احمل  ذنبها .. خصوصا انو فرق العمر بينا جبير وجانت علاقه شبه مستحيله ...