( الدخيله )

الصفحة الرابعه من الدخيله ( الجزء الثاني )

" هناك اشخاص في البداية
يذهلونك بأختلافهم ، بتميزهم ،
ثم يجعلونك تندم بقية عمرك
لأنك
عرفتهم "

بقلم : #هدى_الهاشمي
#الدخيله
#الجزء_الثاني

ولاء -

واني داحجيلكم قصتي حاليا
مرات يخطر ببالي
اشياء غريبة ...!
يعني مثل مثلا .. يخطر ببالي اشوف ردات فعل كل شخص
يقره قصتي يعجبني اشوف اذا الشخص متعاطف ويايه
لو ينتقدني لو يحاسبني لو منقهر عليه ..
وصلت لمرحلة كمت حتى الانتقاد من الناس احبه
لان احسه نوع من انواع الاهتمام بيه وبحياتي ...
بس اني الانتقاد مالاحني
كل الي شفته بحياتي
احكام X احكام ..
من احجي قصتي لاهلي قبل الغربه
الكل ترفض تسمع .. او .. مرات يسمعون بس الي يريدوه والي ينفع احكامهم ايضا المسبقه الي راح يسمعونياها بنهاية تبريري
الكل جاهزه احكامها عليه ..
يمكن تستغربون ! بس سابقا بهالمرحله بحياتي جان عندي دافع كلش قوي بداخلي انو ابرر واشرح للناس كل الي صار بيه ..
جنت اتمنى يسمعوني وينصفوني ..
بس الدنيا مو عادلة ..

..

قررت اروح للكراج مال مدينة
حتى اغير وجهتي لبغداد .. واتزوج ابن عمي
مجان عندي اي سبيل ثاني ..

وصلنه وطلعت من التكسي
اتشكرت الرجال كلش
ماقصر ويايه
حسيته نقهر عليه
اخر كلمة كالها الي
بابا ديري بالج على نفسج ..
انتي بنيه بنص ذيابه
فتحي عينج وتوكلي على ربج الله يفتحها بوجهج ..

ابتسمت بوجهها تشكرته وطلعت ...

خطواتي بهالدقايق كلش ثكلت
هالدنيا غريبه !
مرات الشعور واحد بس هو يحدد شكل مشيتك ونفسيتك

من جنت دانهزم جنت خايفه
بس ظليت اركض
وهسه هم خايفه ..
ونفس الشعور
بس هسه الخطوات بطيئه جدا

ضحكت على هالدنيا ..
بعدني مامكمله عامي ال ١٧
جان باقيلي كم يوم على عيدميلادي
اتذكرت امي من جانت تحتفل بيه
توديني لحدائق البرج
وتسويلي احلى حفلة
بذاك الوكت مجان عندها فلوس
بس تجمعلي منا ومنا
من جانو اهلها يسألوها شنو هالتبذير ؟
تكلهم وهيه مدمعه : " هاي يتيمه خطيه "
سبحان الله
مع انو جنت مو يتيمه بذاك الوكت
بس طول حياتها تسميني يتيمه !
جانت تتعامل ويه ابويه على انو ميت
او يمكن من ذاك الوكت وهيه تعرف مستقبلي
وتعرف راح اتعب واتيتم الف مره بعدها
سوتلي كلشي حلو بحياتي قبل
حتى تعوضني عن مر ايامي الجايه

نزلت مني دمعه واني اذكرها واذكر ابتسامتها بوجهي
اذكرت كل تفاصيلها .. شكلها
ريحتها
ومكياجها

بجيت واني اذكر
مسحت دموعي وباوعت للسما
وكلت : باوعي لوحيدتج شوفي شصار بيه
المن عفتيني !!
الله يسامحج يمه ..
تدرين شكم مره ضعت من وراج ؟
تعرفين وحيدتج
ومدللتج تعبت من كلشي ؟
تعرفين وحيدتج رايحه لمصيرها المجهول بنفسها ..