( الدخيله )

الصفحه الثانيه عشر من الدخيله 🤍

يا دنيا لا تعذبيني
اني الي بيه مكفيني
على الغربة عودتيني
تايهه وحدي ومااندل ...

بقلم : هدى الهاشمي

داليا -
" ماتت خالتك بحضن خطيبها حاتم "
مااحتاج يكلولنه الخبراخويه  لان الرجال جان ديعيط بالتلفون وكلنا سمعناه .. وكع التلفون من ايد اخويه الجبير وصفن بالوجوه الصافنه عليه .. لعدة ثواني الكل ساكت حرفيا محد حجه شي ..

مرات الصدمة هلكد ماقوية ميتحملها الانسان و يبدي يتخيل انها وهم او حلم يقظه مزعج وراح يمر بسلام وراحة ويرجع كلشي بسلام ... هيج تخيلتها او هيج ردت افكر بيها بس التوتر بعيونهم والدموع اكدتلي انو هذه محاولة فاشله للهروب من واقعي التعيس

ولاء جانت فوك دتلعب بالغرفة برغم كبر سنها بس جانت طفوليه وتحب تجي عندي تلعب بلعاباتي الضامتهن فوك الكنتور ..

اخويه الجبير هنا جان عمره ١٨ سنه فقط
اجاني وطلب مني اني اروح احجيلها باعتبار اني صديقتها ، والحقيقه هي جانت انو اخويه فعليا مامهيئ انو يكول هيج خبر ولا عنده الفكرة الكافيه شلون يتحمل هيج موقف ..

داليا تبجي : شلون تريدوني اكوللها ماكدر اني !!
الاخ الجبير عيونه مغوركه : الله يخليج مداعرف اتصرف ودادك على امي وابويه ميردون عليه فرق بينا وبينهم ساعة يمكن نايمين بعدهم
بلشو هنا خواتي يبجون
اختي تضرب رجلها : الله يخليك دتصل مرة ثانيه بالرقم بلكت مصابة بلكت بعدها عايشه؟؟ شمدريهم ماتت راسا ..
اخويه الجيير قاطع كلامها و انفعل وحك راسه: داكلكم ماااااتتتت ديكولون ماااااتتتت هو خطيبها وياها ديوصلها وانقتلت يمه انقتلتتتتت خلص
ندارلي وكمل كال : اسمعي داليا خالاتج راح يجون هسه بالطريق اكيد واريد احنه نكوللها بهدوء قبل مايحجولها والله تخترع وتموت من قهرها اذا هجمو عليها بالخبر خل احنه بهداوه نحاول نكللها ويفرك عيونه الكلبت حمره
داليا باعت ريك مسحت دموعها بردنها وكالت : حروح اشوفها شدتسوي

ثكلت مشيتي واني داصعد الدرج شهكاني علت واني اذكر ابتسامت خالتي وحنيتها ومتت قهر من اذكرت شون تدافع لبنتها كلما احد يحاول يتجاوز
غرفتي جانت باخر الممر ، الممر جان طويل كل خطوه اخطيها اتمنى يطول بيه الطريق اكثر ولا اكللها الي راح اكوله ..

وصلت وكفت شويه ختلت ولمحتها تبتسم جانت عندها عادة من تلعب تحجي بصوت عالي ويه نفسها وتتخيل عساس دتلعب ويه مجموعة بنات .. وتتخيل سيناريوهات كامله براسها

دنكت و كرهت نفسي من صفنت وشفت اني وكلماتي حكون الحد الفاصل الي راح يدك بقلب هالبنيه نقطه تحول طول عمرها اني الي راح امحي هالابتسامة وانقللها معاناة راح تعيش بيها طول عمرها ..
دعيت من كل قلبي واني مدمعه وقلبي ديبجي دم وكلت بصوت مخنوك وهادئ : يارب ساعدني وساعدها