انفجار ... انفجار
وصوت بغداد اعلى من اي انفجار
تصيح للعالم بعدني متانيه
عالارض عوفو الجثث وضعي خطير
خاف عبوة تطك عليكم ثانية
سيطرات هواي صارت بالعراق
وشو ماسيطرو بس عالشريف
نريد حاكم ... حاكم مو شرط مسلم يكون
المهم نص ربع قلبه يظل نظيف
وين مانمشي قنابل كافي عاد
كلشي بينه فخخو حتى الرصيف
نزلو سعر البشر حد الدمار بالوطن صار الوضع كلش سخيف
عمى بعين الشعر والفن الجبان وعمى بعين الخاف لتعدمه الحروف
صير ذيب وانذبح موتك عظيم احلى من ما تذبح مثل الخروف
بقلم : هدى الهاشمي
ملاحظه : البارت طويل لان بيه هوايه تفاصيل لازم نحجيها
زهير ..
صارلي شهر وفوك الشهر استلم رسائل تهديد من جهات مجهوله شي على التلفون رسائل وشي يشمروها على السطح وشي بالشغل ومرات يشمرون طلقات بالحديقه مال بيت
بس اني رجال صايم مصلي ومأمن بقدر رب العالمين اكول الي الله يكتبله يعيش حعيش لو بنص النار والي كاتبله يموت يموت لو بأمن نقطه بالعالم
ماخفيكم من اشوف جهالي قلبي يعصرني من الخوف عليهم خصوصا همه مو منا ومرات افكر من جبتهم للعراق جان اكبر خطأ شجابني لهلسالفه ، اباوع لبناتي من يكعدون حوالين امهم العصريات ويسولفون ويكرزون حب ارجف من الخوف واكول منو الهم يضيعون من بعدي.. وارجع الزم سجادتي او اسبح واكول الكاتبة الله يصير
الى ان مرة من المرات دزولي من رقم مجهول رساله فيديو بوكتها جان زمن البلوتوث
دزو فيديو لواحد من اصدقائي استاذ قدير بالجامعة رجال ذهب ينحط ع الجرح يطيب
شادين عينه ملثمين ثنين ودرنفيس بيدهم واحد منا وواحد حفرو راسه حفر وهو بس يصرخ ويكول اشهد ان لا اله الا الل... قبل ميكمل استشهد
نزلت دمعتي مو من الخوف الله شاهد بس لان مجموعة من هيج حثالة لا معروف اصلهم ولا فضلهم يستنكون خيرة اهل البلد ويقتلون هيج ناس واعية ومثقفه بكل دم بارد
أنت تقرأ
( الدخيله )
Kurgu Olmayanعندما يجتمع العذاب والظلم مع الحب المستحيل والألم هنا تكتمل قصة الدخيله ... قصة احدى متابعاتي ترويها لكم من خلال الدخيلة ، فلنسافر بالزمن معها 🤍 اول كتاباتي بأذن الله 🤍
