( الدخيله )

الصفحه الخامسة عشر من الدخيله 🤍

تريد تصيريوسف انت ؟.. الله وياك
قلب يعقوب عندي وراح اتانيك ..💔

بقلم : هدى الهاشمي

داليا -
ثكلت رجلي ودمعت وقلبي يحترك بالالم واني متوجهه للسيارة اخذت نظره اخيره على كل تفاصيل بيتنه الي راح نتركه والمنطقه

صعدت واني جسد بدون روح ..
تركت روحي وذكرياتي وطفولتي هنا ببغداد وبمنطقتنه ..
دمعت عيوني اكثر واني اتذكر شلون جيت لاول مره ... اذكرت شون مجنت اعرف احجي ولا كلمه عربي
اذكرت كل الصعوبات الي واجهتني وشلون بسرعه اتاقلمت وكبرت وكونت صداقات حلوه .. اذكرت خالتي الي ماتت واذكرت بيت بيبي وولاء .. شفت طيف ريماس وتخيلت اني داودعها ..
اذكر وادمع بسكوت ..

بدت السيارة تتحرك بسرعه
داحاول احفظ تفاصيل شكد مابيه ..
اباوع على ابويه واشوف عيونه مدمعه وهو يباوعلي بنفس المرايا

الكل جان ساكت بس احس كل واحد بينه عنده كلام هوايه ضامه ..
كلنا جنه خايفيين من المجهول وشراح يصير ..

الدقايق دتمر ثواني .. فجاة طلعنه من المنطقه وبعدين دخلت مناطق ماعرفها السايق جان يدخل بشوارع ثانويه لان الوضع خطر بهالفتره وجان يحاول يتجنب الشوارع العامه قدر الامكان .. خاف يصادفنه عبوه او انفجار ..

ورة فترة من الزمن قريت لافته بغداد تودعكم .. رافقتكم السلامة .. قلبي عصرني واني اقره اللافته عرفت وصلنه للنهاية ..
فتحت الشباك وباوعت على السما ودعيت الله يهونها ويكتب الخير ..

.....
ريماس -

صافنه دافكر بكل المصايب الي دتصيرلي .. شسويت ياربي حتى اوكع بهيج كارثه !!

عفت الي بيدي وره ماحجت ويايه سندس ودخلت لغرفتي
مخنوكه شهكت بكل علو صوتي وضليت ابجي لحد مادخت حيل كمت بعد ماشوف عيوني غوشت من كثر البجي ..

صفنت وكمت احجي ويه روحي واعاتب نفسي .. اي وتالي شراح يفيدج البجي هسه ريماس ؟؟
!! شكم مره نبهوج وانتي بس تعاندين ؟
شراح تسوين هسه هاا !!!.. شون اذا عرف عنده ولد وشلون اذا اهلج يعرفون بهالموضوع ..
ياربي والله ماعرف اتصرف ياربي ساعدني ..

داحجي وابجي واندكت الباب .. 

ام مخلد : بنتي ريماس فتحي الباب
مسحت دموعي بساع وفتحت الباب ..
ريماس .. ا ا هلا خاله تفضلي .. كالو مريضه شون صرتي والله ردت اصعد لغرفتج وملحكت
ام مخلد مبتسمه : عاذرتج بنيتي .. شبيج ليش عيونج مورمه حبيبتي ؟
ريماس تبتسم : خاله ماكو شي شويه مخنوكه
ام مخلد : حجت وياج سندس مو ؟
ريماس ..: اي ..بس لا عادي سوالف بنات عاديه خاله لتحطين ببالج
ام مخلد : باعي بنتي راح احجيلج شغله جان لازم اكولها من الاول .. تخص سندس ومخلد ..
ريماس مستغربه : اي تفضلي خاله.. وعدلت كعدتي
ام مخلد : بنتي سندس ، من جان عمرها ١٧ سنة حبت واحد  صديق مخلد وكلنا عارضنه بوكتها بس هيه ركبت راسها الا تاخذه مع انو جان اكبر منها ب ١٥ سنه .. مكدرت امنعها واخوانها متسمع منهم
بوكتها مخلد كلها بابا هذا لعيب ومو رجال يضحك على بنات ويعوفهن اني معاشره واعرفه
مسمعت منه .. بس ضلينه معارضين  وبوكتها فات مخلد السجن .. سندس قنعتنه انو خلص السالفه نسدت وراحت
الى ان فد يوم ندور على سندس ماكو ! تالي جتنه  وره ٣ ايام من فقدانها طاكه بجي ومضروبه .. قاطعتها
ريماس .. يااااا خطفها؟؟؟!! شو مادري بهالقصه محد حجالي !!
ام مخلد : محجينه لاحد .. المهم لا مانخطفت راحت تزوجت من ورانه شافتها فرصة انو مخلد ماكو
وهو هم مقصر طلكها بصباحية عرسها .. الله لا يوفقه ..
ريماس فكت حلكها : ياااا عزه !!! ليش خاله ؟؟؟
ام مخلد باوعت ليغاد .. كلها متلزمني الي تروح من وره اهلها وتتزوج اكيد عايبه .. وطلكها من وكتها اخوها من خوفه من الفضيحه عاف كلشي وراح يشتغل بسماوه ..