يوميات فتاة قبيحة

قبيحة العائلة

هاي كايز 👋

معايير الجمال...

الجمال هو نعمة واذا ماعندك/ج هاي النعمة فأكيد الله سبحانه وتعالى منطيك/ج نعمة تعوض عن الجمال

اني الاخت الصغيرة من اصل ثلاث خوات واخ
بالمختصر اني وارثة كل المعايير المو حلوه بالعائلة تبدي من الخشم الجبير والحلك الجبير والعيون الصغار والكصه الجبيره والسنون اللي ممرتبه (عندي سن فوك سن) وهاي غير الضعف اللي مو طبيعي بحيث كل عظامي بارزة وسمرة
الحمد لله على تمام الخلقة طبعا..

بس الناس وحوش
بطفولتي مريت بهواي اشياء وتجارب اللي نكدر نكول اغلبها قاسيه واولها: البارت الفات وثانيها: مشاكل اهلي (بعدين احجي عنها لان يرادلها بارت وحده) وثالثها: قبحي my ugly...

خواتي ما شاء الله عليهن كلهن بيض معدا وحده حنطيه بس الله منطها عيون توكع الجبل
طبعا كلهن حلوات وهذا الشي اللي مموجود بيه

حرفيا كضيت طفولتي كلها والناس الاغبياء يسألوني اغبى سؤال بالعالم "انتي ليش مطالعة على خواتج؟"

جنت انقهر واضوج وماعرف شنو اجاوب فجنت اباع عليهن (ركزولي داحجي على الاناث) واضل ساكتة بس مبتسمة رغم اللي جواية ماعرف اذا جانت مشاعري تبين على وجهي لو لا

المهم مرت ايام واني على نفس الحال  اللي زاد الطين بله هو بمراهقتي والى الان يطلعلي حب الشباب ومو اي حب يعني من هذا الكبار (كلوب😂)

وطبعا احنة حالتة متوسطة وابوية بي نوع من البخل (هو اصلا بخيل) فميقبل ياخذني لطبيب لان غالي 🙂

وجان من يصير حجي وهو كاعد والناس يسألوني ليش متعالجين بشرتج ابوية يكوللهم هي متريد تروح للدكتور 🙂 واكيد ماكدر اكوللهم لا اريد بس ابوية ميقبل فجنت اضل هم ساكتة ومبتسمة

المهم عندي كرايبي من اقرب الناس الي ابنها علساس انعجب بيه وكال لامه اني اريد نيفين ازوجها بس امه حزروا شكالتله؟ كالتله من ضمن النقاط اللي عددتهن انه سمره متفيدك 🖕

واني جنت معجبة بي المهم هو ازوج وحده هم سمره بس خالها راسه جبير بالدولة لذلك بعين امه صارت بياض الثلج 😂😂

بعض الناس صدك عبارة عن وحوش تمشي بالكاع مجردين من الانسانية والعطف يعني طفلة تسألوها هيج اسئلة ليش؟

اتمنى يحسون بالي جنت احس بي ماريد اكول يبجون بكد البجي اللي بجيتة بس اريدهم يحسون ولو بنص مشاعري وانكساري من يقارنوني بخواتي..

عبالكم من كبرت الناس بطلوا؟ لا بالعكس زاد ادعيار كاموا من يشوفون حبوبي يباعون بأكثر نظره مشمأزه مع العلم اكو ناس وجها بي حبوب اكثر مني
واللي يقهرني انه يسألوني كدام كل الكاعدين بحيث كل الموجودين يركزون بوجهي علمود يشوفون وين الحبوب (ماكول بس الله يسامحهن)

ولحد هسه صح الحبوب خفن وداعالج بشرتي (تاركه العلاج صارلي شهر لان الوالد ميقبل ينطيني فلوس😂)
بس بعدهي معاناتي مستمره صحيح صرت ماهتم هواي لكلامهم وصرت اجاوب ومرات احوبتي وقحه بس يستاهلون

لحد هسه اذكر صدمة كرايبي (الي مقبلت تخطبني لأبنها) من عيبت على ممثلة لان سمرة وكالت "تلعب النفس سودة" وي الممثلة جانت تجنن

كتلها شبيها " شوفيها تخبل مو كل بيضة يعني حلوة اكو هواي بيض من بره بس خايسين من جوة ولتنسين مو هي اللي كالت اني اريد اطلع من بطن امي سمرة ربج هو اللي اختارلها هذا الشي" 💪 جنت كلش فخورة بجوابي الها مع العلم من رجعنه للبيت اخذت رزاله من العيار الثقيل من الوالدة 😂😂💪

بس تبقى مواقف شكد ما انت/ي قوية تهزك/ج وتضوجك/ج ومتنسوها ابد لان مجروحين منها

من ضمن هاي المواقف
مره جانت دنيا صيف واني امووت عل السبح بحيث اوصل مرحله باليوم مرتين اطب اغسل المهم جنت داحجي ويه بت خالتي وكتلها احتريت كلش اروح اسبح واجي اكمل وياج وجان جوابها الي "تره مراح تصيرين بيضة من تسبحين" اني بوقتها حرفيا لو جانت يمي جان كفشتها من شعرها

المهم اني حاوبتها كتلها" اكون سمرة ونضيفه وريحتي طيبة احسن من بيضة بس مليانة عرك" 🙂
لهسه احس جوابي مشفه غليلي بيها. 💔

بس مع ذلك الحمد لله حاليا ثقتي عاليه بنفسي كلش ومحد يكدر يهزني بسهولة (ببارت بالمستقبل احجي عن الاشياء اللي ساعدني بزياده ثقتي بنفسي)..

حجيت هواي 😁

سؤال البارت :
شنو اكثر صفة حلوة بيك/ج؟
اني عن نفسي اجتماعية وصريحة

باي 👋