غبت وغيبتي طولت وراح ارجع هم اغيب صراحة اصلا حاذفه الواتباد من جهازي لان ماكو مساحة 😂ولان يلهيني كلش عن دراستي... فمن اريد شي ادخل من الكوكل
المهم مرحلة رابعة 🙂 صعبببببببة متعبة مرهقة مصيرية هذني الكلمات الي ممكن اوصفها بيهن
ضغط عليه من كل النواحي مدالحك وداكضي (اقضي) وقتي كله دراسة اداوم اربع ايام بالاسبوع حضوري ويومين الكتروني. الحضوري اكعد من ساعة6 ويجي الخط بال7 وبال3ونص الظهر يلا اطب للبيت... حرفيا التعب يقرا الف ايامي كلها دوام ارجع انام ساعتين وراها اقرا وراها انام وراها اداوم وهيج...
مريت بكووومة اشياء قسم كتبتهم بالمفكرة مال تلفون وقسم بالدفتر طبعا خليت دفتر اكتب بي يومياتي واني كتبت بس 3 مرات بي وعفته ارغب اكتب هنا اكثر مدري ليش ماحب اكتب ورقة وقلم واصلا انسى اكتب بي بس كتبت بي اشياء حلوه واقتباسات هم ...... بما انه مرحلة رابعة يعني مشروع تخرج وعلى حظي ولا دكتور من الي مخليتهم ببالي طلعلي بالمشروع بالعكس طلعت دكتورة مجنت اعرف اصلا انه تشرف على مشاريع تخرج هذا هم حظي فد متعبتنا ابد متشرح شي النا وذابه كل الشغل علينا وكلش شايله هم للمشروع من وراها لان ابد ممتعاونا وكله بابي براسنا اني وصديقتي الي وياي بالمشروع
المهم هاي السنة يدرسنا دكتور اني مكرشة عليه🙊 اول ايام البنات يكولن نظراتج اله فاضحتج وحرفيا يمه اكون هاااااديه كلش مو نيفين الي اعرفها😂
قبل فترة مدحني لان اخذت درجة كاملة بكوز واني جنت غايبة يمه من عرفت اله شوية وادمع من الفرحة والبارحة هم مدحني كبالي واني غركت بهدومي معرفت شجاوبه اصلا بس المشكلة متأَمل بيه اخذ درجة كاملة بالمد واني صخمت الشرايع صراحة 😭 فيااااااريت لو تندعولي ابيض وجهي يمه وتكون درجتي عاليه كلش وتجيني صدمة
........ من ناحية اهلي هواي مستجدات صايرة اخوية طلع من البيت وابوية ميحجي ويا لا هو يطب لبيتنا ولا احنا نروح لان ابوية ميقبل
وحرفيا ماعدنه ابويه شغله غير هاي السالفه يضل يحجي عليه وعل مرته ومن يحجي يضل بالساعات يعني ياكل بينا اكل
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
هاي هيج يصير بيه من يضل يحجي بنفس الموضوع لساعات بدون ملل
البيت صاير موحش كلش هدوء الطابق الثاني وحدي بي والغرف فارغة
امي اكثر وحدة متأذية لان خطية تضوج وحدها اني لو نايمة لو بالدوام لو اقرا وابوية سوالفة😐 فمحد يمها
.......
نجي من ناحية نفسي داحس بس العمر ديتقدم اما اني بعدني نيفين الي تدور حضن امها صح تغيرت كومة صفات بيه بس مدري بداخلي نقص حنان
من جهة العاطفة ماكو شي بس مرا مر طيف شخص يداوم ويانه وكلبي بوقتها دك وضليت صاااافنه لان لا اعرفه ولا ابد وحتى سلام ماكو بينا وهي مرا وحدة وخلص وصراحة لا ستايله ولا شخصته قريبة من الي ببالي بس مدري ليش هيج صار ومو نقص بي لا الولد مقاصر بس ستايله مختلف عن الي ببالي المهم اني صاير ذوقي مدري شلونه
حرفيا صايرة يعجبوني الكبار خاصه مواليد الثمانينات احس فاهمين ومو نفس جيل هذا الوقت (طبعا مو الكل) بس الاغلب صايرين مدري شلونهم .... بس داحس بي هو نفسه يعني مدري نظراته الي من اكعد قريب منه يتوتر مدري اذا صح لو اني هيج احس
كل ماندار عليه اشوفه يباع عليه مثلا من احجي ويا الطلاب الباقين تجي عيني عليه اشوفه يباوع مترقب ويبتسم دائما اكول لا اني هيج احس بس الي خلاني اتأكد انه مرا اجيت متأخرة للمحاضرة فكعدت ورا اخر شي توتر كلششش وضل كل ما حجي شي يندار يعني احجي ويا الي بصفة هو يندار لو يحجي ويا الي وراية الولد يسوي روحة يباع عل الي بصفي
َومرا قريت عن لغه الجسد وشفت اتجاه جسمه جان ناحيتي (هاي انتبهت عليها اكثر من مرا من احجي ويا الدكتور كراشي اتجاه جسمي بأتجاهه يكون ومن يشرح النا الماده مثلا يوكف عل جهة اليمين اني لا اراديا ادور جسمي عليه😂) المهم مدري اذا احساسي صح لو لا
حبيت اذكره هنا لان بمرور الوقت راح يبين ... .. . طبعا الطلاب الي قبل اذوني وجانوا يخبثون عليه هاي السنه ديصدموووني كلش يعني فد متغيرين يتعاونون وياي ويسلمون عليه وساعدوني وياخذون رايي بالامتحانات وكذا
وكلش فرحانه صراحه بهذا الشي ........
وبسسسس... حبيت بآخر يوم من سنة 2021 اكتب الي ديصير وياي.. هاي سنة كومة علمتني وكبرتني عرفت هواي ناس جديدين ولهم اثر وبصمة بحياتي امثال عمر وعلاء وشهاب وزينة (الي مانسى شلون عاملوني بلطف وقت التدريب). كومة ناس تركتها بهاي السنه (بالاصح هم الي تركوني) مثل هاي كرايبنا الي كالتلي بدون احساس ازوجت وكطعت (قطعت) علاقتها بيه واني فرحانه صراحة لان اجت من جانبها ومرتاااااحة.. وكومة ناس عرفت قيمتهم و انه اني محظوظة بوجودهم بحياتي. غيرت نظرتي عن كومة اشخاص هم. كانت سنة متعبة مريت بهواي اشياء بيها قسم وثقتهم هنا وقسم بالمفكرة وقسم نسيتهم اصلا رغم كل هذا الحمد لله
يارب كون كل سنة نحقق تقدم بحياتنا سواء تقدم بدراسة لو درجة وظيفية لو تطور ذاتي....
