الحلم...... الهدف.....
الفرق بينهن حسب المواقع بكوكل هو:
الحلم هو الشي الي اريد الحصول عليه ولكن بدون السعي إليه.
اما الهدف هو الشي الي اريد الحصول عليه ويمكن احققه بالسعي إليه.
زين السؤال هنا: الحلم ليش ماسعى اله واحققه حاله حال الهدف؟
من احنه وصغار ينطرح علينا سؤال محدد
وهذا الشي حتى احنه نطرحه على الاطفال...
بصيغة ثانية واضحة اكثر
احنه وصغار اهلنا واقربائنا وحتى جيرانه يسألوه النه وحاليا احنه كبرنا وكمنا نسأل الصغار الي نشوفهم نفس السؤال...
شتريد تصير من تكبر؟
بالعراق اغلب الاجابات مال الاطفال تكون دكتور/ة.
ومرات يكون مهندس/ة.
ردة الفعل على هذني الاجوبة تكون اي عفية شطور/ة، ومرات يجيك واحد يكولك لا ميفيدك الهندسة صير دكتور احسن.
زين هذا يسمى حلم او هدف؟
اني من الناس من جانوا يسألوني هذا السؤال جنت اكول دكتورة، مو لان اني احب اصير دكتورة لا
جنت اكول هيج بس علمود احصل ردة الفعل الاولى والمقابل يسكت وهو فرحان ومطمن انه اريد اصير دكتورة.
بالمتوسطة حبيت الكيمياء فجنت اكول للبنات الي وياي اريد ادرس كيمياء وجنت احصل رد مضحك او استهزاء. مجنت احس هذا حلم او هدف
مجرد شي حابه اسوي
بالاعدادية كمت افكر تفكير اقتصادي ونكدر نكول مادي بحيث خليت ببالي كلت اطلع معدل يخليني اقدم على معهد النفط علمود التعيين المركزي.
بس دخلت احيائي من ورا الرياضيات والمعهد جان ضمن خيارات التطبيقي.
بالسادس مجان الي حلم او هدف
جنت مجرد ابذل جهدي علمود ماتندم بعدين والله كريم.
بس من جانوا يكولولي شتردين تصيرين جنت اكذب و اكوللهم اريد صيدلة.
طلعت معدل قليل بوقتها (بالنسبة لمستوايه الدراسي)
جان 79.7%
بوقتها من ردت اقدم فكرت معدلي ميسمحلي اقدم على المهن الطبية واني موزينة بالرياضيات وماحبه فماممكن اقدم على الهندسات
بقالي خيار العلوم و آداب انكليزي و الادارة واقتصاد
بوقتها صفنت وكلت علوم مع انه اني احب الانكليزي
حصلت اعتراضات من الاهل والاقارب لان عفت الهندسة.
بوقتها جان العلوم بدون تعيين وخريجين كليات العلوم يقومون بتظاهرات علمود حقهم بالتعيين
وهذا الشي يشمل الهندسة همين نفس حالهم.
اول جملة حصلتها من اختاريت علوم
كالولي هسه تتخرجين وتكونين حالج حال هذول الطلاب بالمظاهرات فكتلهن الهندسة هم نفس الشي
المهم مضغطوا عليه اكثر
وخليت خيار العلوم قبل الهندسات والادارة واقتصاد.
بسنتي جانت المعدلات كلش عاليه بحيث كلت مستحيل اطلع علوم ولا هندسه فراح يطلعلي ادارة واقتصاد
أنت تقرأ
يوميات فتاة قبيحة
General Fictionجوانب مظلمة من شخصيتي + سوالف ودردشة + طفولتي + يومياتي + هاي السوالف راح تكون +16
