يوميات فتاة قبيحة

شخصيتي

على مر العصور والازمان الناس تشوفني مغرورة
لان للاسف تعابير وجهي توحي انه اني معاجبني العجب..
خاصه اذا جنت داقابل ناس اول مرة اشوفهم وميعجبوني حرفيا تعابيري تصير نفس الصورة مال البارت 😂😂

واذا جنت صافنة عادي ابين انه اني مخنزرة وضايجه مع العلم انه مزاجي عادي بس هيج تعابيري وماكدر اغيرهن ابد لان تطلع لا ارادية مني....

ونظراتي للاسف انه هي حاده بحيث من اباع على وحده زميلة وياي عبالها دانتقص منها
ودائما اتخلة بمراقف مزعجة من وره نظراتي وتعابيري لذلك اخذت قرار انه اكون مبتسمه بس مع الاسف ماحس على نفسي 🤦🏻‍♀️

يعني ابسط شي بالمختبر صديقتي تحب التصوير فتصور فيديوهات عفويه وضمن هاي الفيديوهات اطلع اني مخنزره على الدكتورة لو اباعلها بطرف عيني (مع العلم جنت مركزه كلش وياها) بس مدري ليش نظرتي هيج تبين

وهذا الشي اكتشفته من دخلت جامعه (يعني بوقت كلش متأخر)...
ابسط شي جنت ارجع تعبانه للخط (السيارة اللي توصلني من الجامعة للبيت) السايق والبنات يكولولي شبيج ضايجه واني كلش استغرب اكوللهم كلشي مابيه وميصدكون 😂😂

وغير انه مره جنت اباع على زميلة الي بالجامعه وكالتلي شبيج هيج تباعيلي ورادت تتعارك لحد مبنية كالت هي نظراتها هيج فمتقصد شي عليج بوقتها ضليت صافنة كلت معقولة اني هيج ومادري بروحي..
وايقنت بعد فترة انه هاي اني وماكدر اغير هذا الشي بيه...
ولهذا السبب اهلي يسموني (مطنكرة) يعني معبسة
وعبالهم انه اني اربع وعشرين ساعه ضايجه ومتكأبة بس اني لا يكون مزاجي عدل وزين وشكد ماحاول اشرحلهم هذا الشي ميستوعبوه لذلك كمت ماهتم اذا عيبوا عليه..

......

بنفس الوقت اني ويه المقربه منهم واللي ارتاحلهم غيررررر بحيث احجي هواي واضحك هواي واحاول اضحكهم هواي
لذلك الناس تحسني اني بوجهين بس لا عاي طبيعتي هيج ويه اللي احبهم...
هاي غير انه دائما دائما اخلي روحي بمواقف تفشلني سواء ويه الدكاتره لو ويه الطلاب
واضل افكر هسه هم شيكولون عني بس بعدين اكول انه اني مراح اكدر ارضي كل الناس لذلك اتصرف بطبيعتي أحسن من التصنع

هواي امرار الناس يستغربون مني لان اني صح مزاجيه اعترف ومودي يتغير بالدقيقه خمس مرات بس تعابير وجهي زايده الطين بله (مأزمه الوضع اكثر) 😂🤦🏻‍♀️

وبس
خلصت افكاري
سؤال البارت اللي محد يجاوب عليه غيري:

شكد تقيمون نسبة المزاجية عدكم او بشخصيتكم؟
اني 75٪
بااي