يوميات فتاة قبيحة

العيد

هاي...

مثل كل عيد بالعراق نعيد بانفجارات واعداد شهداء العيد تزيد وتزيد كل سنة.

بس رغم هذا نجور ونبلع الالم بقلبنة ونعيد..

نحاول قدر الامكان نذكر فرحة العيد واحنه اطفال ماعدنا هَم غير شوكت نروح نعايد ونحصل عيدية..

رغم انه محاسين لا بطعم عيد ولا بطعم فرحة بس نرسم الابتسامة على شفايفنا واحنة نعيد اهلنا

فبكل ابتسامة احب اكولكم ☺️
كل عام وانتوا بخير
صحة وعافية يارب🤲
وينعاد عليكم بالامل والسعادة وراحة البال
يارب يفرج هَم كل شخص مهموم، ويسعد قلب كل شخص حزين، ويصبر كل فقيد، ويشفي كل انسان مريض، ويشفي كل شخص جريح.
عسا الجاي يكون افضل واحسن 💛

لكل ام شهيد و زوجة شهيد واخت شهيد وابنة شهيد
لكل اب شهيد وزوج شهيدة واخ شهيد وابن شهيد
ماكو احلى من العيد واحنا يم رب العباد..
بمكان مابي لا مصالح ولا نفاق ولا قهر والاهم ماكو ظلم.

.........

بخصوص كورونا الحمد لله الكل تحسن
قبل اسبوع جان الكل مصاب عدا اني واختي بالله اختي مناعتها قويه اما اني لان عار كلشي ميصير بيه
والحمد لله هذا الاسبوع الكل مسحتة جانت سالبة
عدا الوالدة بعدهي مصابة اندعولها

جنت ملتهية لان بنص خبصة كورونا اجه اسبوع كل يوم عدنه بي امتحانين او ثلاثه بعدين بدت الالكترونيات وهسه دنحضر للفاينل الحضوري لان ورا العيد مباشرةً

مع العلم صارلي يومين ساحبة على الدراسة لان شوية مريضة

اندعولي افهم واحفظ بسرعة لان موادنة صعبة كلش

ولتستهينون بالمرض صح اجت فتره كورونا جانت خفيفه بس هسه لا كلش قوية واعداد المرضى هائلة ومو اي احد يتحملها هوايه ناس توفت من كرايبنا ومعارفنا وهواي انصابوا، الكمامه مراح تأذيك/ج اذا لبستوها من اطلعون واذا تأذي اذانكم اكو تلبيسة الها تخلوها بحيث متضطرون تخلون الكمامه ورا الاذن ومن تتمشون لو تضلون بمكان وحدكم نزعوها اخذوا نفس، والبنات اكيد اكو مكان بجنطتج للكحول الصغير لو المعقم الصغير يفيد سواء كورونا موجوده او لا صح هذني اشياء بديهية بس لازم بين فترة وفترة نذكر نفسنه بيهن لان ننساهم ونغفل عنهم.
وقللوا من زيارة الاقارب لان اني ابسط مثال اجت كورونا من جمعات الكرايب وبس.

كل الحب الكم ♥️🖤
👋