يوميات فتاة قبيحة

نسمة اعجاب

هاي يا اني ويا صديقتي الوحيده 👋

المهم كملت اول امتحان صارله ايام ومستمره اقرا صحيح مو نفس قبل بس داقرا خاصه سعياتي عاليات..
المهم مدانزل لان هم رمضان مداشبع نوم ابد وهم قلق وقرايه امتحانات

الامتحان الجاي يوم الاحد ليهسه مكمله بس جابترين الا كم تعريف علساس هسه اقراهم قبل السحور ومتعاجزه وبقالي 4 جابترات مدري اذا الحك اكملهم لو لا خاصه واحد منهم ابد مفاتحته💔😢

المهم بيوم امتحان العضويه جنت كاعده اني وصديقاتي دنراجع واني منطلقة
ومن انطلق ماحس عل روحي 🤦🏻‍♀️

المهم انتبهت عل غفلة المسطبات انملت طلاب وجانت اكو وحدة قريبة علينه كاعدين عليها شله طلاب ولد
طبعا اني استحي اباع بالعيون حتى من يحجون وياي ماباع بعيونهم خاصه الولد بشكل عام
يعني ابويه واخويه ضمنهم ومادري ليش
المهم اني من لمحتهم طبيعي اباع عليهم لكيت واحد كاعد كبالي واجتي عينه بعيني اني راسا درت وجهي سويت روحي ممنتبها واستمرين اسولف ويه البنات

بعدين مدري ليش هم باوعت عليهم وجان الكا بعده مستمر يباوع
اني عموما اكره النظرات لان لو احسها انتقاد لو نظرات وصخه وتكون فعلا هيج
بس هذا الصراحة شفت نظرته تختلف وماعرف شلون الاختلاف بس مو نفس النظرات الي كل مره تجيني
المهم رجعت كملت انه ممنتبها وصراحه تندمت لان عيونه ونظراته ابالي من يوم الاحد والمشكلة ماعرفه ولا اعرف بيا فرع من العلوم ولا يامرحلة بس اكيد مو اولى او رابعه لان نظامهم فصلي وكاعدين بالبيت

اكدر ابحوش عل الاقل اعوف يا فرع ويا مرحله داوموا الاحد بس ماريد انطي لروحي امل كاذب
خاصه انه عندي خوف من الارتباط

بس لان طاكني الجفاف حاليا 😂😂😂🤦🏻‍♀️

المهم خل اوصفه
معرف اذا طويل لو قصير بس بنيته عادية يعني مو ضخم اوفر ولا ناعم و ابيض عل حنطي يعني ابيض من درجه بشرتي بشويه و منتبهت اذا عنده لحيه لو شوارب لان استحيت اباع عليه بس شعره اذكر جان نفس الستايل الي احبه يعني زيان عادي مو اوفر نفس الباقين وجان لابس ازرك

اني الثوله من الربكه بوقتها قبل نص ساعه رحت صعدت للامتحان من التوتر

ادري يحظي ابقي شويه تمعني اكثر بس الجبانه اصلا مترفع عيونها 🤦🏻‍♀️
شكد مأني جريئة بمواقف وماستحي وارزل واوكف بوجه رياجيل مو بس رجال واحد بس بهيج مواقف من يعجبني احد لو احس انه ديباع عليه انثول

المهم الشي الي مضوجني انه صار حجي وسوالف ويه امي ومرت اخويه وعرفت انه وحده نعرفها انخطبت لواحد من الكليه
وجان امي تكول اي جابتة من الكلية شكد عيب وشعجب اهلها قبلوا احنه ماعدنه هيج شي اني هنا انصدمت خاصه انه مره كالتلي ماريد انطيج لكرايب لان جربت بخواتج ومرتاحن
المهم كتلها ليش عادي وموشرط انه بالكليه يعني اكو علاقة بينهم يجوز اخر شي اجه خطبها لو بالصدفه شفها....

طبعا معبجها الحجي وكالت اي بس يبقه غريب اني هنا حرفيا ضجت كتلها يعني الا كرايب وعرف وانتي مو كلتي الكرايب مو خوس وخواتي الدليل ممرتاحات جان تكول يعني تردين من الكليه تجيبي؟
حسيت السؤال كفخه الي 😂😂😂
كتلها القصد يعني اذا صار واجه واني مجنت اعرفه وانتي تدرين بيه ماعندي هيج سوالف تقبلين
تبلعمت وكالت ابوج واخوج ميقبلون 🙂

حسيت انه اذا صدك صار انه هي الي راح تقنع بأبويه ميواقف 💔

وهذا اكبر سبب يخليني اخاف انطي امل لروحي لو انطي للمقابيل فدائما بس احس انه بده يصير اعجاب سواء مني لو منه انسحب 💔

الصراحه خفت لان ماريد كرايب مابيهم حظ ابد واصلا كلهم كبار ومزوجين لو بالنجف ولو اموت ماروح للنجف لنص النفاق

اني احلامي وطموحاتي ميكدرون الكرايب يوفروها ابد لان عقليتهم وافكارهم كلش تختلف عن عقليتي  وتفكيري ويا خوفي يجي اليوم الي اهلي يرفضون الي يعجبني بس لمجرد انه هو غريب

كملت
داريد احجي اكثر بس صاحولي اساعد بالسحور
جنها امي تريد تسويني نادره علمود تزوجني
البارحه تكول عنرج 21 خواتج ازوجن قبل عمرج
(متذكر الجبيره عمرها 25 من ازوجت🙂)
مع العلم هي امي اكثر الاحيان تكولي توظفي ولتزوجين مادري شبيها هاي الفتره

وابويه ميريد يفتح غرفه لمخزن لبنات اخوية يكوله لأخوية بعد فد سنتين ونيفين تزوج واخذوا غرفتها للبنات 🙂😑

اخخخخ لا تعليق

باي 👋