اليوم فد انقهرت عل روحي
خابرني رزلني بالسيارة كدام الكل
والسبب جان انه ليش من طلع مرحت كتله راح اروح وياهم
وهو اصلا كلنا رايحين وهو يدري راح اروح وياهم بس يريد شي يرزلنا عليه وينكد علينه الطلعة
والدليل خابر اخويه همين ورزله عل ٣ مواضيح كل موضوع ماله صله بالثاني
المهم
كوه لزمت دموعي لان مردت ابجي كدام الكل وكدام الجهال
بس بين عليه
واني اصلا جنت كلش متحمسه من داخلي للطلعة مع العلم طلعه عاديه لبيت كرايبنا وكل مرا ماتحمس هيج بس سبحان الله باليوم الي تحمست بي هيج يصير
المهم ضليت كاعدة هناك وكل شويه تاخذني الصفنه وعيوني تنترس دموع وادارك الوضع علمود مينزلن
وامي من ضمن السوالف كالتلهم هو هسه بالسياره خابر لنيفين رزلها ليش رايحة وياهم
وهنا لحظه صمت
ونظرات الشفقه من الكل عليه.
ومن رجعنا كال لامي خل تجي احجي وياها
ومرحت لان ادري راح يعيد نفس الحجي الي جان بالمكالمة
طبعا هذا كله وهو يشاقة ويا الناس ويسولف ولا عبالك هو نكد علينا الطلعة
ماعرف شكول علمود اعبر عن الي داحسه
مرات هلكد ما الواحد يكون ضايج ومنكتم يحس بفراغ
حرفيا هسه اني داحس بفراغ داخلي
بس اريد ابجي وخلص
مع العلم اني اصلا البارحة جنت منهارة من عنده
وكلت اليوم بداية جديدة
بس نهايه اليوم مجانت جديدة.
لكل واحد يعاني من ورا شخص بحياته
وهذا الشخص ميكدر يتخلص منه
فخل يكون بداخله ايمان انه راح يجي اليوم الي يخلص بي من هذا الشخص
والمهم من يكبر ليكون نفس هذا الواحد
أنت تقرأ
يوميات فتاة قبيحة
Ficción Generalجوانب مظلمة من شخصيتي + سوالف ودردشة + طفولتي + يومياتي + هاي السوالف راح تكون +16
