يوميات فتاة قبيحة

كورونا

هاي..
بعد احداث اخر بارت طلعن المسحات وكلهن سالبة عدا اخوية وبنته الصغيرة مصابين

حجروا روحهم ووياهم مرت اخوية لان بنتها صغيرة

هذا الحجي يوم الاحد
وراها ابوية راح اخذ مسحة وطلعت يوم الاثنين والنتيجة جانت موجبة...

هو قبل اخذ تحليل دم وكال اني مومصاب
فمن شفنة المسحة مالتة ناشريها وموجبة رحنة طكينة صورة للتحليل مالتة واخوية دزها لصديقة محلل
وكال انه عندة اصابة...

ومن كال اخوية هذا الكلام اله يلا اعترف وكال اي كالوا عندي خفيفة😑

دخلنة بحالة انذار

اني ماعتقد حاجية عن ابوية
يرادلة عشرين بارت علمود اطلع الي بكلبي
الي اكدر هسه اوصفة انه ابوية نسخة مموجودة مثلها بالعالم كله
مثل صدام مجان اله نسخة وهتلر هم ابوية مثلهم

هذا الحجي اني امتحاناتي فوك راسي
علساس باليل اقرا ومكدرت لان عرفنه هيج بأبويه وكعدنه نحجي ويا ثاني يوم علساس اكعد بال6 اقرا
نمت وتلفوني صامت وكعدت بالعشره لكيت صديقتي حاركه التلفون عليه لان فاتني الامتحان الشفهي
اول مكعدت رحت للدكتور حجيت ويا وقبل يمتحني
وراها عقمنه كل البيت لحد منكسر ظهرنة اني واختي
وراها قريت شويه وامتحنت ثاني امتحان ورا بنص ساعة امتحنت ثالث امتحان
والامتحان الرابع علساس بال9 نزلت الاسئلة ساعة 10:45 😑

يعني ماعرف افكر بوضع اهلي ماعرف افكر بالامتحانات
حرفيا وضعي مزري

غير ابوية وخباله علينه
مخلي دابه وداب اختي وبناتها وهي اصلا اغلب الشغل عليها وزين متحمله ضاله يمنه تساعدنه
لان اذا راحت راح ينذب كلشي براسي
فوك ميشكرها لا يضل ينك براسها ويدردم

هاي غير كل شويه صايح النه يدردم عل خواتي الباقيات لان ميخابرنة وهن اصلا مو بحالنة ثنينهن مصابات وشحالهن

اوف الحجي ميخلص شكد مداحجي مدارتاح

ماعرف شلون امي تحملته لمدة 32 سنة ماعرف هذا الصبر امين اجاها وتحملت
لا معاملة يعاملنة عدل ولا اسلوب بي حظ ولا لسان حلو ولا شي
مكضيها عياط وصياح وزرايل وسب وشتم وتكفر وسخرات

المهم حاليا اني نحول والم ظهر من ورا الشغل وصداع من ورا ابوية
اختي صداع ونحول وصخونة
بناتها وحدة مصخنة وحدة تكح
اخوية يكح (كالوا ميطلع عليه اعراض هواي لان مصاب قبل اربع اشهر وصاير زين)
بناته وحده مصخنة وحده مابيها شي
مرته فاقده الشم والتذوق
امي نحول كلس قوي
اعتقد كلنا مصابين بس اني لا لان عار 👁️

المسواك والادوية كلها اصدقاء اخوية يجيبوهن النه

علساس ادردم بعد هنا بس تعبت وراسي ديأذيني مابيه اذكر واقهر روحي ازيد
هاي غير علساس اكعد اكمل محاضرة كيمياء حيوية بس ماعتقد راح اكدر لان عيوني هم كامن يوجعني والم ظهري ديزيد

الايام الجايه كلها لو امتحانين لو ثلاث امتحانات بنفس اليوم ويكونون شفهيات ومدات

وبس..

تصبحون على خير..
اندعوا الله يهدي ابوية ويخلي يكعد ساكت...