يوميات فتاة قبيحة

إلى أبي...

كلماتي راح تكون قاسية وراح احاول اكتب كل الي بقلبي علمود ارتاح ولحد يلومني على كلماتي لان يستحق كل كلمة...

من اني طفلة مريت بأشياء المفروض الطفل ميمر بيها من ضمن هي الاشياء هي التحرش الي ذكرتة قبل بالبارتات السابقة، ومن ابرز هاي الاشياء هي ابوية..

الي اذكرة من طفولتي المأساوية هي جنت اتأتأ من اني وصغيرة يعني حتى بالمدرسة وماذكر احد ينتقص مني لو يعيب عليه غير ابوية.

جان يعيط عليه ويكولي احجي سريع عبالة بالصياح راح يتعدل كلامي..
بحيث ثقتي بنفسي من اني وصغيرة صفر من ورا
من جانوا يجونه خطار واسولف جان يضحك عليه لو يسكتني ومكرهتة لان مجنت افتهم بس جنت اضوج واسكت،

جنت اخاف من الظلام واخذتها للكبر وهو جان يسخرني بالظلمه ويعيط عليه من اكوله اخاف،

كبرت سنتين (ثاني ابتدائي ٧ سنين)
لاحظت امي بيوم وليلة ملكيتها موجودة ماذكر شنو سبب العركة بس الي اذكرة انه راحت زعلانة لبيت جدي وبقت شهور،
اذكر اختي الجبيرة جانت جامعة وجنت اشوفها تبجي واذكر خواتي الاصغر عازلات نفسهن واذكر اخويه يطب للبيت راسا يصعد لغرفتة واذكر بت عمي الي رابيه ويانه هي الي جانت تهتم بيه

اذكر ابوية من جان يكعدني بحظنه ويحجي وياي يكولي امج متحبج وعافتج لان تكرهكم كلكم ولو تحبج جان معافتج هنا ومن هذا الحجي
وجان يكولي هي تخابرج؟ تخابر اختج؟ منو يحجي وياها وشتكول؟

لان جان مانع اختج واخويه الكبار انه يحجون وياها ويتواصلون والصغار اصلا مجان عدهن تلفونات.
جانت اختي الجبيرة تخابر امي تحجي وياها وتخلي خواتي هم يحجن وياها بدون ميعرف ومره خلتني احجي وياها وبوقتها جانت امي على التلفون تبجي واني كمت ابجي اكوللها اشتاقيتلج..
وثاني يوم نفس الشي خلاني يمه ياخذ مني حجي وبوقتها اني بكل برائه وثواليه كتله اي حجيت وياها وتعارك ويا اختي وعد مخلانه نحجي وياها
لحد مراح هو جابها واخذني ويا
بوقتها طبيت لبيت جدو وبيبي مقبلت تبوسني لان بنته وابويه اصلا مقبل ينزل وطلع جدي يسلم عليه وهو اصلا منزل من السياره هذا كلة ومجنت اكرها
المهم رجعت امي

ومن هنا بديت انتبه على المشاكل
مجان يمر يوم من غير مشاكل
صح مجان يمد ايده بس يعيط ويرزل
ويعيد بنفس الحجي بدون ملل
هنا بديت اكرها
زادن المشاكل وكام يتعارك ويا خواتي هم وويا اخويه هم
ومشت حياتنة هيج

لحد مصرت ثالث متوسط وطرد امي من البيت
جانت بنت عمي يمنه بوقتها جانت مزوجه وجايه تزورنه وجانت اختي الجبيرة هم مزوجة والثانيه مخطوبة
ونعادت المأساة

واثرها زاد عليه لان جنت واعيه وافهم
وشهر زعلت امي
وبعدين رجعت
هنا بديت احس انه كلش بخيل
مينطي حقنه ابد
ولا يوم شفته انطا لامي مصرف الها
احنه من نريد شي يتعارك ويانه وينطي قليل
بكل عيد عركة
بكل موسم مدارس عركة
بكل شتا عركة
بكل صيف عركة
تعقدت منه وكمت اكره كل الرياجيل الكبار وكل الي بنفس الهيئة مالتة
جنت من اشوف رجال جبير بكدة وحباب اكول هاي نفس بابا كدام العالم شكل ويمنه غير اكيد يرجع للبيت يتعارك ويا اهله (عبالي هذا الطبيعي)
جان وليهسه ابوية كدام الناس حباب ويشاقة ويانا ويصرف علينا وممقصر ابد وكله يضحك ويمنه جان ينكلب فرعون