بدلت وكذا وطلعنا اني وامي من البيت رحنة نفرات طبعا همزين ميتيه الطريق
وراها وصلنا للمستشفى وجانت وحدة (صديقتي بس مو كلش مقربة) هناك تنتضرني وكعدنا ننتضر صديقتي الي سهرت وياها
اجتي هي وابوها فد كيووت ابوها حتى وجها بشوش ويبتسم
المهم رحنا وضلوا كل شويه يدزونه عل فلان دكتور وفلان واحد علمود التواقيع
اخر شي كالوا اليوم باشروا بس يوم الاحد يقسمونا على المختبرات ويحددون الايام الي نجي بيها للمستشفى لان اكو كورونا فيخافون علينا مو كل ايام الاسبوع انداوم
وقعنا حضور واخذنا ورقة يقيمونا بيها اخر اليوم ودزونا لمختبر الكيمياء السريرية
طبينا للمختبر لكينا ام المختبر دتشرح وكاعدات 3 بنات يمها كلنالها مرحلة ثالثة جان تكول انتبهوا على الشرح وكملت
طبعا احنا ضلينا فاكين حلكنا حرفيا لان كلشي منعرف كضيناها بالجامعه ندرس اختصاص كيميا مو تحليل فهذني البنات يتفاعلن وياها ويجاوبنها واحنا صافنات عليها همزين لابسين كمامات جان انفضحنا 😂
المهم شرحت انواع التحاليل الخاصه بمختبر الكيميا يعني مثلا تحليل الدم يصير بمختبر ثاني اما تحليل الدهون الثلاثية يمنه بالكيميا وهيج بعدين سوت كبالنا تحليل نسبة الحديد بالدم واحنا بس نتفرج وكلشي منفهم ونستحي نسأل لان هذني البنات كلشي يعرفن طبعا احنا (اني وصديقاتي) كلنا هذني اكيد كيميا مثلنا بس يعرفون وداخلات من قبل دورات لان ممعقوله هيج يفهمن واحنا لا
تالي بعدين سألناهن للبنات وطلعن هن قسم تحليلات يعني يعرفن لان هذا اختصاصهن هنا ماحجيلكم عن الراحة النفسية الي حسيت بيها 😂
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
بعدين ضلينا نطك صور بالممر 😂😂 لحد مطردونا كالوا لتوكفون هنا لان كورونا وكذا
طبعا المستشفى جبيرة وتدوخ تيهنا امين نطلع 😂 اخر شي وصلنا لصالة الولاده ودخلنا الها بدون مندري وطلعنا نضحك شافنا ولد يطلع ثلاثينات يمكن منتضر مرتة تجيب كال منا الخروج 😂😂😂😂
عاد طلعنا اجه ابو صديقتي اخذها والثانية رحنا اني وياها نفرات (عبرية) بس كل وحدة سيارة لان مو نفس المنطقة
اول مرة اصعد نفرات وحدي جنت كلش متوترة والناس تباوع عليه لان وحدي ولازمة لابكوت (صدرية المختبر البيضة)
ورجعت للبيت
ها طبعا شفت كومة نماذج بالمستشفى منهم زاحفين هواية وكومة طلاب تطبيق
الي يضحك كلهم لابسين اسود على محرم واني رحت لابسة بنفسجي جنت نشاز بينهم 😂😂
........
هاي اليومين الفاتن جنت دابحث عن التحاليل وكذا لان لازم يكون عندي على الاقل اساسيات مع العلم احنا غلطنه مكلنالهم كلشي منعرف لذلك عبالهم نفهم كلت يوم الاحد ان شاء الله اكوللهم تره كلشي منعرف فشرحونه شويه شويه
وكلت اسأل عن سحب الدم لان لازم نتعلم شلون نسحب دم 💉
وكلت ابحث عن هواي اشياء واسألهم استفاد منهم لان ابوية مومال يخليني بدورات مال تحاليل عليابو منو يوديج خاصه الدورات تكون بمناطق بعيدة وبفلوس ولو يعلمون لو لا فكلت استفاد من هاي الفرصة احسن
وبس ابوية اليوم حجه وياي بس طبعا من ورا خشمة اجه كال شمسوين غدا وجاوبتة بعدين رحنا اني ومرت اخوية للمكتبة فكتلة راح نروح للمكتبة طبعا كالعادة مغلس مكال شكد تحتاجين واني زادن فلوس عندي من رحت للمستشفى فمحتاجيت منه اشتريت دفتر جبير كتبت بي كم شي ولونتة علمود يصير حلو وينطيني واهس اقرا (الصوره مال البارت) وسويت قناة خاصه الي بالتلغرام علمود اخلي بيها شكو شي يفيدني بالتحاليل واشتريت دفتر نوت صغير وقلم علمود اكتب ملاحظات هناك
غلسوا على خطي بالصورة ادري بي تعبان الله يساعد الدكاترة شلون يفهموا من يصححون 😂
طبعا ابد مجنت متحمسه للتطبيق بس بعد اول يوم صح جان عادي بس من بحثت عل التحاليل صار عندي واهس وحبيت المختبر
