يوميات فتاة قبيحة

نفاق

حرت شنو اخلي العنوان
حرت بين نفاق وبين وحوش.....

عايشين بزمن واحد ينهش لحم الثاني
زمن يخلي الاخ يقتل اخوه
والاخت متفكر بأختها
وام تنسى ضناها
واب ينتقم من ولده
عاد شننتضر من الغريب؟

كلنا عدنا ذنوب
وكلنا غلطنا بحق ناس
وظلمنا ناس
وقهرنا ناس

بس شي عن شي يفرق.....

الثقة بهذا الزمن لازم تكون معدومة
حتى مع الاهل

الواحد لازم ميثق بأحد

مهما يبين عندك هذا الانسان فقير وملاك وغير مؤذي
راح يجي يوم ويأذيك

لتتوقع شي زين من اي شخص مهما يكون هذا الشخص مقرب منك

بهاي الاسبوعين عشت حالة من عدم الثقة فضيعة
كرهت كل الناس
كرهت الجامعة
كرهت الدفعة
كرهت اهلي
كرهت نفسي

من شخص جنت تندعيلة بصلاة الفجر
شخص جنت تنقهر عليه
شخص جنت متغار منه
شخص جنت تمدحه
والاثبات بالبارتات السابقة مادحته

بيوم اكعد من النوم الكا صورتي بكروب ووياها فشار مينلبس عليه ثوب
وبنفس اليوم اكتشف وحده من المقربات الي تدري انه من قبل سنين هذا الشي يصير وساكته
سنين واني تنجاب سيرتي بالموزين وساكته
لا اجتي الي تحذرني ولا تركت الشخص وجماعته
بالعكس ضلت ويا وتسلم على جماعته الي يشاركوه بالحجي عليه وعلى صديقتي

وتالي تجيني بكل برود تكولي اي من سنين هم هيج يحجون عليج بكروب خاص بيهم

من ربي فضحه كدام كل الدفعة محد دافع علينا وكال حرام وعيب هذا الحجيالكل سكت عدا كم بنية ينعدن على الاصابع

كل المقربات مني ومن صديقتي سكتوا والتزموا الصمت

وثاني يوم بكل برود يجون علمود واجبات وتقارير

ومن نواجهم يكولون المشكلة بينكم وبينا احنه معلينا

اذكرت كم صورة الي هيج صاير بيها واني مادري؟
كم موقف صاير كبالهم مخليهم يحجون عليه من يرجعون للبيت؟

هذولة كوم واهلي كوم ثاني
من امي الي ساكتة متكول شي
الى خواتي الي يكولن انتي ليش طاكه صورة جماعية وهي الصورة مع دكتورة ويانا وكل الطلاب بيها

جنت منتضرة منهم كلمة تطبطب عليه

الظلم الي عشته وداعيشه راح يضل اثاره وياي طول العمر

اباع على البنات الي وياي
ابد ميصيحني بأسمي
كلمة دلع لو حبي وحياتي وحبيبتي....
تالي محد وكفت وياي

اباع على الشله الحجوا علينا
مسوين روحهم ببداية السنة يساعدونا
وسلمون علينا
تالي هيج يحجون بضهرنا

اباع على اهلي وخواتي
المفروض سندي
تالي يكولن واذا نشروا صورتج وفشروا عليج عادي

هذا الموقف خلاني اصحى على النفاق الي عايشه بنصه اني

ماعرف هذا يا حظ الي خلاني بوسط هيج ناس

اخر كورس بآخر سنة الي
هيج يصير
كل مخططاتي خربن
جنت ناويه اسوي كل الفعاليات ويا الطلاب
بعتبار ذكرى يبقة

ردت ذكرى تذكرني بيهم
ربي خلاني بهذا الموقف
الي راح يخليني طول العمر اذكرهم

بس بذكرى تختلف عن الي جنت متخيلتها

هسه من اكوللهم لتثقون بأحد اكيد مراح تاخذون كلامي بجدية
بس اتمنى لو واحد بس يقرا هذا الكلام انه يصدك بحجيي بأن الناس كلها منافقة

احنه نوعية من الناس انخلقنا علمود الناس تكرهنا
من ناحية الاقرباء الكل يكرهنا
بالمدرسة عشت بكره من قبل الي وياي
دخلت جامعة عبالي تغير الوضع.. طلع نفس الشي
واكيد بالمستقبل وبالشغل هم نفس الحالة

واجهت الي حجه عليه
واعتذر مني
بس بعدها حرگة گلبي ممطفية
كل ماصفن اذكر الصار

كلت مادعي علية لو على اخته خطية
بس اليوم دعيت

حرمني من كلشي جان بنفسي
خلاني اعيش بخوف انه شمسوي بباقي صوري

متأكدة حركة كلبي راح تطلع بي
وان شاء الله تطلع بأكثر شي عزيز عليه

ارجع واكول توقعوا كلشي من الناس
لتتأملون بأحد

الثقة خلوها تكول صفر بالداير مدايركم

وعن تجربة داحجي هذا الشي

اتمنى يرجع بيه الزمن للمرحلة الاولى واعزل نفسي عنهم

احمي نفسي منهم ومن شرهم

شالفائدة هسه؟

الموقف ككل اثر بية نفسيا ودراسيا بشكل فضيع
ماعرف لشوكت اضل هيج

محد يدري بهذا الشي
الناس واهلي عبالهم موقف وانتهى
بس بالحقيقة ليهسه بكل غمضه عين اذكر الصار

هذا الشي مو بيدي

اليوم شفت صور الطلاب بفعالية اني انطيتهم فكرتها ومرحت خوفا على صوري
لان الكل دينشر بصفحات عامه محد موحود يسكرن الصورة ويحجي عليهم مثلي ومثل صديقتي

من شفت الصور رجع القهر والوجه
والمشكلة جسديا هم اثر
راسي يوجعني
ذاني بيها صوت وشه قوية
ومعدتي تعبانة

الحمد لله على كل حال
اهم شي جنت مظلومة مجنت ظالمة
ربي يتخذ حقي منهم
ومن كل واحد اذاني
سواء بهذا الموقف لو بغيره

كونوا بأمان
باي
مراح ارجع اقرا البارت علمود الاخطاء الاملائية لان لازم انزل جوا وامثل انه كلشي مصاير وياي
واذا اقرا راح ارجع ادمع

عذروني على الاخطاء