{الفصل_الرابع}
{#وقد_كان🌷}
_حسان قال لي:- خير في شنو..حلمتي بشنو؟؟..بقيت ماسكه فيهو قوي وبرجف لمن اسناني بتتضارب💔...قولته ليهو بصوت مرتجف وحزين:- حلمتا...حملتا إنو ماما واقفة في مكان كله شوك..ووشها لونه رمادي وضعيفة شديد💔ماف شي واضح غير ملامحها..وعلى الجانب التاني واقفه أنا في نجيلة خضراء وشايلة حافظة موية..هي كانت بتتوسل لي عشان أديها موية وأنا كنت برفض💔..حسان انا ما أديت ماما موية..وبقيت ابكي بصوت عالي..أبداً ما حاول يسكتني..ساعة انا ببكي وبنادي بأسم أمي💔..لما هدأت حسان قال لي:- أكيد الحلم ده عندو نفسير..صدقيني..بكرة من الصباح نطلع أنا وإنتي..بعرف شيخ اسمه عبد الحليم كان بدرسني في الخلوة..زول بركة❤أكيد ح يعرف يفسر حلمك ده...بقيت أبكي واقول:- يعني هي عطشانة والمفروض أنا أديها موية وانا كنت برفض..شنو السبب الخلاني في الحلم أرفض أديها موية💔..قال لي:- بكرة كل حاجه ح تبقى واضحه..حالياً نومي طيب❤..يلا تصبحي على خير...بعد حسان طلع قفلت الغرفة علي وبقيت أبكي بصوت....
"على لسان حسان"
_انا كنت بجهز في شغل مهم لما سمعتا صرخة إيناس...الحمد لله إنها بكت💔..وانا واثق إنو حلمها بأمها ده وراهو تفسير وهو الح يرجعها لحالتها الطبيعية...الصباح من بعد الصلاة إيناس جات صحتني..قالت لي:- خلينا نمشي نشوف الشيخ..قولته ليها:- الزمن بدري يا إيناس..خلي الشمس تطلع ونتحرك...قالت:-لالا..ارح اسي..أكيد ح نلقاهو...وافقتها..لبست وطلعت معاها..لفينا بالعربية ساعتين ومشيت بطريق طويل عشان الزمن يمشي..وصلنا المنطقة الفيها الشيخ عبد الحليم..نزلنا وضربنا الباب..فتحت لينا خالة سلمت علينا سلام حنين وجميل وبعدها ضيفتنا...البيت من كترت الذكر الشغال فيهو يخليك تبكي..بتحس القران شغال جوه قلبك❤...شربنا موية وشاي..بعدها الشيخ جاا...هيبة ووقار ووش بشوش مُحِب...إلقى علينا السلام وقعد قصادنا مستمع لحلم إيناس....
"على لساني"
_حكيت للشيخ الحلم بالتفاصيل المُملة وأنا ببكي...قال لي :- طيب يا بتي أسألك سؤال!..قولته ليهو:- إتفضل..قال لي:- مما والدتك الله يرحمها إتوفت..فتحتي المصحف قريتي سورة؟؟قولته :- لا..بادرني:- طيب إتصدقتي عنها؟؟ قولته:- لا..قال:- طيب صليتي ودعيتي ليها بالرحمة والمغفرة؟؟ قولته:- لا...قال لي:- امممم..إنتي عارفة إنو حلمك ده معناها أمك الان تُعذب بسببك!!.. بقيت أبكي وقولته ليهو:- كيف؟؟..قال لي:-
عَنْ أَبِي هُرَيْرَةَ رضي الله تعالى عنه: أَنَّ رَسُولَ اللَّهِ ﷺ قَالَ: إِذَا مَاتَ ابنُ آدم انْقَطَعَ عَنْهُ عَمَلُهُ إِلَّا مِنْ ثَلَاثٍ: صَدَقَةٍ جَارِيَةٍ، أو عِلْمٍ يُنْتَفَعُ بِهِ، أَوْ وَلَدٍ صَالِحٍ يَدْعُو لَهُ.
وإنتي المفروض الولد الصالح...أمك محتجاك أكثر من أي وقت مضى..محتاجه دعوات..صدقات جارية..تنشري عنها رسالة هي كانت حابة توصلها..بس إنتي حتى جُملة "ربنا يرحمك يا أمي ما قلتيها" فكيف هو الحال بلا صدقات ولا دعوات صادقة..أرجعي إلى الله يا بنتي..أغتسلي وواظبي على صلاتك وأقري الفاتحه على روح والدتك وأدعي ليها..الحلم الانتي شفتي ده ما إلا نتاج حدك عليها بالطريقة المؤذية دي..وربنا بحبك كونه وراك رؤية زي دي...في ناس بحدوا بالسنين وأحبابهم يتعذبوا وهم لا يلقون بال لذلك...البكاء والنواح ما برجع الميت..أتيقني وأصبري..عوض ربنا جميل جدا❤ من خلال دعواتك وصدقاتك أمك ح ترتفع لأعلى الجنان..هل إنتي بخيلة لهذا الحد..للحد البخليك ما تذكري أمك بالرحمة من وقت ما توفاها الله...؟؟؟...طبعا بقيت أبكي بكاء..بكيييت بحرقة...الشيخ قال لي:- إستغفري..كُلنا لها❤...!
بعد طلعنا من عند الشيخ..قولته لحسان:- وديني بيتنا..عاوزة أمشي اشوف بابا...فعلاً مشينا هناك..نزلت وضربت الباب..كنت ببكي وبتنهد وقلبي واجعني شديد..حسان استناني في العربية..بابا فتح الباب و اول ما شافني فتح لي يدينوو..إترميت في حضنه وبقيت أبكي..وأقول:- يا بابا قلبي ح يطلع..اااه يا الله..عاوزة امي💔...وهو حاضني شديد ودموعه نازلة وصوت بكاهُ في أذني💔..بعدها قعدنا جوه ورقدت راسي في رجولو...بقى يمرر يدو على شعري زي ما كانت ماما بتعمل..حكيت ليهو بالحلم والتفسير...ما أجل الموضوع نهائي..الضهر طوالي عمل جلسة ذكر..وعملنا بليلة وبلح وزلابية وزعناهم على الناس...دموعي كانت جارية طول اليوم..لحدي المغرب كده مشيت المشتل...شكله أتغير خالص💔كأنه ما مشتل ماما الكانت بتهتم بيهو...قعدتا على كرسي متحرك وكان في دفتر وقلم شلتهم وكتبتا:-
"الدنيا يمة بلاك ضلام...البيت وسيع ما فيو أمان"
العبرة حامياني الكلام
الروح مشحتفه لي لُقاك....
ضهري إنكسر.. يا صحبة ما بتتكرري
يا اختي يا سر فرحتي...يا أمي وينك ردي لي
شفتي الحصل بعدك حرام
ياريتني لو شالني القدر..خلاكِ لأخر العُمر..خلاك جنب سيد الرجال....
يا يابا أمسح دمعتك..أمي فوق..أمي فوق في جنة المولى الرحيم❤
بسامه ضاحكه مع القمر...!
لو ترجع الايام ورا..نقعد ونتفاكر سوا
لو ترجع الايام وبس! من حضنك الدافي الحنين أنا ما بزح أنا ما بزح...
يا أمي مشتاقين شديد...يا أمي ياخ ما ترجعي!
*الموت قَطّاع العشم*
معقولة يعني خلاص كده؟؟
لا صوتك المليان دفى...لا وشك السمح البشوش
لا كلامك المليان شهِّد...لا ضحكة الليل الطويل...
*يا أمي ياخ ما ترجعي..يا أمي ياخ ما ترجعي*
شعر:- ماتت جنتي...تأليفي🌷
ربنا يرحم كل أم توفاها الله ويرزقها الجنة ونعيمها❤🌷
#نتلاقى∆∆
