{الفصل_الرابع}
{#وقد_كان🌷}
"تجملي وتدللي فاليوم يومكِ يا عروس الموسمِ..❤"
"يوم الجمعه يوم العقد الصباح"
"بيت ناس حسان"
_كنت في غرفتي بسمع أغاني أبو السيد..ومستمتع خالص..كلها ساعات معدودة وإيناس تبقى زوجتي شرعاً وقانوناً وحُباً❤..شلتا تلفوني واتصلت عليها..رجفه صوتها في الكلام وتوترها..الهمسات اللطيفة..سكاتها في نص الونسة البعبر عن حياءها..قولته ليها:- الساعة 2 بالضبط ح أكون عندك..خليك جاهزة ومستنياني❤...قالت لي:- أنا في أنتظارك...سكتنا مسافة طويلة وبعدين قفلنا الخط..طلعت جلابيتي البيضاء حقت الصلاة وحقت عقد المحبوبة..الليلة ما بس عرسنا..الليلة عيدي وعيدها...الليلة ح نتوج الحب بالحلال..الليلة ح أحضنها بين يديني وأحصنها..الليلة ليلتنا❤....
_كنت خايفة ومتوترة وفي نفس الوقت مبسوطة..جات أم عهد قالت لي:- بعد الفطور البنات ح يجوا وطوالي نبدأ تجهييز..طبعا هي الاقنعتني ما أرسم إلا يوم الجرتق🌷...الشاي مسيخ والبسكويت طعمه مالح..متين يتصل علي المريود واسمع الزغاريد والتهاني وجُملة "أبشر يا عريس" ويقول "عقدنا"...أيوةة يقول "عقدنا"...عهد كانت عاملة لي زبادي في وشي وبتغني لي "عروسنا زينة مجيهه"...وبين الثانية والتانية تفك الزغرودة...فستاني كان أبيض بياض ناصع وأكمامه طويله دانتيل وعليه أشكال حلوة..أخترته من غير طرحه...بس معاهو طوق أبيض رفيع وباقة ورود حمراء...بدلة حسان لونها أسود..القميص ابيض مع ببيونه سوداء ومنديل أعلى الجيب بالابيض❤..ماما أتصلت علي وقالت:- أهل العريس وصلوا..الضهرية كده ح نسمع الرصاص بضرب والزغاريد تتفكى...جاهزة؟؟..قولته ليها:-_ محتاجاك في اللحظة دي😭😭..قالت لي:- ماف طريقة اجي..أنا ح أكون معاك بكرة بس..الليلة معاك حسان..رُويدا قالت هو الوحيد الجاي يسوقك تقريباً عامل ليك حركة كده وبقت تضحك..قولته ليها:- هو كلمني أنو في مفاجأه بس ما عرفتهاا..المهم خلي بابا يصور لي العقد..فجأه سمعتا صوت بابا بقول لي:- ما بتوصيني❤..أول ما تبدأ مراسمه بتصل عليك إن شاء الله..قولته ليهو:-بحبك والله😭😭..قفلت منهم وجات خالتو قالت لي يلا ارح الصالة الفوق عشان خلاص كل حاجه بقت جاهزة تقريبا يا عروستنا❤..قولته ليها:- حاضر يلا..طلعت فوق وكانو مجهزين كل حاجه في الصالة كأنها كوافير..فستاني معلق على شماعة وتحته الجزمة البيضاء العالية..أدوات الميكاج كلها مرتصه في تربيزة عريضه..أدوات كي الشعر وتسريحه..الاظافر والاكسسوارات...خالتو قالت لي:- ما ح أركب ليك عدسات رماديه..عدساتك حلوة❤..العدسات دي خليها ليوم الجرتق...قعدتا على كرسي ثابت..وكل واحده من البنات بتعاملني كأني ملكه ح تُتُوج على عرشها بعد ساعات قلائل❤...
_في المسجد وكل الرجال مجتمعين بعد صلاة الضهر..المأذون في الوسط..أبوي على الطرف وأبو إيناس على الطرف الاخر...بدايات المراسم الجميلة والكلمات الملموسة..لاحظت لأبو إيناس مَسك تلفونه لواحد وكان متصل مكالمة فيديو..عرفت أنو متصل لإيناس❤...كل كلمة كان بقولا مولانا وأنا برددها كنت بلتزم بيها قلباً وعقلاً..عيون أبوها كانت مرتكزة علي..شفت كلام كتييير في عيونه...يا بخت بتو بيهو ويا بختها ويا بختها...❤وما كانت إلا لحظات بين هذي وتلك..حتى قال مولانا :- بالرفاء والبنين..مُعلناً إياي وإياها...زوجً وزوجة...🌷
