لاتتركني

٥

امي ندارت عليه كالت بتهديد .. باعي القسمه زينه والولد نعرفه ونعرف اهله ذاك المره كلت ميخالف وحرجتيني ويه اختي من رادتج لابنها هذا تزوجيه ورجلج فوك ركبتج واحلف لا انتي بنتي ولاني امج اذا رفضتيه افتهمتي

وجد .... ماما شدكولين

ام وجد ... العندي كلته وبعد بكيفج

وجد... شفت امي عافتني وراحت ظليت كاعده وافكر كان تهديد امي مو شقه واعرفها هي ضاجت من ذيج المره من خالتي طلبتني لابنها ظليت ماعرف شسوي
مرت جم يوم على السالفه وامي وجهه ثكيل عليه وكريم عادي جان موافق على قراري بس امي

حجيت ويه رزان كتلها الموضوع هي اكثر وحده تفهمني وتعرف اسبابي ..
اقترحت عليه اطلب اكعد ويه قادر وبالمقابله اكللهم طبعه يختلف عني ومنرهم لبعض واطلع بي عيب وتنتهي السالفه
تردت بالبدايه اسوي هيج شي عيني شريد احجي وياه واني ماطيقه .

كلت اذا محد فتح الموضوع اسكت وماحجي بي اذا حجوا اكللهم مقترح رزان .

وفعلا مرت ايام ومحد فتح الموضوع لحد ما فديوم سمعت كريم يكلها لامي ... محجت وجد بموضوع قادر بعد

اميي... لا خالتها سكته عبالها ناسيه السالفه بس اني دانطيها فرصه تفكر زين

... اني سمعت هيج كلت اهووو ذوله شون وياهم عبالي راحت السالفه نسدت

صاحني كريم رحت يمهم كعدت كلي ... ها وجد اخر جواب الج شنو اكول لقادر ترى زحمه صاله اكثر من شهر حاجي بسالفه
كتله ... كريم اني ماعرفه لقادر يعني صراحه يعني صح هو صديقك ومن صغيره جنت اشوفه وياك بس اني ماعرفه زين

كريم... والمطلوب شنو ؟؟؟

وجد ... اريد اكعد وياه احجي واشوف تفكيره عقليته يعني شون اجي ازوج هيج واحد مجرد صديقك

كريم.... حقج
امي ... اتفق وياه خلي يجي يوم وتكعد وياه تحجي
كريم ...ماشي احجي وياه ويصير خير

وجد ... جانت هاي الايام جدا مقلقه الي وماعرف شحيصير وشحسوي .

.......
كريم ... خابرت قاد ر بعد حجي وجد وطلبت منه يشوف يوم ويجي لبيتنا يكعد يحجي ويه وجد الرجال مكال شي جان جدا مرحب للفكره وكال ... باجر اجي العصر اذا ماعدكم شي ..

وجد ... ظليت ساكته اليوم كله امي كلسع تجي عليه كومي حضري نفسج لبسيلج شي حلو ومن هالكلام
محبيت اجاوبها وصير عصبيه جنت اطيعها حتى شوفني اني جنت ناويه اوافق .

ظليت افكر شنو العيب الي اكوله الهم حتى تقتنع المشكله همه يعرفوه ويعرفون ابوه يعني كل اخباره واسراره يم كريم
حسيت نفسي تورطت .
صعدت بدلت بدي وبنطرون وخليت شعري مفتوح
ونزلت.
امي اول مشافتني كالت... هاي شلابسه
وجد ...باوعت على نفسي كتله.. لابسه بنطرون وبدي
امي ... البسي فستان شي لابسه هذا .
وجد ... سويت نفسي مصدومه كتلها ليش محلوه ملابسي .