لاتتركني

٢

احلامي التي طالما تتطلعت لتحقيقها ▪︎▪︎▪︎
وامنياتي التي طال انتظار تحقيقها ▪︎▪︎▪︎
سعادتي التي اصبحت من الماضي ▪︎▪︎▪︎
اولوياتك التي كانت بعيده عني دائما ▪︎▪︎▪︎
--------------
زواجي عن حب وجنت فرحانه فرح السنين على رغم من عدم موافقه اخويه لكن جنت طايره وماجنت اشوف اي شي غلط بعلي وجنت استغرب ليش كريم ميحبه لعلي مع العلم علي انسان مثقف ومن عائله محترمه .

عشنا بيت اهله اول زواجنا وجان كلشي عادي عادي بطريقه غريبه
من اول يوم زواجنا وعلي مالمسني ولاجرب يلمسني غيره مره وحده وجان متوتر بيها وخايف حسيته
اني جان هذا الشي اخر شي افكر بي
حتى امه من جانت تكعد تسولف ويايه جنت احسه تعرف انه مصار شي بينا من طريقه كلامها

مجنت احجي لاحد عن هذا الموضوع ابد اكول عيب
جنت افكر بطريقه غريبه او حبي لعلي خلاني افكر بهيج طريقه
بعد كم يوم من زواجنا صرت اني وعلي زوج وزوجه فعليا ..
لكن دايما كنت اشوف علي ياخذ ادويه وكل ماسئل يكلي راسي يوجعني او ظهر كل مره حجه شكل .

أول ست أشهر زواج كلشي عادي علي جان زين ويايه ويحاول يوفر كلشي حتى اكون مرتاحه .

لكن مضايقات اهله الي بالبيت صارت زياده يوم بعد يوم يدخلون بكلشي بحياتي وصار كلامهم يأثر على علي
ميصير اشتغل ميصير اكمل دراسات ميصير البس هيج ميصير اروح لاهلي هواي ميصير وميصير بدت تكثر بحياتي
لاحظت اي ضيوف يجون للبيت ام علي متخليني اكعد وياهم واذا صدفت دخلت عليهم وسلمت فسوي كلشي حتى تخليني اروح لغرفتي لحد ميطلعون الضيوف .

تحملت هواي شغلات لخاطر الحب طموحي الي جنت ناويه احققهن كلشي محققت تعبت وصرت مثل الورده الي نقطفت وصارت تذبل يوم بعد يوم .

وره فتره  اسئلت من ام علي على موضوع الحمل وليش لحد هسه ماكو وخل اوديج دكتوره نعرفها شوفج
حتى اني كمت اقلق من وره كلامها مع العلم مامر على زواجنا الا كم شهر
علي كان ساكت وميحجي بالموضوع حتى لا انجرح منه لان كان يشوفني شكد مشوقه يصير عندي طفل
بعد مرور سنه على زواجنا .
ام علي كلتلي .. حضري نفسج اليوم العصر روح لدكتوره وفاء صديقتنا شوفج تكتبلج تحاليل اشوف وضعج
صراحه اني بالبدايه ماقبلت وكلت هي شعليها وليش تدخل لكن فكرت اروح حتى اشوف ليش لحد الان مصار عدنا طفل لان الموضوع صار مزعج الي وصرت اتحسس منه كلش .

حجيت لعلي على موضوع دكتوره وقبل كلي روحي
فجهزت نفسي للموعد الدكتوره ورحت اني وام علي
وصلنا للعياده انتظرنا شويه وصار سرانا ودخلنا دكتوره كانت صديقه ام علي فحصتني دكتوره وعادي الوضع كان وصار تسئل اسئله عاديه روتينيه
كتبتلي تحاليل ورحت سويتها ورجعنا الها ثاني يوم حتى شوف تحاليل
كلتلي ماما انتي رحمج طفولي وهذا سبب تاخر الحمل
من حجت هيج دكتوره عمتي لطمت على خده وكالت عزه العزاني
اني هنا ماحسيت اله دموعي على خدي مافتهمت شنو رحم طفولي بس ردت فعل ام علي خلتني احس انه اني عندي مشكله كلش جبيره ومالها حل