لاتتركني

1

قصتي يمكن تكون مختلفه يمكن بيها جزء من الخيال بس الي يعيش ياما يشوف
والحياه تجارب مثل ميكولون ....

مره جنت صغيره سئلت اخويه كتله ليش اني اصدك بالناس بسرعه يعني اذا واحد كال اني سافرت للقمر اصدكه مو مثلكم تعرفوا جذاب
جاوبني... لان ماعندج تجارب بالحياه الانسان كل مامر بتجارب ومواقف حيكدر يوزن الاشياء الي تواجهه
تفكيرج قبل سنه يختلف عن هسه وحيختلف عن بعد سنه وكل ماكبرتي حصيرين تتقبلين اشياء جنتي قبل رافضته وترفضين اشياء جنتي قبل متقبلتها

جاوبته ... بس اني ماطلع هواي من البيت شوكت حيصير عندي هالتجارب الدكول عليها

جاوبني... هاي التجاوب مو الا انتي حتعيشيها يجوز صديقه اخت اخ زوج ام تمر بيها وانتي حتعيشيها وياها
من صديقتج تغلط بشي انتي محتكررين غلطتها لان تعرفين نهايتها من الاول

جاوبته ... لعد ليش اكو ناس تعيد الغلط مره واثنين وثالثه

جاوبني .... اكو اشخاص ميتعلمون من التجارب المرو بيها
مثلا شخص مر بازمه ماليه كال لو يرجع بيه الزمن جان جمعت فلوسي وماصرفت بذخ ومن تعدت ازمته رجع يصرف بذخ هذا ماتعلم من تجربته
هواي اشخاص ميتعلمون

جاوبته ... مثل عمه تاكل حلويات وهي عدها سكر وكل مره تتخربط متتعلم الحلويات مضره عليها

.........
اني ....وجد ....من البدايه لتكولون اسمج غريب والله هواي بنات اسمهن وجد
اي شخص يقابلني لازم يكلي شنو معنى اسمج
اسمي معناه.... الحب الشديد  وهواي بي معاني  بس اني من جنت صغيره اسمع امي جاوب كل الي يسئلوها على اسمي ...

مسامعين باانور وجدي هههههه اني وجد
المهم جنت اكره اسمي فامي دلعني لولو ماعرف ليش
مره سئلتها صدمتني بجوابها كالت بيت جدي جان عدهم جلب صغير يصيحوله لولو ههههههههه

بابا وماما زوجوا زواج تقليدي بت جوارينهم وامه خطبتها وصار النصيب بدايه زواجهم مصار عدهم اطفال وهواي راجعوا وحتى سفر للخارج سافروا
بعد طول انتظار صار عدهم اخويه ونظر عيني (كريم )
بعدها ماما ظلت فتره طويله مايصير عدها اطفال رغم المراجعات ودكاتره مصار بس كريم بابا وماما قرروا يتركون هذا الموضوع
بعد 16سنه ماما صارت حامل بيه طبعا هذا الخبر جان محد مصدك بي لان ماما كان عمرها 38. او اكثر
اجيت للدنيا وعمر كريم 16 سنه
ماما دكول من صرت حامل استحي اكله لان جبير وخاف يخجل من اصدقائه امه بهالعمر حامل
وبرغم كريم جان فرحان كلش بحمل امي بس امي جانت تلبس كله عريض حتى لاتبين بطنها تستحي

من اني صغيره وكريم هو ابويه الثاني مدللني دلال محد شايفه
جنت صغيره من يطلع ويه اصدقائه ماامشي اظل من ايد لايد
وكل اصدقائه هذا الي جايبلي شي هذا الي يشتريلي هذا الي يوكلني شي بحيث جنت فيل صغير