بِلا عُنْوانْ

قَوْقعة هتان

الخميس -November -2019

كان يوم عادي و روتيني مثل نهاية كل اسبوع ، يجتمعون كلهم ببيت جدهم الكبير الي متوسط بيوتهم و بيوت قرايبهم الي مستحلّة الحي كله ، الكل يحضر غصب عن انفه لأن عدم الحضور ممكن يسبب لك مشاكل كثيرة من ضمنها سحب مفتاح سيارتك ، التوبيخ لفظيا - و جسديا-، و كثير عواقب اخرى.
بالنهاية كلهم تعوّدوا على الروتين هذا و بالغصب من كثر شوفتهم لوجوه بعض صاروا اقرب ..
دخل المجلس و مشى من بدايته الى بطنه يتخطى كل الي جالسين بعدم اهتمام و تخصّر فوق راسه : وين الي بيمرني اليوم؟ بالنهاية جالس هنا تلعب معهم فيفا؟؟

نافع تشتت انتباهه و ابتسم بوهقة : والله العظيم يا هتان اني جبت لمنال الحلا الي طالبته و جيت بطلع عشان اجيك و نروح للمحل بس بطريقي مسكني عمي ما رضى لي اجيك .. ارسلت لك ترى

رفع صوته مقهور : بعد ايش؟ قدني لبست و صار لي ساعتين انتظرك! بس هيّن و الله لا ازعل عليك اورّيك شلون .. و المحل بروحه مع بابا

مسح بقعة القهوة الي بثوبه بانزعاج من مشاغبة ولده الصغير ، و مع انه صابّ انتباهه مع الي هو فيه الا انه تكلم بصوت عالي و هو بعيد شوي يقاطع حوارهم : الواحد يقول السلام عليكم اذا دخل مجلس و لا يخطّي احد بدون ما يسلم عليه

هتان قلب عيونه و عطاه ظهره مب مهتم بس نافع نطق : ترى صقر صادق سلم على الموجودين اول بعدين نتفاهم

هتان جلس بالكنب القريب منه بانزعاج : مابي مب لازم اهم شي سلمت على عمّاني برا ، و بعدين ترانا نشوف بعض كل اسبوع وشوله الرسميات ذي؟

نافع شال عيونه من الشاشة لجزء من الثانية يكلمه : و لوّ يبقون اكبر من..

صرخ عليه بانفعال و هو يتابع المباراة : يا كلب العب زين والله لا اقوم عليك ادعسك لو خسرنا بسببك

نافع رجع عيونه بسرعة للشاشة بخوف منه : يخي انتو تدرون اني ماعرف العب فيفا ليش تحطوني بفريق رواف الي مستعد يذبح عشان يفوز؟؟ حسبي الله على من كان السبب

نطق برواقة وهو يضحك على النتيجة الي تشير الى انهم بيخسرون و هذا الي هو يبيه اصلا : البراء هو السبب

البراء الي كان يلعب ضد نافع نطق و هو مركز مع اللعب : اقول هيام قُم جيب الجاكيت الفسفوري عشان الاكيد ان رواف بيلبسه يوم الاحد

رواف رفع صوته بعصبية : تخسي و تعقب والله الا تخسي و تعقب! انا عارف انك انت غاش بالقرعة تبي نافع بفريقي عشان تضمن خسارتي يا كلب بس ان شاءالله نفوز و انت الي تلبسه

هيام ضحك عليه : ويين شكلك صدق انت الي بتلبسه يا رواف ، اوف عاد لو تلبسه مالك وجه تقابل طويل العمر بعدها