بِلا عُنْوانْ

اكتفاء

‏1:03PM
نزل من سيارته بدون ما يطفيها مستغرب من وضع السيارات المصفوفة بكل مكان بعشوائية و ماخذه الشارع كله .. شافه يمشي بيدخل و رفع صوته يناديه : البراء

البراء سمع الصوت و قلب عيونه قبل يلف له : خير

احمد عقد حواجبه على اسلوبه : وش هالاسلوب الزفت

البراء عض شفايفه بعصبية و مشى له يقرب منه بعدين نطق لما وصله : اقول عاد تراهي واصلة معي من الفجر واقف عند باب بيتكم لين الاذان و انا اشتغل معك يا دوب امداني اتروش و اجي و توي سامع تهزيئة من امي و كلّوه بسبتك ، فك عاد لا العن لك سابع جد خلاص وصلت حدي

ضحك شوي عليه باستفزاز : محد طلب منك انت الي جيت بنفسك ، و بعدين شدخلني في ان امك هاوشتك

البراء ناظر فيه بكره و الود وده يدوسه الحين بس مشكلته يبي وظيفته : ابوي غاصبن اجي اساعدك و امي تهاوشن لاني اساعد في بيت ضرتها يعني مغصوب اجي لاتفكر اني ابي اقابل وجهك

ضحك بقوة على عصبيته و كيف اللهجة القصيمية طلعت بلا وعي و الثاني ارتفع ضغطه اكثر : الحين وش الي يضحك؟ اقسم بالله انك بزر و بعدين وشو له رازن وجهك هنا؟

احمد سكت شوي و اشر على بيت الجد : جدك ملزم علي اجي اتغدا معكم ، و ارتاح تراي حتى انا مغصوب اجي

قلب عيونه بفهم على الوضع و نبرته هدت شوي رغم انه للحين منزعج : اي مصدقك يجي منه ، يموت في المصالح و الناس الواصلة

كبرت ابتسامته عليه لما استوعب انه مثل البزر بسرعة نسى الهواش : اووه يعني حتى انتوا عارفينه! كويس الحمدلله جت منك

البراء خزه بطرف عينه لما تذكر و رجع تكلم بحدة : ليش مناديني

اشر على السيارات المصفوفة بكل مكان في الحي : وين احط سيارتي السيارات مصفوفة بكل مكان و ذي بيوت الناس ماقدر اصفط قدامها

البراء ناظر بالمكان : اي اليوم اخوه جاي هذي سياراتهم ، عادي اصفط باي مكان الحي كله لنا

احمد ناظر حوله : صدق والله؟ يا ويلك ان طلعت قاعد تمقلبني

ابتسم بتكلف : مانيب بزر عشان امقلبك ، و اذا تبي تصدق زين ما صدقت انقلع بسيارتك مب لازم

احمد طلع المفتاح يقفل السيارة قبل يمشي معه لبيت الجد : الله يحسن خلقنا بس

البراء ناظره بحقد : هذا بدل ما تقول الله يعطيك العافية ما قصرت اليوم ما كان خلصنا نقل الاشياء لولا مساعدتك