Tula ng Damdamin

Patawad

Ito yung huling katagang sinabi mo noong nahihirapan ka na lumaban

Ito yung mga panahon na alam kong lilisan ka na

Mga panahong kailangan na kita bitawan kahit alam kong mahirap at masakit

Ngunit paulit-ulit kong sinasabi sayo na mahal kita at hindi tayo susuko sa laban na ito.

Sa likod ng bawat ngiti na pinapakita mo 

Alam kong sakit at hirap ang nadarama mo

Na kahit ako'y nahihirapan sa iyong kalagayan

Isang kalagayan na pilit mong nilalabanan dahil ayaw mo mawalay sa amin

Ngunit ang hirap marinig at makita na namimilipit ka sa sakit

Nais kong lumuha ngunit pilit ko nilalabanan dahil gusto maging malakas para sa iyo

Sa tuwing ika'y mahimbing na natutulog, lihim ko na hinahawakan ang iyong kamay at lumuluha kasabay ng isang dasal

Isang dasal na sana'y gumaling ka na.

Ngunit sa isang iglap na di ko inaasahan, paggising ko'y wala ka na

Sa una ayaw kong maniwala dahil baka panaginip lang ang lahat

Pero bakit ganon? sabi mo lalaban ka diba, lalaban ka para sa amin

Sinusubukan kita gisingin pero kahit anong gawin ko ay wala ka talaga

Humagulgol ako sa sakit dahil hindi ko kaya 

Hindi ko matanggap na wala ka na sa aking piling 

Madaming tanong ang gumugulo sa aking isipan

Bakit mo ako iniwan? Bakit ka sumuko sa laban?

Kakayanin ko ba na wala ka sa tabi ko?

Bakit andiyan ka agad sa kabilang buhay? 

Para sinaksak ng tatlong beses ang puso ko dahil sa sakit at pighati na aking nadarama

Onti onti nanaman gumuguho ang mundo ko 

Ang sakit na ang aking ina na nag-aruga at nagmahal sa akin ay lumisan na at di ko na mayayakap pang muli

Kung maaari lang na sa huling sandali ay makita ko ang iyong matatamis na ngiti sa labi at masabi ang katagang mahal kita aking ina

Lubos ako nagsisisi sa mga oras at panahon na aking sinayang na dapat masaya tayong dalawa

Masayang binubuo ang mga pangarap natin para sa isa't-isa

Ang sakit na ngayo'y ako'y nangungulila sa iyong mahigpit sa yakap as tuwing ako ay nalulungkot

Wala na akong hahanapin sa tuwing ako'y uuwi galing paaralan

Wala na akong maririnig na sermon na nais lamang akong turuan ng tama 

At wala na rin akong kukulitin para lambingin bago matulog

Ngunit sinabi ko sa sarili ko na may dahilan ang Diyos kung bakit ka niya agad kinuha sa akin

Isa lang itong pagsubok,

Isang pagsubok na magpapatibay ng aking pagkatao

At magpapalakas sa akin upang kayanin harapin ang mga ganitong karanasan

Kaya aking ina, patawad din sa aking nagawa at huli na ang lahat

Kung kaya ko lang ibalik ang nakaraan ay gagawin ko ngunit wala akong ganon na kakayahan.

Aking mahal na ina, lagi kang nasa puso ko at papasayahin parin kita kahit nasa itaas ka na kasama ang Diyos

Salamat, Patawad at Mahal na Mahal kita aking Ina.