Unicode
"အမေ ဒီရက်ထဲ ဖိုးလုံးခြေများနေတယ်နော်"
အုတ်ကန်မှာရေချိုးနေတဲ့ ညီငယ်လေးကိုလှမ်းကြည့်ရင်း မောင်ဘုန်း စိတ်မချနိုင်စွာ အမေ့ကိုတိုင်တောမိတယ်။ ပုံမှန်ဆိုအိမ်တွင်းပုန်းနေတတ်တဲ့ ဒီကလေးက အခုနောက်ပိုင်း ရွာထဲဆိုပြီးလှစ်ခနဲလှစ်ခနဲပျောက်သွားတတ်တာကို သူဘဝင်မကျပါချေ။
"သူ့ခမျာလဲ တစ်ယောက်တည်းပျင်းနေရှာမှာပေါ့..သားကြီးရယ်။ ပျော်သလိုသာနေပါစေ"
"ခေတ်ကာလက အမေသိတဲ့အတိုင်းပဲ။ကိုယ့်ဘက်က သတိထားနိုင်မှတန်ကာကျမှာဗျ"
အတောမသတ်နိုင်စွာ မှာကြားနေသည့်သားကြီးဖြစ်သူနှင့် စိတ်အေးလက်သာ သီချင်းလေးတညည်းညည်းဖြင့်ရေချိုးနေသော သားငယ်ကြား ဒေါ်စိန်ပွင့် သက်ပြင်းသာရှိုက်မိတော့တယ်။
ဟင်း.. ခက်တော့နေပါပြီ။
တစ်ယောက်က အပူပန်ကြီးကကြီးနဲ့ တစ်ယောက်ကျပြန်တော့ ဘာကိုမှအလေးအနက်မထားပြန်။ ဒီသားနှစ်ယောက်ကြားမှာ သူမကအသက်ကြီးကာမှ ဗျာများနေရသည်။
"အမေတို့က မပူတတ်ဘူး။ အခုနေရာအနှံ့မှာဘာတွေဖြစ်နေပြီလဲရောသိရဲ့လား?မြန်မာတစ်မျိုးသားလုံးနဲ့ရဲဘော်သုံးကျိပ်ပူးပေါင်းပြီး ပြန်တိုက်ခိုက်ဖို့ပြင်ဆင်နေကြပြီ.. ဒီအချိန်မှာ ဖိုးလုံးက လတ်လျားလတ်လျားနဲ့ ရပ်ထဲရွာထဲလှည့်ပတ်နေတာ သင့်တော်ရဲ့လား? မတော်လို့ တစ်ခုခုသာဖြစ်ကြည့်။အမေတို့ပဲ ရင်ကွဲရမှာ.. ကျွန်တော်ကအနေသာကြီး"
"အေးပါကွယ်..အေးပါ။ အမေ မင့်ညီကို ဆူထားပါ့မယ်"
တတွတ်တွတ်နှင့်မှာတမ်းခြွေမဆုံးသောသားကြီးကို ပြီးပြီးရော ခေါင်းညိမ့်ပြကာ နေလှမ်းထားသော ထမင်းတွေခြောက်မခြောက်ကိုသာ စစ်ဆေးနေလိုက်လေသည်။ သားကြီးအလိုကျ ညနေကျရင် လူတတ်လေးသားထွေးကိုတော့ အပြင်ထွက်တာတွေလျော့ဖို့ ဟန့်တားရချေတော့မည်။
မဟုတ်ရင် ..သူ့အစ်ကိုကြီးဒေါသနှင့် ဒီကလေးလွယ်မှာမဟုတ်။
"ဟော .. မင်းကရော အခုဘယ်လဲ?"
"ကျွန်တော်လား? ဟို ရွာထဲကိစ္စတစ်ခုရှိလို့"
YOU ARE READING
ဆာယိုနာရာ ( Sayonara)
Fantasy( Z+U ) "ဆာယိုနာရာ"ဆိုတာ ဂ်ပန္လိုအၿပီးအပိုင္ ႏႈတ္ဆက္ျခင္းပါတဲ့။ဘယ္ေတာ့မွ ျပန္မေတြ႕ၾကရေတာ့မဲ့သူေတြကို ႏႈတ္ဆက္တဲ့စကားေပါ့။ "ဆာယိုနာရာ"ဆိုတာဂျပန်လိုအပြီးအပိုင် နှုတ်ဆက်ခြင်းပါတဲ့။ ဘယ်တော့မှပြန်မတွေ့ကြရတော့မဲ့သူတွေကို နှုတ်ဆက်တဲ့စကားပေါ့။
