~إنقلاب روحاني~ |مكتملة|

الجزء 26

سالات.. خداتها من عندو و بدات كا ترضعها
إنتصار:عندك الزهر الحليب و الرضاعة كاينين آش خاصك مازال اممم..براء شدها..نمشي ناخذ شي حاجة و نجي
براء وقف البنت على فخاضو..كا يتأمل في ملامحها..بعد ثواني وقفات عليه إنتصار
إنتصار:gرعتيها؟
براء:شنو؟

يالاه بغات تجاوبوا و هي تgرع عليه على حوايجو..بقا كا يشوف فيها بصدمة..إنتصار شداتها الضحكة و عرفاتو غادي تعصب
إنتصار:شوف بلا ما تعصب هاذي حاجة عادية ملي الدري الصغير يكون يالاه شرب الحليب ما تلعبش معاه حتى تgرعوا و الى درتي العكس غادي تكون هاذ النتيجة لي عليك
براء:شديها و سيري كملي الأبحاث ديالك في هاذ المجال..
ناض بعصبية باش يبدل حالتو..إنتصار ضحكات و شدات البنت
إنتصار:هانتي قلقتي عمو براء و هو من الصباح و كا يضحك فيك اممم(كا تشم ريحتها)اححح و شحال كا نتسطى على هاذ الكائنات

وقت النوم..غرفة فيها سريرين..براء متكي..و إنتصار دخلات هازة البنت جلسات و عطاتها الرضاعة..
إنتصار:غادي نرجعوا غدا ياك؟
براء:آاه
إنتصار:اوف و أخيرا
براء:فرحتي؟
إنتصار:بطبيعة الحال..غادي نرجع لدارنا و لخدمتي
براء: و شنو غادي نديرو مع هاذ البنت
إنتصار:غادي نديوها للكوميسارية..تقدر أمها تكون كا تقلب عليها
براء:و من بعد؟
إنتصار:من بعد شنو
براء:والو..

تقلب للجهة الأخرى..أما هي حاضية مع البنت الصغيرة
إنتصار:براء
براء:اممم
إنتصار:خفت نتقلب في اليل و نبجغها..انا كا نتقلب بزااف
براء:ايوا خليها ناعسة تما و نعسي نتي في الارض
إنتصار:وا خاصني نحضيها
براء:ديري المخاد
إنتصار:امم حتى هاذي فكرة
دارت مخدة من جوج جهات للبنت و تكات حداها شادة في جنبها

براء:علاش خايفا عليها بزااف؟
إنتصار:دغيا دخلات لقلبي
براء:بحال والو تكون بنتك
إنتصار:إذن راجلي هو لي حطها في الطريق
براء:نعسي نعسي
نعسوا كاملين..و بعد مدة قصيرة البنت بدات كا تبكي بشوية و غادا و كا تجهد في الصوت..براء شاف فيها كا تبكي..و شاف في إنتصار لي ناعسة و ما فاقتش لان نعاسها ثقييل..

براء:كا تغيبي ماشي كا تنعسي
هزها برفق كا يحاول يسكت فيها..سكتات بغا يحطها و بدات كا تبكي
براء:شنو دابا انا نبقى هازك ..ما نعسش ؟
ما بغاش يفيق إنتصار..بقا مع البنت حتى نعسات..حطها في بلاصتها و رجع لمكانه

**************

فاقوا الابطال على إثر بكائها..إنتصار كا تحك في عينيها بتكاسل و دارت شافت فيها
إنتصار:هاذي هي صباح الخير عندك..باديا بالغوات
هزاتها كا تحاول تسكتها و لكن بقات كا تبكي
إنتصار:هذا غير الجوع الكافر
مشات للكوزينة صاوبات ليها الحليب..حتى لحق عليها براء و وجدوا الفطور..من بعد لبسوا حوايجهم..خرجوا و حطوا صيكانهم في الطمبيل و إنتصار ركبات اللور
براء:الشيفور ديالك أنا؟
إنتصار:را واقيلا هازا بنت صغيرة
براء:حطيها اللور و زيدي ركبي القدام
إنتصار:هعههه ياكما بغيتي ندير ليها سمطة..واا صافي تحرك
براء:بففف
ديمارا و دازوا من نفس الطريق لي لقاو فيها البنت متأملين انهم يلقاو شي حاجة باش يلقاو والديها..حتى بانت ليهم من بعيد امرأة واقفة كا توسل إليه باش يوقف بحركات يديها
وقف جنب الطريق بحذر..و نزلات إنتصار هازة البنت..حققات في الامرأة تكون في الثلاثينات او مقبلة على الاربعينات.. و جهها بشوش..الشيئ لي خلا إنتصار تزيد تقرب ليها و براء من ورائها