••قصة بالدارجة المغربية بطابع رياضي درامي••
🀄تأليف: ليلي ديلاشاو🀄
•قصة عنوانها باللغة الروسية و كايعني الذئب؛ المتميز بالدهاء و بالتخطيط العالي للهجمات، و تسبر أغوار عالم رياضة من أكثر الرياضات إثارة للجدل!
•قصة...
في مكتب راقي وواسع كايتعتبر المكتب الرئيسي لشركة Luvaweiss للعقار، جالسة بلباسها العملي مُنشغلة بقراءة عقود وحدة من أهم الصفقات اللي خاصها تبرم اليوم نيابةً عن الأب ديالها المسافر في رحلة عمل.
سمعات الدقّان في الباب و عطات الإذن بالدخول...
المساعدة: ⊰ آنسة ريم، راهم في انتظارك ⊱
أومأت ليها وهي كاتجمع الأوراق اللازمة من فوق المكتب. عدّلات قميصها الحريري الأنيق و شعرها البني الطويل، ألقت نظرة فاحصة على وجهها المزين بملامح صارمة و جادة قبل ماتتوجه لقاعة الاجتماعات بخُطى واثقة ورشيقة.
دخلات وبعدما لقات التحية، شرعات في تبادل أطراف الحديث مع الأعضاء التسع اللي حاضرين، من بينهم كان شخص مركّز مع كمية الثقة باش كادوي و البراعة باش كتشرح و القدر الهائل ديال الشغف اللي كايشعّ منها.
عيونها الخضراء استقرّوا على عيونو لوهلة، قبل ماتستأنف كلامها بخصوص الصفقة اللي توقعوا عقودها من طرف الأطراف الحاضرين بعد ما يقارب أكثر من ساعة ونصف من النقاش والأخذ والردّ.
انصرفوا الأعضاء باستثناء بعض مهندسي الشركة من بينهم شاب من الواضح أنه حاول يبان بشكل أنيق و رسمي كثر و لكن بذلتو السوداء ذات مقاس غير مناسب و قاميجتو البيضاء غير المرتبة بصدايفها الفوقانيين المحلولين كايبينو باللي فشل أو بالأحرى ماحاولش كفاية. واقف كايجمع أوراقو بتأنّي ولامبالاة، كايهز ورقة كايطيحو ليه جوج و كايطيحو معاهم خصلات طويلة سوداء على وجهو مغطيينو وقتما تحنى باش يهزّهم...
منظر من شأنه يشكّل كابوس و معكر لمزاج مهووسي النظام و التنظيم بحالها!
شافت فيه بازدراء و كانت على وشك توجه ليه الكلام فاش قاطعاتها المساعِدة بخصوص موضوع مهم مادّة ليها أوراق مستعجَلة.
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
دخلات وبانت ليها شابة شقراء جالسة على إحدى الكنبات بأريحية منشغلة بتصفح أحد مواقع التسوق الإلكتروني فهاتفها، هزات هاد الأخيرة راسها فاش سمعات صوت الكعب العالي بدا كايقرب راسمة ابتسامة بلهاء على وجهها الفاتن وهي كاتلقي التحية الصباحية ...
تجاهلاتها مكملة طريقها ناحية المكتب ...
ريم: ⊰ نقدر نعرف سبب هاد الزيارة؟ ⊱ ميرييل [ بابتسامة]: ⊰ ضروري يكون سبب؟ جيت نشوفك ⊱ دورات الكرسي الجلدي الأسود ديال المكتب و قالت قبل ما تجلس... ريم: ⊰ هانتي شفتيني [ شافت فالباب و عاودات شافت فيها] يلاه! ⊱
حطات الأوراق اللي خدات من عند المساعدة على المكتب، جبدات ملف من مجموعة ملفات مرتبة بإتقان و دارت نظاراتها قبل ماتنشغل بقراءة محتواه بدون ما تعير الأخرى أدنى اهتمام...
ميرييل: ⊰ إييْ مالك ديما معبسة؟ على الأقل تظاهري باللي فرحانة بشوفتي ⊱
رجعات تقادات فجلستها العشوائية فوق الكنبة الجلدية السوداء المحادية للمكتب بدون اكتراث لسوء الترحيب اللي تلقّات، قالت بحماس و عينيها على شاشة الهاتف...
ميرييل: ⊰ خاصك تشوفي هاد التشكيلة الجديدة ديال العطور، شفت شحال من وحدة كادوي عليها.. عارفاك مامسالياش دابا ولكن غادي نصيفطها ليك حيث... ⊱
ريم[ قاطعاتها بحدة] : ⊰ ميرييل ! ⊱
دارت إشارة بيدها باللي غاتقطع الحسّ، ولكن مورا ثواني قليلة ديال السكون عاودات نطقات...
ميرييل: ⊰ و شفتي الهايپ اللي نايض على داك الحدث اللي كان البارح؟ [تحققات من التاريخ المذكور فمنشور إحدى الصفحات] اه البارح [خسرات ملامحها] شخصياً ماعنديش مع هاد النوع ديال الرياضات العنيفة و لكن گاع الصفحات الرياضية وحتى بعض الصفحات لخرين ناشرين الخبر. و شفتي الحزام ديال البطولة؟ قريت باللي تصميمو جديد و أنيق ولاو فيه بلايص فين كايزيدو قطع الياقوت الأحمر واخا ماعارفاش علاش ولا ديالاش ولكن it looks cool ! أنا متأكدة إيلودي ما... ⊱
حيدات نظاراتها بانفعال موجهة ليها نظرات حادة...
ريم : ⊰ مِيريِيل! ماكتشوفينيش مشغولة؟ إيلا كنتي باغا تبدي إعجابك بيها فا راك كادوي مع الشخص غير المناسب ! ⊱ مِيريِيل: ⊰ كاندوي مع ختها ⊱ ريم : ⊰ غير حيث هي ختي فهذا ماكيعنيش أني مهتمة بأشنو كدير! و دابا إيلا ماعندك ما يدار ممكن تمشي تصفّحي أخبارك التافهة في بلاصة خرى؟ ⊱
رجعات نظاراتها و رجعات كتقرا الملف اللي كانت بصدد تتصفح، حطاتو ثاني باش تجاوب على الهاتف اللي بدا كايصوني...
لاحظت الشقراء حجبانها اللي بداو كايتقرنو و حدّة صوتها اللي بدأت كاتزاد كانت كفيلة تقفّزها من بلاصتها...
ريم:⊰ كيفاش التصاميم باقي ماوجدو؟! واخا... و الپروتوتايب؟ صيفطيه دابا! كيفاش تجلى ليه فمكتبو؟؟! الپروتوتايب يكون عندي هنا دابا ! ⊱
لطخات الهاتف مع المكتب تبعات ليه نظاراتها و رجعات الكرسي اللور مغمضة عينيها و مرجعة رأسها للور كاتاخد نفس عميق.
