من حسن الحظ أن الجرح ماكانش غائر بزاف وماسببش ضرر كبير، واخا هاكداك تم تنظيفه و تقطيبه من طرف إحدى الممرضات بأحد المراكز الإستشفائية الإستعجالية لاياش لجأوا تحت إصرار كبير من إيلودي اللي ماحبساتش من الشكى والتذمر بسبب عناده وإصراره على المشاركة في النزال فظروف مماثلة، و من معاتبته على تسرعه طول الطريق الفاصلة بين باب المركز الصحي والسيارة المركونة وهي كاتقول...
إيلودي: ⊰ مامتيقاش باللي سبّقتي القِتال بليلة، [ قرنت حجبانها وشافت لناحية للجرح] وهاهي النتيجة دابا! هادشي كامل ومابغيتي تقدم شكاية ولا تقول حتى حاجة للبوليس! ⊱
هو عارف—بل متأكد باللي شخص منحدر من إحدى العائلات المرموقة بحال داستن ماغايكونش من الساهل متابعته قانونياً و ضروري ماغايحاول يلقى طريقة يفلت بيها من العقاب، وغادي يصدق هو اللي مضيع وقته وفلوس ماعندوش أصلاً في معركة ماتدارتش باش يربحها هو.
تمشى ببطء جيهة باب السيارة ونطق...
رسلان: ⊰ في ظروف أخرى ماكنتش غانتفاك مع والديه سواءا قانونياّ ولا بيدي، ولكن دابا ماعندي لا الطاقة لا الوقت اللي نضيع فالإدلاء بالأقوال و التدابير لاخرين... راك عارفة النزال مابقاليه والو ⊱
حركت راسها باستنكار وهي كاتقول...
إيلودي: ⊰ النزال! ⊱
طلع حاجبه ورمقها بنظرة جانبية فاش فهم قصدها...
رسلان: ⊰ جرح بهاد الحجم يتلغى نزال على قبلو؟ ⊱
نطقت وهي كاتحل باب السيارة...
إيلودي: ⊰ إيلا كانو على علم بيه أكيد غايتلغى ⊱
حل حتى هو الباب اللي جيهته، كمش جبهته بسبب الألم باش حس فاش جلس وتقاد بلاصتو وقال...
رسلان: ⊰ الجرح غادي يكون مخبي بالشورط وماغيخلق حتى مشكل، ماكنظنش باللي غادي يحكرو على حاجة بحال هادي [تنهد] هوما باغيين غير العرض يبقى مستمر! ⊱
____••⏳••____
يوم السبت، اليوم الموعود: يوم النّزال!
فاقت بكري بعدما دوزات الليلة كاملة كاتقلب ففراشها بحالا هي اللي معنية بالأمر؛ ولكن من ديما كانت أي حاجة متعلقة بيه كاتعنيها حتى هي لاشعورياً، تمنات كون كان كيرضى بمساعدتها ليه خصوصا في الأمور المادية ولكن هاكدا داير نفسه حارة وماكيقبلش يمد يده للناس وياخد الحاجة بلا مايتعذب عليها...
يمكن هذا نيت من الأسباب اللي مخليينها منجذبة ليه لهاد الدرجة و مخليين حدة هاد الإنجذاب تزاد نهار على نهار بلا ما تحس!
ناضت من فراشها، خدات حمام دافئ ولبست ملابس رياضية رمادية موالمين الجو الخريفي البارد وتوجهت بعدها ناحية الدروج دايزة على إحدى الغرف القراب لغرفتها.
أنت تقرأ
🎴قصة BORZ | بالدارجة المغربية🎴
Action••قصة بالدارجة المغربية بطابع رياضي درامي•• 🀄تأليف: ليلي ديلاشاو🀄 •قصة عنوانها باللغة الروسية و كايعني الذئب؛ المتميز بالدهاء و بالتخطيط العالي للهجمات، و تسبر أغوار عالم رياضة من أكثر الرياضات إثارة للجدل! •قصة...
