كل واحد فيهم مركز بأعيُن الآخر و كاميرات الصحافة المحلية مركزين عليهم بجوج، أما هي فكانت مركزة مع البِنية الجسمانية ديال الأشقر، كاتتفحص بترقّب وتدقيق الأنحاء المكشوفة من جسمه اللي نصفه العلوي عاري— ماشي بإعجاب وإنما بتشكيك و باستفسار: حبوب لونهم مايل للأحمر مفرقين على ظهرو وجنابو، عروق خارجين وبارزين بشكل غير طبيعي، شعر متساقط بدا خطه بالانحسار والتراجع بشكل مثير للريبة لشخص فعمره... و أخيراً، تورم واضح بوحدة من حَلماته احتمال تكون بسبب ما كايتسمى بالتثدّي 'Gynecomastia'، الشيء اللي خلاها تبان كبر من الحَلَمة الثانية.
علامات كثيرة وكلها كاتدل على حاجة وحدة: الإستعمال المفرط للستِيرويْد!
زفرت بغيظ فاش تباذر لذهنها باللي هذا أكثر احتمال وارد وعاودت زفرت باحتقان بسبب انعدام النزاهة والشفافية في مراقبة أمور مماثلة خصوصاً في صفوف متبارين محترفين وفي منظمة بحال هادي.
دامت المواجهة ثواني أخرى دامت فيها ابتسامة الاستهزاء الجانبية المستفزة اللي باقا مرسومة على وجه الأشقر مقابلاها ملامح محايدة ونظرات ثاقبة منبعثين من العيون البنية للشيشاني، سالا وقت الfaceoff و طلب منهم السيد الواقف حداهم يتفارقو، هنا استغل الأشقر الفرصة باش يهمس ببعض العبارات الاستفزازية المتداولة واللي ماعارهم رسلان حتى اهتمام.
غادرو المنصة فاسحين المجال لمتنافسين خرين، وصل البلاصة فين واقفة طول هاد الوقت وقدر يلمح استياءها، حرك رأسو يمين وشمال بخفة و باستفسار قبل مايرشف من قرعة الماء، نطقت بسخط وعينيها باقين على الأشقر اللي في طريقه نحو مغادرة القاعة بنفس الطريقة باش دخل ليها...
إيلودي: ⊰ واش شفتي ال... ⊱
ماكنش صعيب يخمّن لاياش كاتلمح، هذا علاش قاطعها بقوله...
رسلان: ⊰ مم شفت ⊱
استرسلت بغضب...
إيلودي: ⊰ كيفاش كاتقدر تضبط أعصابك وماتفقدهومش قدام هاد الأشكال؟ مافهمتش هاد الأنواع كيفاش كايفكرو! هذا راه الغش بعينيه، الناس كايتقاتلو باش يحافظو على بنيتهم الرياضية بطرق صحية وطبيعية، كايدوزهو ساعات كل نهار في التداريب باش يزيدو من قوة و حدّة لكماتهم و دقة هجومهم—تداريب ماكتقلش خطورتها على خطورة النزالات الرسمية، هادشي كامل باش يجي هاد النوع ياكل اللي بغى يتدرب وقتما بغى يفيق وقتما بغى وفاللخر يخشي إبرة عامرة بالستيرويد فمؤخرته الضخمة ويتسمى حتى هو مقاتِل! ⊱
بداو كايتمشاو جيهة باب مقر المنظمة، نطق بهدوء بعدما أومأ براسه لواحد من المقاتلين معامن تلاقاو في الممر...
رسلان: ⊰ هادشي كايعني باللي خايفين يعياو وسط الجولة الأولى، كايعني باللي ماواتقينش في ريوسهم و من مواهبهم كفاية و ماقادرينش يعولو عليها غير هي! كاتزاد قوة هجماتهم اه ولكن [بثقة في النفس] فاش كايتعلق الأمر بالتقنيات وبسلاسة تنفيذها حتى منشّط مايقدر يعاونهم ⊱
أنت تقرأ
🎴قصة BORZ | بالدارجة المغربية🎴
Acción••قصة بالدارجة المغربية بطابع رياضي درامي•• 🀄تأليف: ليلي ديلاشاو🀄 •قصة عنوانها باللغة الروسية و كايعني الذئب؛ المتميز بالدهاء و بالتخطيط العالي للهجمات، و تسبر أغوار عالم رياضة من أكثر الرياضات إثارة للجدل! •قصة...
