تلفتات عندو باستفهام فاش قطع ولاح تيليفونه جانباً بإهمال قبل مايدوّز راحة يديه على وجهه بقلة حيلة...
إيلودي [بنبرة قلقة]: ⊰ أشنو واقع؟ ⊱
رسلان: ⊰ فرانكي انسحب من النزال⊱
إيلودي: ⊰ كيفااش؟ كيفاش انسحب والنزال مابقات ليه حتى سيمانة؟ ⊱تأفف ونطق بحيرة...
رسلان: ⊰ و لكن على الأقل النزال ماتلغاش، قالو احتمال كبير يلقاو منافس آخر بلاصتو ⊱
شغرت فمها باستنكار قارنة حجبانها...
إيلودي: ⊰ كيفاش على الأقل ماتلغاش؟ ياكما ناوي تقبل تشارك في النزال فهاد الحالة؟ ⊱
نطق ببطء وهو ساهي في الزجاج الأمامي المزين بقطرات النّدى...
رسلان: ⊰ ماعنديش خيار آخر، في نهاية المطاف المنافس كايبقى منافس فكلتا الحالتين ⊱
إيلودي[باعتراض]: ⊰ اش هاد الكلام؟ ياك نتا اللي ديما كاتقول ليا كل منافس حالة خاص ندرسوها مزيان بأدقّ تفاصيلها قبل مانتشاركو معاه نفس القفص؟! والأهمّ نكونو مستعدين ليها نفسياً؟ [تنهدت وكملت بهدوء] متفهمة باللي مشوش دابا، هذا علاش عاود تاصل بيهم و لغي النزال، أصلاً ماشي مهم لدرجة تجازف بالفرصة اللي غاتعطى ليك لاربحتيه! ⊱
تلفت عندها ناطق بعصبية...
رسلان: ⊰ الحياة ماغاديش تعطيك إشعار كل مرة قبل ماتفاجأك؛ هذا علاش خاص الواحد يبقى ديما واجد و مترقب أي سيناريو! حتى هادي ديما كنقولها ليك أو لا كاتعقلي غير على اللي بغيتي؟ [زفر بضيق] وأنا ماشي فوضع يسمحلي نعترض ولا نرفض ولا نلغي! محتاج كل سِنت من الفلوس اللي غاناخد آ إيلودي ⊱
إيلودي:⊰ هذا ماشي سبب كافي يخليك تغامر بال...⊱
رسلان[قاطعها]: ⊰ هذا سبب كثر من كافي! مرض الأم ديالي من جيهة وطلبات الإخلاء من جيهة راه مابقا لينا والو ونباتو في الزنقة [دوز صباعو على ذقنه بإحباط] ماعارفة والو! ⊱زمّت شفايفها في محاولة تتغلب على رغبتها في نُطق كلام عارفاه ماغيعجبوش بتاتاً، ولكن محاولاتها باؤوا بالفشل قدّام منظر الضياع وقلة الحيلة اللي قدامها...
إيلودي: ⊰ شحال من مرة قلت ليك أنه الفلوس اللي خديت من النزالات ديالي مامحتاجاهمش و تقد... ⊱
رمقها بنظرات ماكاتقلّش حدّة عن النبرة باش نطق مقاطعها...
رسلان: ⊰ إيلودي! ⊱
استرسل بنفس النبرة...
رسلان: ⊰ آخر مرة تقللي عليا الاحترام بهاد الطريقة ⊱
إيلودي: ⊰ أشمن قلة احترام! بغيت غير نعاونك ⊱
رسلان: ⊰ ما بغيت منك والو، يلاه نزلي! ⊱
إيلودي: ⊰ ولكن... ⊱رسلان[قاطعها]: ⊰ نزلي أ إيلودي نزلي! ⊱
أنت تقرأ
🎴قصة BORZ | بالدارجة المغربية🎴
Aksiyon••قصة بالدارجة المغربية بطابع رياضي درامي•• 🀄تأليف: ليلي ديلاشاو🀄 •قصة عنوانها باللغة الروسية و كايعني الذئب؛ المتميز بالدهاء و بالتخطيط العالي للهجمات، و تسبر أغوار عالم رياضة من أكثر الرياضات إثارة للجدل! •قصة...